قصة وحده تقول٠٠٠٠٠٠
انا تزوجت وعمري ١٧ سنه ما ادري ليه يعني دايم اسمع امي تقول كيف زوجتها وهي صغيره المهم ابوي شرط عليه اكمل دراستي الجامعيه والحمدلله خلصت محاسبه ، زوجي من النوع القوي قايم بالواجبات بس قوي مايعطينا الشيء الا بطلعت الروح مايسفرنا الا مكه واذا بكينا ودانا الشرقيه السوق مو دايم ، كثير ينتقد اهلي انا كنت امشيه الحياة غصبن علي ما ابي المشاكل وخراب البيوت وكنت اقول مصيره يكبر ويتغير انا كنت مسخره حياتي له بعزايمه ومزاجه الغريب وساكته ، جبت بنتين وبعدها أجهضت مرتين ربي ما أراد ، بعد ١٢ سنه حسيت انه متغير يعني زان شوي هو من النوع الي شوي قاسي على بناته ( للأمانه شوي مو كثير ) وهو اذا قال لا يعني لا مايغير رأيه عنيد وجاف وبخيل ( ملابس السهره اخذ من خواتي وعندي اخت دكتوره هي تشتري لنا انا وبناتي ) فجأه صار زين يعطي بناته فلوس اول مايطلبون أنا يسألني اذا محتاجه شيء جيت سألته قلت له وراك متغير قام انقلب وجهه وابتسم انا خفت ونغزني قلبي قال ابداا الانسان يتغير للأفضل المهم سمعته مره يسولف مع واحد عن المشالح ( البشت ) ومره سمعته يسولف عن المطابخ والثلاجات ...عرفت وقتها انها الطامه الكبرى جيت وسألته انت بتعرس قال ايه بعرس قلت له ليه قال كذا تغير بكل وقاحه يجاوب وكأنه يقولي بغير طقم الحمام ... قمت وجلست اصيح بغرفتي ودموووع تنزل وتنزل سمعني وجا قال بطلي دلع وترا حتى اذا بكيتي ماتفرق معي زواجي قريب .. قمت شلت بناتي ورحت لاهلي وعلمتهم قالي ابوي واخوي حكيم قالي انتي مبسوطه معه قلت مو مرره الي مهون علي قسوته بناتي قال هو مكرمك؟ قلت مو مره مايرحمني اذا مرضت والمصروف يقصر فيه ، قالي اجل وراك تبكين عليه هذا جزمة تفصخ خليه ينقلع بيطيح بكبد الي هو بياخذها ... اجلسي عندنا وانتبهي لنفسك اخوي هون علي مصيبتي ، انا جلست عند اهلي وبديت افكر بوضعي لقيت اننا أقل الي حوالينا انا وبناتي ،، بنات أختي ملابسهم كلها من برا وعندهم شغالات وسواقين ويسولفون رحنا لندن ورحنا دبي وانا وبناتي مانعرف شيء ، بديت ادور على شغل وقتها قررت اتغير وانسى الايام التعيسه والعفن ... بفضل من الله لقيت لي عمل واشتغلت وبعد ثلاث شهور قررت اكمل ماجستير وجلسنا انا وبناتي بشقه بسطح بيت أهلي .. حتى بناتي نفسيتهم تغيرت يقولون لي يا ماما جدو يعطينا فلوس يا ماما صرنا ناكل برقر وبيتزا وانا كنت وقتها اموت في اليوم مية مررة
.
كنت اموت باليوم الف مره شفقه ورحمه على بناتي ماكنت ادري قد ايش هم محرومين ... سألت وحده من بناتي قلت لها تشتاقين لبابا ؟ قالت والله يا ماما مو كثير يعني عادي احسن اننا جلسنا بيت خوالي ... صرنا نطلع بالليل نروح متعشى بمطعم وصرت اشتري لهم ملابس واخليهم يختارون ابي ابسطهم واعوضهم ...طبعا ابو الشباب زوجي يحسب اني ميته من البكي والحزن عليه ، بعد اربعة اشهر بالضبط جاا يدق علي شفت رقمه مارديت دق بعدها عشر مرات مارديت قام ارسل لي مسج يهدد ياولي لو ما أرد وبرضه طنشته قام دق على اخوي قاله اخوي وينك ؟ قال كنت بشهر العسل وبعدين انشغلت تأثيث بيتي الجديد قاله اخوي اها والحين فضيت لاختي ؟ سكت الرجال .. قاله اخوي طيب ايش المطلوب الان قال زوجي خل زوجتي وبناتي يرجعون وزوجتي لها الكرامه والمعزه ... قام قاله اخوي والله اختي ماشافت كرامه ولا معزه عندك الحين يعني بترد لها ١٣ سنه . اخوي قاله على حسب علمي انها طالبه الطلاق وملزمه . قام يصرخ غصبن عليها ترجع اجي اجرها مع قرونها قاله اخوي اختي ماعندها قرون اختي تحت حماية رجال واذا فيك خير جرب تأذيها لو بحرف نعرف كيف نتصرف معك حنا شايفين وساكتين من زمان على شان اختنا مانعتنا ندخل لكن الحين اختي بحمايتي والله ماتطلع من ذا البيت الا برضاها ولا ظنيت انها تبيك ...مرت سته شهور وجا يكلم امي خليها ترجع وانا بعدل ...قالت له امي بنتي ترا موظفه الحين وتحظر ماجستير قام يهاوش مين سمح لها !!! قالت امي انا سمحت لها ابوها سمح واخوها سمح زوجتك عمرها ٢٩ وانت تزوجت عليها الي بعمر زوجتك بنات توهم عرايس متزوجين وانت ذليتها من حرمان واهانه وضرب ...طبعا هو قد ضربني مرتين ولا علمت اهلي لكن علمتهم بعد ما تزوج ...امي قالت له والله يا ولدي البنت ماتبيك عافتك ...قال انا برجع لكم بعد اسبوعين طلعت له بعد اسبوعين يوم رجع وكان لي سنه ما شفته تفاجأ بشكلي تغيرت وجهي رجعت له الحياة شعري رجعت له صحته صار طويل وجسمي اختلف انا انسانه ثانيه ...هو سكت وجلس يفكر قلت له وش عندك .. قالي ترا الي تسوينه موب لصالحك قلت له ايش بالضبط الي موب لصالحي ...شغلي ؟ الحمدلله العمل لا هو عيب ولا حرام ..الماجستير الي على وشك اخذه ؟ الرسول صلى عليه وسلم اوصانا بالعلم .. طلبي الطلاق ؟ الاسلام ماحرم طلب الطلاق عند وقوع الضرر من ضرب واهانه وحرمان وقسوه وضياع حقوق ...قلت له هنا ناكل ونشرب احسن من يوم كنا عندك .
معنا فلوس اكثر من يوم كنت المسؤول عنا ، بناتك صارو ياكلون شكولاته يروحون للمدرسه ومعهم مصروف وصرنا نعرف المطاعم تصدق ماكنت ادري ان الرياض حلوه ... انا درست واشتغلت شفت الناس وين هم وين انا ! ليتك متزوج من زمان وقمت وخليته ، الرجال انصدم واصيب بدهشه قالي تراني بتغير وبعدل بينكم ...قلت له ودي اضحك مين قالك اعدل روح لها كلك انا معاد ابيك ، قالي باخذ بناتي قلت نادهم واذا قالو ايه انا ما راح ارفض اسألهم ..نادينا البنات بنتي الكبيره قالت انا بجلس مع امي ما ابي اعيش معك بس بالعيد نسلم عليك او انت تعال سلم علينا ، اما بنتي الصغيره جلست تصيح تقول ما ابي اروح الا مع ماما ، اخذهم يومين عند زوجته وانهبلت زوجته عليه ويعلموني بناتي قامت تهاوشه وبناتي يصيحون والصغيره تصرخ ، انا سمعت بكاهم رحت واخذتهم وقلت له ارسل لي ورقتي وارفع علي قضيه على شان الحضانه ، هو انشغل زوجته جابت له توأم وبعدين حملت مره ثانيه وانا خلعته وبناتي عندي ...بعد كم سنه اشتريت بيت وازوجت عقيم عمره خمسين سنه شفت معه جنة الدنيا يحب بناتي ويغليهم ودخلهم مدارس اهليه ما حلمو فيها ويسفر بناتي على حسابه لو يبون للمريخ ...اما زوجي الاولي لهي مع حرمته وطلقها بعدين رجعها ومجنتته جايب لها شغاله يعد ماكان مانع الشغالات علي حتى سواق ممنوع اركب مع حقين خواتي ...الزمن الاقشر ولى الحين بنتي الكبيره بثالث جامعه طب ومخطوبه وأجلت خطبتها إلين تتخرج وبنتي الثانيه حبيبة ماما المدلعه معي .
#النهاي��❤❤
الأنثى بكل ما تحمله من رقة لكنها قوية فكلما حاولو أن يكسروها تنبت من جديد ,فهي تستطيع أن تبدأ من الطريق الذي يظنه آدم نهاية الحياة بالنسبة لها ,صحيح ستتألم قليلا لكنها تعود اجمل, أقوى,اروع,ويكفي أن تحتفظ بأصلها وهو الرقة والجمال والأنوثة فهي لا تذبل أبدا مهما ساء الطقس.
👌💋❤
