تاني يوم الضهر …
هيثم خلص شغلو وحجز طيارة ليرجع على البلد .. ما ارتاح من التفكير ولا المسؤولية حتى وهو برا البلد ..
هيثم : الو حبيبتي انا حجزت طيارة وبكرا بكون عندك .. الممرضة دايما عندك ما هيك ؟ كيف صرتي ؟ تحسنتي ؟ ما بصدق الا بس اجي وشوفك بعيوني ديري بالك على حالك يا روحي اي
=======================================
في المشفى ….
فاقت هند ودقت الجرس .. اجت الممرضة
الممرضة : انسة هند فقتي
هند : اي
الممرضة : بشو عم تحسي ؟
هند : دايخة شوي بس
الممرضة : اي مو مشكلة هلأ بنادي الدكتور
الدكتور : انسة هند .. كيف صرتي ؟
هند : الحمد لله بس دايخة
الدكتور : من اثار النوم ما تخافي .. انسة هند الشرطة برا بدها تفوت تحكي معك كلمتين .. بتقدري ؟
خافت هند وتوترت ..
هند : شو بدن يحكو معي يعني ؟
الدكتور : طولي بالك اهدي .. بس لأنه والدتك تعرضت لضربة على راسها بدن يشوفو ازا بتشكي بحدا
هند : بس هيك ؟
الدكتور : اي بس
هند : ماشي
الشرطي : الحمد لله على سلامتك
هند : أ .. أ .. الله يسلمك
الشرطي : اي يا هند احكيلنا
هند : شو احكي ؟
الشرطي : مين بتتوقعي ضرب والدتك على راسها ؟
هند : ما بعرف
الشرطي : ما بتشكي بحد ؟
هند : لأ
الشرطي : ليش متلبكة ؟
هند : مين ؟؟ انا !! لا بس …… اول مرة اتعرض لهيك موقف
الشرطي : يعني ما بتشكي بحدا ؟
هند : لأ .. بس تفيق امي هي بتحكي مين يلي ضربها انا كنت بشغلي
الشرطي : …… الحمد لله عسلامتك
طلع الشرطي من عند هند …
الشرطي : الظاهر هند ما بتعرف انه امها ماتت ؟
الدكتور : والله ما قدرنا نخبرها لانه وضعها كتير تعبان بس في شي غريب .. ما حد اجا زارها بالمشفى حتى والدتها الله يرحمها ما اجا حد استلمها ووقع على وراق وفاتها
الشرطي : يعطيكن العافية .. خبروها بوفاة امها بتقدرو توصلو لحد من اهلها اكيد والإستجواب ما خلص بس توصلو لأي حد من اهلها رجاءا خبروني .. سلام
=======================================
في بيت نهال ….
بكر : مرحبا خالتو
زينة : انا حكيت لأخوي كتير عنك .. واني حبيتك كتير عشان هيك أصر أنه يتعرف عليكي
نهال : اهلا وسهلا نورتو
زينة : كان عندك بنت اسمها هيفا وينها رجعت على بيتها ؟
نهال : لا هي اهلا برا البلد اجت عندي هالفترة وبس اهلا يبعتولا تيكيت رح ترجع تسافر ليكا نايمه جوا تعبانه شوي
بكر : عظم الله اجركم
نهال : شكر الله سعيكن
وهنن عم يحكو سمعو صرخة قوية من غرفة هيفا ركضت نهال لغرفة هيفا لتشوفا و وقف بكر متلبك فاتت زينة لعندهن وطلعت بعد 5 دقايق وصوت هيفا ما عم يهدى من الوجع
بكر : شوفي ؟
زينة : الظاهر البنت تعبانه
نهال : لا تآخذوني يا جماعة البنت مريضة وفاقت موجوعة
بكر : اخدها عالدكتور؟
نهال : لأ هيثم قال بس يجي بياخدها اعطيتها مسكن هلأ
بكر : حابب أفوت أشوفها و اتطمن عليها لو سمحتي
نهال : تفضل
فاتو نهال وبكر وزينة لعندها …
بكر : مرحبا
هيفا : أهلا
بكر : انا بكر زميل المرحومة بالشركة (مد ايدو سلم عليها)
هيفا : اهلا فيك
بكر : حبيت اتطمن عليكي لانه خالتو ام رغد قالتلي انك تعبانة
هيفا : شكرا الك تسلم يارب
بكر : انسة رغد هاد رقمي ازا احتجتي أي اشي رني علي وانا بالخدمة
هيفا : كلك زوء
ابتسمت هيفا واخدت الرقم … نظرات اعجاب متبادلة بين هيفا و بكر
بكر : كيف صرتي ؟
هيفا : الحمد لله شكرا على اهتمامك
=======================================
عند الدكتور
الدكتور : نسبة الإحتمال للإنجاب 40% .. بس العلاج مكلف شوي
سامر : مكلف ؟؟ ( حك راسو و اتنحنح ) كتير يعني ؟
نجوى : ولا يهمك حبيبي بيع دهباتي
سامر : …….
نجوى : اكتبلنا العلاج لو سمحت
وهنن طالعين من المشفى …
سامر : كيف يعني تبعي دهباتك وازا الله ما طعمنا طفل تكوني خسرتي دهباتك وخلص ؟؟
وقفت نجوى ومسحت دموعا …
نجوى : طول ما في امل للإنجاب رح اعمل المستحيل لحتى يصير عنا بيبي
ام سعيد : بلا بكي نجوى حبيبتي انا متاكدة رح تحملي .. هيك ثقتي بالله انه رح يجبر خاطرنا بطفل منك .. انتي مو بس كنتي انتي بنتي
=======================================
نور عم تحكي مع سعيد عالموبايل …
نور : الو حبيبي
سعيد : اي يا روحي
نور : شو صار معك ؟
سعيد : لسا ولا شي
نور : طيب شو رح نعمل ما عاد متحملة بعدك عني
سعيد : طيب شو اعمل
نور : حاول تخلي سامر يطلع يستاجر بيت برا .. انت الكبير في البيت ولازم انت يلي تبقى وهو يلي يطلع
سعيد : امي مو رضيانة
نور : وانت وين كلمتك ؟ انت الكبير ولازم يكون الك كلمة
سعيد : رح حاول
حطت نور ايدها على تمها وهي عم تضحك .. بلا صوت وتابعت حكي مع سعيد وصارت تتصنع البكي
نور : انا .. انا كتير بحبك وبحب مرت عمي ما بدي اترككن .. ما بعرف ليش هي ما بتحبني
سعيد : خلص لا تبكي يا روحي مشان يلي ببطنك
نور : طيب اوعدني تلاقيلي حل وترجعني
سعيد : بوعدك
سكرت الخط نور وهي عم تحس بلذة الإنتصار .. بتعرف انه سعيد بيحبها وما بيردلها طلب
=======================================
في مكتب المحقق ….
– صار لازم نحقق مع اللي حواليها .. ونبدا التحقيق مع صديقتها هيفا
منذر : مو هيفا كانت مسافرة ؟
– هاد اول شي لازم نتأكد منو .. ونسأل المطار متى وصلت البلد بالوقت والدقيقة والثانية
منذر : معك حق سيدي
– واعتبرني وكلتك هالمهمة .. انصرف
منذر : احترامي سيدي
=======================================
في المشفى …
تحسنت صحة هند وصار بدها تطمن على امها .. طلعت من الغرفة يلي هي فيها وتوجهت للغرفة يلي كانت فيها امها .. بس ما لقتها على السرير رجعت لغرفتها ودقت الجرس ..
الممرضة : شو في انسة هند ؟
هند : امي بأي غرفة ؟
الممرضة : انسة هند ممكن تروقي وتقعدي شوي بدي احكي معك
هند : اي احكي
الممرضة : انتي بتعرفي أنه الحياة والموت بإيد رب العباد صح ؟
هند : أي ؟
الممرضة : لهيك بدي قلك ادعي لوالدتك بالرحمة .. الله يرحمها
هند : ما فهمت ؟
من نظرة عيون هند فهمت الممرضة انه هند رجعت انهارت من جديد
الممرضة : انسة هند ممكن تهدي ؟
هند : امي ماتت بسببي اي بسببي انا يلي قتلتها
الممرضة : انسة هند اهدي
اتجمعو الممرضات حوالين هند ومسكوها بالقوة واعطوها ابرة مهدئ
_________
