#هدو��_قاتل_قصص
#هدو��_قاتل_7 #هدو��_قاتل
الحلقة السابعة
ركضت لوصلته وإياد كان عم بلحقني.. وقفت عنده وشفته قبل ليطلعوه.. صرخت عليه وحاولت أضربه وأنا بقله ليه عملت هيك وليه قتلت إبني.. بس هوه ماكان يرد.. الشرطي قلي لو سمحتي لا تعطلينا.. اخدوه وأنا دخلت للبيت.. كان الوضع مكركب وكلهم برا بالحديقه متوترين.. شافتني حماتي مريم.. قالتلي شو بتعملي هون.. اطلعي برا.. كل المصايب أجتنا منك.. وجهك نحس علينا.. كان الشرطي بقلهم الحراسة رح تضل جنب البيت مافي خوف عليكم.. قلتلهم مين هاد يلي طلعوه من البيت؟.. فهموني مين هاد وليه قتل أبني!.. قلي عبد الله مابنعرف شي.. ومابنعرف مين هاد أساساً.. واحد كان متخبى ورا الشجر وقت كنا كلنا بنتطلع على جثة افين.. وطلع فجأة وحاول يهرب.. بس ركضت عليه ومسكته.. انتي ما الك مكان بالبيت.. ياريت تطلعي.. حكيتله رح أطلع بس مو قبل لأخد ابني.. منعني ومريم منعتني.. وخلّت بناتها يطردوني.. قرّبت مني حنين وقالتلي لا تحاولي ترجعي.. لأنه يمكن الحدا يلي رح يموت هلأ هوه انتي!.. قلتلها شو قصدك؟.. هاد تهديد.. كانت بتحكي بصوت واطي.. ودينا جنبها.. قالت دينا.. حنين ماقصدها شي.. بس انتي مو شايفه انه كل حد من طرفك عم بموت بهالبيت.. بلّشت بإبنك وبعدين أمك وهلأ افين يلي كانت ببيتكم.. ويمكن هلأ انتي!.. حلّي عنا انتي ووجهك النحس!.. حكيتلهم ليه صرتو هيك انتو ماكنتو هيك.. نور كانت واقفه من بعيد جنب أمها.. وحاسيتها بدها تقرّب مني وتحكي شي بس وجود دينا وحنين جنبي كان محاصرني.. يمكن لو قعدت معها أقدر أعرف شي.. كنت بحسّها هاديه وغير عن أخواتها.. بالرغم إنه حتى همه ماكانو هيك!.. صرّخت عليهم مريم وقالت شو عم تحكو معها.. تعالو لهون!.. راحو لعندها وأنا كنت بحاول أعرف وين أبني.. ومع مين.. كان بس بدي أشوفه.. سألت عبد الله وين معتز ؟.. قلي مع جدو جوا.. اطلعي!.. صرخت بوجهه وقلتله فعلاً إنك بلا رجولة.. إبن أمك ورح تضل إبن إمك.. بزقت عليهم ومشيت.. دخلت عالسيارة.. قلت لإياد.. منعوني أشوف أبني.. ومابعرفو مين يلي اخدوه من البيت.. نحنا بكرا الصبح لازم نروح على المغفر لنعرف كل التفاصيل.. رجعنا على البيت.. وقعدت أبكي.. قرّبت مني أم سمر وحكتلي لا تزعلي يا بنتي.. إبنك رح يكون بخير.. قلتلها كيف والشرطة قالت إنه الخطر من جوا البيت.. حكتلي يمكن هالشخص يكون القاتل فعلاً.. ويمكن لأ.. حكيتلها أنا حاسه شي.. بس مابعرف اذا صح.. قالت شو حاسه.. حكيتلها إنه القاتل مو موجود.. سمر حكت كيف يعني مو موجود؟!.. قلتلها يعني اذا ماكان القاتل هوه نفس الشخص يلي أخدوه اليوم عالمغفر.. يبقى يلي بقتل روح همها تنتقم مني.. حكالي إياد وضحي أكتر.. قلتلهم إنه في شخص مات عإيدي بعملية جراحيه.. وقالو إنه أهله بشتغلو بالسحر.. وهوه مجرم مطلوب من زمان.. يلي قتل أمي وابني والبنت يلي طلبت منها تحميلي إبني من هالبيت يمكن روحه لهالزلمه.. انتو عارفين شو معنى جثته تختفي من المقبرة وتيجي لجوا بيتي.. أبنه أجا يهددني عالمستشفى وفكّرني بتواصل مع حد من أعداءه وإنه همه يلي طلبو مني أخلّص عليه تحت العملية.. قالتلي سمر.. انتي متأكده إنه الشخص يلي أخدوه الشرطه ماكان إبنه يلي أجا هددك.. حكيتلها متأكده مو هوه.. وأنا حاسه إنه مو إبنه القاتل.. كان باين عليه الخوف وهوه بكلمني وكأنه فعلاً خايف من أعداءه وبيتهمني.. ولو الموضوع كان غير هيك ماكان أجا لعندي ليعرف الحقيقه.. تطلعت فيه أم إياد وسمر وقالتلي.. بنتي أنا بعرف مره إسمها هيام.. بتبطل السحر وبتفكّه.. مرة مؤمنه كتير.. اذا شاكه إنه الموضوع في سحر والقتل من شي مو موجود.. هيه ممكن تكشف عليكي بطريقتها وتعرف.. قالتلي خلينا نروح بكرا.. طلع الصبح وماقدرت أنام إلا ساعتين.. رحت مع إياد فوراً على المغفر.. سألت الشرطي وقلتله بدي تفاصيل بترجاك.. يلي اخدتوه من البيت مبارح مين بكون.. قاتل ابني؟.. حكالي الشرطي لأ.. هاد حرامي مطلوب من زمان.. ماكنا قادرين نمسكه.. وهلأ صار بين إيدينا.. تأكدنا إنه مادخلو بقصص القتل يلي بتصير جوا بيتكم.. لأنه هوه فعلاً حرامي قديم ونمسك بأكتر من قضية سرقة.. وهوه كان ناوي يسرقكم.. بس الجريمه يلي صارت منعته من دخول البيت.. ويمكن لحسن الحظ إنه أجا للبيت بهالساعه.. ليشهد على كم شغله.. قلتله شو شاف!.. خليني أشوفه بترجاك.. أمر الضابط يدخله للمكتب.. قعد وكان متوتر.. صار يحكي يلي صار مبارح مخيف لدرجة فظيعه.. مو قادر أفسر ولا أوصف يلي شفته.. وحتى الشرطه ماعم تصدقني.. قلتله احكيلي كل شي شفته من بداية دخولك للبيت لوقت ما أخدوك الشرطه.. حكا دخلت البيت من فوق الباب الحديدي تبع الحديقه.. كان مسكّر لهيك نطيت من فوقه.. لاحظت إنه الكهارب قاطعه فكّرت مافي حد بالبيت.. قلت فرصه.. باين بيت فخم وفكرت أهله مسافرين.. وأنا عم بمشي بالحديقه شغّلت مصباح صغير لأشوف الباب الرئيسي.. شفته وقربت منه.. وفجأة نفتح.. سكّرت المصباح وحاولت أهرب بس ماكنت شايف شي ونسيت من وين دخلت.. فرميت نفسي ورا شجرة.. شفت ضو طالع بالظلمه.. وباين إنه ضو كاميرا لتلفون.. بنت عم تمشي وتصوّر الحيطان والحديقه.. الضو صار يقرّب عليه وأنا خفت أنكشف.. فجأة بشوف خيال بمشي ورا البنت.. بتلف راسها وبتسلط ضو التلفون لورا.. بتشوف الخيال عم بكبر.. وكأنه بقرب منها.. بتنزل التلفون وبتحاول تهرب من بعد ماسكّر باب البيت.. وكأنه الخيال هوه يلي سكّره بقدرة قادر.. بتصرخ وبتصير تلف حوالين البيت.. أنا قمت لأهرب بس ماقدرت لأنه المكان صار ظلام من بعد مانزلت تلفونها لهيك شغلت المصباح يلي معي لأشوف شو يلي بصير.. أول ماشغلته لقيتها مقتولة!.. كيف صار هيك بدقيقه وحده.. ماعرفت.. طفيته وصرت برجف ورا الشجره وفجأة سمعت باب البيت فتح وطلع منه صوت ناس وضو الحديقه كله نضوى.. ماكانو منتبهين عليه لأنهم بحالة صدمه من جثة البنت يلي على الأرض.. بهاللحظة قررت أهرب.. قمت بسرعه من ورا الشجره للباب.. حاولت أنط فوقه بس من خوفي ورجفتي وقعت.. مسكني واحد وصار يضرب فيه وفجأة لقيت الشرطه محاوطين كل المكان وعم بكلبشوني.. صفنت بكلامه.. وتقريباً صرت متأكده تماماً إنه القاتل مو بشر.. يلي عم بقتل مو بني آدم.. في قوة خارقة محاوطه البيت وعم تنهينا واحد واحد.. بس ليه.. معقول يلي اعتقدته صحيح.. معقول تكون روحه لمختار !.. شو ممكن أعمل لأحافظ على إبني ويلي هوه آخر أمل مخليني أبقى عايشة بهالحياة.. شو!.. طلعت محتارة من المغفر وقلت لإياد.. لازم أحمي إبني.. ساعدني بترجاك.. حكالي خلينا نروح للمره يلي قالت عنها أمي.. كان أسمها هيام مو هيك!.. قلتله صح قالت اسمها هيام.. اخدني فوراً على البيت وحكا لأمه اتصلي معها وخبريها أنه نحنا جايين.. اتصلت معها وحكتلها في موضوع كتير ضروري لازم تساعدينا فيه.. طلعنا على المكان يلي وصّفتنا عليه أمه.. بيت قديم وشكله غريب.. ملوّن بلون زهري وأحمر.. استغربت من منظره وماسألت ولا شي.. بقي إياد بالسيارة بستنى ونحنا دخلنا لجوا البيت من بعد ما استقبلنا ولد صغير وحكالنا ماما شوي وبتكون عندكم.. استنيناها لأجت.. قالتلها أم إياد عكل شي.. صفنت فيه وقالت إنتي شو أسم أمك يا بنتي ؟.. حكيتلها فريال.. صارت تكتب معلومات على ورقة وتتطلع عليه.. وتحسب بأرقام وأشهر من ميلادي.. وفجأة حكتلي.. يوم تسعه وعشرين خمسة ألفين وسبعه.. بيعنيلك شي؟.. قلتلها صح شو عرفك؟.. هاد يوم مميز بالنسبة إلي.. محفور على سنسال بيعنيلي كمان.. هاليوم كان أحلى يوم بحياتي أنا وإياد.. بس بعد بأيام افترقنا بس مانسيته.. ولا هوه نسيه.. بس كيف عرفتي.. قالت كتير منيح.. تطلعي عليه.. انتي يا بنتي مسحوره !.. حكيتلها شو معنى هالكلام.. كيف!.. قالت السحر يلي عليكي متعلق بهاليوم هاد بالذات.. هوه نعمّل بنفس اليوم وبشكل مؤقت.. لحتى يتحقق بعد عشر سنين بالضبط.. بأحداث مرعبه.. وغالباً هيه أحداث موت عنفس اليوم يلي رح يجي بعد عشر سنين.. انتي بلشتي تحسي بأعراض بهاليوم؟.. قلتلها مات ابني وبشكل مرعب مافيكي تتصوريه.. بس شو معنى هالكلام.. شو علاقة التاريخ.. أنا شاكه إنه المريض يلي مات عإيدي عم بنتقم مني.. أو .. لأ لأ .. فهميني أنا مو فاهمه!.. قالتلي اهدي شوي.. يلي لازم تعرفيه إنه يلي عملّك السحر حد قريب منك.. قريب كتير وكان همه الأول يحرق قلبك عولادك.. إبنك التاني بخطر.. ولازم تلحقيه قبل ليلحق أخوه.. الأشخاص المستهدفين همه ولادك ويلي صار مع أمك وخدامتها ما إله أي علاقة أبداً باللي صار مع إبنك !
يتبع..
لا يوجد أي ردود على هذا الموضوع
