هو الحوار طويل شويه بس بجد محتاجه نصيحتكم ومحتاجه اعرف انا صح ولا غلط
انا مرتبطه بواحد بقالنا سنه ونص تقريبا هو من القاهره وانا من المنصوره .. انا كنت ف القاهره عند خالتي وطبيعي كلمني علشان يشوفني بعد ما خلص شغل
كنت انا مع بنت خالتي واللي هي مرتبطه بيه قاعدين ف كافيه ف جالي هناك وقعد مكملش 10 دقايق وقال نسيبهم احنا وننزل .. وروحنا وسط البلد بعدها ب ساعتين كده بنت خالتي كلمتني سالتني لو هعدي علي نفس المكان اللي كنا فيه وانا مروحه سالته قالي اه هنعدي عليه قالتلي طيب علشان انا روحت البيت وعوزاكي تروحي تدي ل كذا اللي هو صاحبها 200 ج ولما تيجي هديهالك وقالت انها فلوسه وهو ناسيها معاها وكده وهو هينزل تحت قدام الكافيه ياخدها ف قولتلها ماشي .. لما قولتله اتضايق جدا وقالي ازاي ياخد منها فلوس واحنا مش هنروح ف حته وايه الاستغلال ده ف حاولت اهديه واقول يمكن مكانش معاه فلوس يكمل الحساب او محتاجها او اي حاجه وكده وفضل مش طايقني طول الطريق وصلنا عند الكافيه كلمتها علشان تكلمه ينزل سالتني لو انا لوحدي قولتلها لا ف انا حسيت انها بتسال علشان التاني هيتكسف ينزل ياخد الفلوس وحد معايا وقد كان يعني .. فضلنا واقفين شويه لقيتها بتكلمني بتقولي ده هو مش موجود فوق وبعد شويه عن المكان ده سيبي الفلوس فوق مع الكاشير وقوليله دي فلوس كذا علشان متقفيش تستني .. ف قولتله وحسيت انه اتحول لشخص تاني نهااائي وصوته علي وفضل يشتم عليه ويقول هو هيشغلنا عنده وانا مش هطلع هو فوق ومش عاوز ينزل علشان عارف ان ده عيب ف حقه وقال كلميها عرفيها ينزل ياخد الفلوس انا مش هطلع قولتله الحوار مش مستاهل كل ده واللي بتعمله ده
قال لا مستاهل علشان دي قلة ذوق احنا قدرناه وجينا وهي قالت انه هينزل ياخد الفلوس هو مش هيشغلنا عنده انا مش هطلع وقالي الفلوس اهي عاوزه تطلعي اطلعي ف خدت الفلوس ويدوب دورت وشي ورايحه الكافيه لقيته بيشدني بطريقه غبيه جدا وقالي انتي مجنونه ولا اي هو انا بقولك كده علشان تطلعي بدل ما تهديني وتقولي معلش وعلشان خاطري انا بتسبيني وتمشي وقام شاددني من ايدي بطريقه اغبي وقالي يلا هروحك انا اتصدمت اقسم بالله عمره ماكان كده انا اصلا عمري ماشوفت ف حنيته حتي واحنا متخانقين لو انا غلطانه بيكلمني برده يراضيني بس ف الوقت ده حسيت ان انا لاول مره اشوف البني ادم ده وزعقت فيه وقولتله سيب ايدي فرجت علينا الناس اي شغل الشوارعيه ده وبصراحه من النرفزه مبقتش عارفه انا بقوله اي وقومت معيطه سكت وفضل يهديني وحقك عليا بس انتي غلطانه كان ممكن بكلمه تهديني مش تسبيني وعاوزه تطلعي وقالي خلاص اللي انتي عوزاه وانا هروح اودي الفلوس لما راح كان فيه حد من اللي شغالين هناك مستني ياخد الفلوس وكده انا فضلت واقفه بعيد شويه ولقيته جاي بيقولي انتي صغرتينا يلا علشان اروحك قولتله زي ما جيت لوحدي انا هروح لوحدي انا مش صغيره ولو سمحت اعتبر موضوعنا كده منتهي وانا هوقف تاكسي وياريت تسيبني امشي
علي صوته تاني وقال متسبنيش وتمشي وانا بكلمك وقفت تاكسي وركبت وقام راكب متكلمناش لحد ما وصلنا عند العماره وفضل يتكلم ويقولي انتي غلطانه ومكانش يصح اللي انتي عملتيه وانا بصراحه مكونتش طيقاه ومصمم اني غلطانه.. قولتله تمام مش انا غلطانه قالي اه ويلا صالحيني قولتله وانا مش عاوزه اصالحك ومش عاوزه اعرفك تاني قالي متكبريش الحوار وانتي غلطانه انا غلطت ف حاجه واحده بس انتي السبب فيها قولتله متحاولش تبرر اللي انت عملته ده ب اي حاجه انا عملتها علشان انت ملكش حق تتعامل معايا كده ولا تبهدلني بالطريقه دي وانا فعلا مش عاوزه اعرفك تاني وسيبته وطلعت
بعتله مسدج قولتله اللي انا كنت معاه النهارده ده انسان تاني.. اللي انا عرفته وحبيته اعتبرته مات من دلوقتي وعملتله بلوكات من كل حاجه ونمت وانا مقهوره
صحيت تاني يوم لقيت اتصل عليا كتير جدا وفضل يتصل برده بعد ما صحيت لحد ما رديت شدينا مع بعض شويه وهدينا وشدينا تاني وكده طول المكالمه وفضل يراضي فيا علشان المفروض اني هقوم اسافر المنصوره وطلب يوصلني وانا رفضت وقفلت علشان اقوم البس
ونزلت وفضل متابع معايا لحد ما وصلت الموقف وركبت ومن وقتها مكلمنيش تاني بقالنا كده تقريبا اسبوع
انا عاوزه اعرف مين اللي غلطان وانا اللي عملته ده صح ولا غلط
لانه وحشني جدا ونفسي اكلمه بس حاسه ان كده هاجي علي كرامتي وهيفكر ان الموضوع عادي وممكن يتطور او يتطاول عليا اكتر من كده مع العلم انه عمره ماغلط فيا او أهني باي شكل غير المره دي
ممكن رايكو وقولولي اعمل اي
