( الجزء الأول )
كانت قاعدة بغرفتها البسيطة.. الي مكونة من تخت ودولاب
بتجهز بحالها لتروح ع جامعتها.. لبست الجاكيت الطويل الأسود.. والجينز الأزرق.. وبوتها المفضل الأبيض يلي تقريباً كل مشاويرها بتلبسه
حطت الشالة التوتي ع راسها.. والاحمر الخفيف ع شفايفها.. رجعت مسحته.. رجعت حطته كمان مرة
اطلعت في حالها مترددة تحطه ولا تمسحه.. خايفة يشوفها عماد ويعمللها قصة متل كل يوم
مسحته وابتسمت وهيا عم تحاكي حالها بالمراية
علا: أصلاً هيك أحلى..
طلعت برا غرفتها كانت إمها وأخوها علي قاعدين بالصالون.. علي عم يلبس بجزمته وامها عم تشرب قهوتها..
علي: شو جهزتي
علا: اي يلا خلينا نروح بلا ما نتأخر
علي: بدك شي يا امي نحنا رايحين
ام عماد: لا ياروحي الله يسهل عليكن ويوفقكن
طلعت علا واخوها عماد ع جامعتهم متل كل يوم.. بيطلعو سوا وبيرجعو سوا.. بيعملو كل شي سوا.. متعلقين ببعض كتير
علا صبية ناعمة وهادية كتير.. عمرها 21 سنة متوسطة الجمال بس جذابة وبتدخل القلب بسرعة.. من عيلة متواضعة او تقريباً مائلة للفقر
عايشة هيا وامها واخوتها علي وعماد.. ابوها متوفي من وهما صغار .. علي اكبر منها بسنة عمرو 22 اما عماد ف هوا الاخ الكبير عمرو 28 سنة لهلء ما اتزوج.. بيشتغل وبيصرف عالبيت وهوا يلي بيكمللهم تعليم بالجامعة.. حنون وطيب بس عصبي وملتزم كتير..
كانو واقفين عم يستنو بتكسي ليركبو.. بقيو أكتر من 10 دقايق ومافي ولا سيارة مرقت من عندهن
علي: اووف على هالنهار شكلنا ما رح نلاقي سيارة
علا: طول روحك اخي هلء بتيجي سيارة
علي: لك ماافي شوفي كيف الشارع فااضي اووف علينا تعي خلينا نمشي شوي يمكن نلاقي شي سيارة لقدام
علا: اي امشي بالمرة بنشتري فلافل جوعانة كتير في محل قريب من هون
