نصائح تفيدج عن تنظيف البشرة@@@

مًنِقُوٌوٌلَ حًبًيِّبًأّتٌـيِّ

مساء الخير بنات
اليوم راح احجيلكم على تنظيف البشرة
مهما كان نوع بشرتج سواء دهنية او جافة او حساسة فهي تحتاج تنظيف و عناية حتى نمنع تكون حب الشباب و التصبغات و الكلف
خلي نبدي بالخطوات
اول شي اغسلي وجهج بالغسول او الصابونة اللي تستعمليها يومية لان احنه راح نفتح المسامات فمنريد الدهون و المكروبات تدخل لداخل المسامات و تسدها و تسبب حب الشباب
جيبي جهاز البخار و اذا ماعندج احمي مي و حطيله قشر ليمونة او اوراق نعناع طازجة اثناء الفوران لان كلش حلوة للبشرة
ديري المي بشي مسطح و عميق مثلا تبسي او صينية عميقة و حطي منشفة و غطي راسج و غمضي عيونج و ابدي استنشقي البخار على كيفج
ظلي بالبخار لمدة 10 دقايق راح يعرك وجهج و تنفتح المسامات
هسه من خلصتي عوفي وجهج ينشف وحده لا تغسلي و لا تمسحين العرق
انتظري الى ان ينشف وجهج و يهدا لمدة 10 دقايق و امسحي بقطنة مغمسة بمي الورد البارد
حلوة كلش تنطي نضارة و توريد و تسد المسام المفتوحة
هسه نجي لمرحلة التقشير
اكو عدة انواع مقشرات اني مثلا استعمل مقشر بحبيبات الليمون ينطي تبييض للبشرة و اكو مقشر بحبيبات المشمش و اكو مقشر شركة فورايفر الامريكية مناسب لجميع انواع البشرة
اغسلي وجهج بالمي البارد و حطي المقشر و ابدي فركي باطراف اصابعج و على كيف حتى لا يصير تهيج بالبشرة و بحركة دائرية ماعدا منطقة العين
افركي ايديج و اصابعج بالمقشر حتى تصير ناعمة
انتظري الى ان ينشف المقشر تماما على وجهج تقريبا ياخذ 20 دقيقة حسب نوع المقشر و وراها جيبي فرشة اسنان نظيفة خصصيها بس لتنظيف البشرة و بلليها بمي دافي و زيلي المقشر بفرك خفيف بيها و ركزي على مناطق الروؤس السوداء و قشري شفايفج ايضا بالفرشة
اغسلي وجهج بمي دافي و ازيلي باقي المقشر
التقشير كلش مهم للبشرة لان يشيل خلايا الجلد الميتة اللي تسبب الاسمرار و التصبغات لهذا السبب بعد التقشير راح تحسين بشرتج صار لونها افتح و ناعمة
هسه جيبي قطعة ثلج او قطعة مي ورد مثلج مرريها على وجهج لسد المسام بشكل نهائي لان اذا ظلت المسامات مفتوحة راح تدخل الاتربة و الزيوت و يتكون حب الشباب
هسه صارت عدنه بشرة نظيفة و ناعمة و تتقبل اي كريم او قناع مغذي
اكو ماسك كلش حلو جربته هسه لوجهي
جيبي خاشوكة حليب نيدو و اخلطيه ويه كمية مي ورد و سوي مثل القناع و وزعي على وجهج بالقطنة و هو ناشف و انتظري الى ان ينشف عالوجه و غسلي اول شي بمي دافي و بعدين بمي بارد
الحليب افضل مغذي للبشرة لان يحتوي على كل الفيتامينات و المعادن اللي تحتاجها البشرة و منها فيتامين C اللي يفتح لون البشرة و فيتامين E مضاد الاكسدة اللي ياخر التجاعيد و الشيخوخة
وره الماسك لازم نحط كريم شد للبشرة بالذات اللي يعانون من الترهل
افضل ماركات الكريمات هي الفرنسية او الامريكية
مثلا كريم R3 الامريكي استعمله بشكل يومي لشد البشرة و تاخير التجاعيد او مثلا كريم الكولاجين الفرنسي من لوريال باريس او ماركة د.مراد الفرنسية
كلها نوعيات جيدة
وزعي الكريم على كل بشرتج بما فيها منطقة تحت العين و اتركي بشرتج تمتصه
عملية التقشير لازم تسويها مرة كل اسبوع اذا جانت بشرتج دهنية او مرة كل اسبوعين اذا جانت بشرتج جافة او حساسة
بالنسبة لمي الورد طبعا هو افضل تونر و قابض للمسام و اذا مسحتي وجهج بمي الورد البارد يوميه قبل النوم على بشرة نظيفة لمدة اسبوعين راح تحصلين نضارة و تتورد البشرة و هذا الشي عن تجربة شخصية
بيوم تنظيف البشرة يفضل متطلعين و تتعرضين لمصدر حرارة مثل حرارة الطباخ لان البشرة كلش حساسة بعد التنظيف
و اذا اضطريتي لازم تحطين واقي شمس نسبة الحماية بي Spf 30 و عدم وضع المكياج الا بعد مرور ساعة عالاقل بعد عملية التنظيف
كل يوم قبل النوم حطي فازلين او زيت اللوز على شفايفج حتى من تكعدين الصبح تكون شفتج ناعمة لان الحمرة محلوة على الشفاه المتشققة

ان شاء الله تكونو استفدتو من الموضوع