#النصف_الآخر_قصص
#النصف_الآخر_6 #النصف_الآخر
الحلقة السادسة
طلع الصبح.. كنت لسه متل ما أنا.. نايمة على التخت وعيوني صاحية وماشفت النوم طول الليل.. بس كنت بتطلع بوجوه أهلي وساكته.. وهمه نفس الشي ما كانو شايفين النوم بسبب اللي عملته.. كنت متأكده انه منظري بخوّف وكلهم كانو خايفين مني.. بس مابدهم يقولو.. راسي كان عم يوجعني والصداع مستمر من مبارح.. بهاللحظة كنت عم بستنى منهم كلمة وحدة لحتى انفجر فيهم متل القنبلة.. بابا قال لساجد اعمل اللي قلتلك عليه وأنا رح أروح لعند بيت عمك.. طلع من الغرفة ولحقه ساجد ونادا ميس لتلحقه.. راحو وانا ضليت مع ماما.. قربت مني وحضنتني وأنا بعدتها عني.. بدون أي كلام.. استغربت من التصرف وخافت اعمل شي بحالي لهيك تأكدت أنه كل المنافذ مسكره منيح.. وطلبت مني أدخل لحتى أتغسّل وأتنظف.. قلتلها مابدي.. وأنه أنا مبسوطه بنفسي هيك بدون غسيل أو حمام.. حكتلي من متى هالكلام ؟! أنا بعرف انك أنظف وحدة بالبيت.. ومن حبك للنظافة صرنا متأكدين انه عندك وسواس.. صرخت بوجهها وقلتلها مابدي أروح عالحمام.. دفنت حالي بالفراش وقلتلها اطلعي.. بالأول رفضت بس بعدين تركتني.. بابا راح لعند عمي.. وحاول يفهم منه بالهدوء شو اللي عملته مرته.. وليه جابت البصارة لعنا على البيت.. فهمته انه مادخلها وانه امي طلبت منها تيجي وتجيبها لحتى تتسلى.. متل هيه تسلّت.. وقالتله انه هيه بتعرف هيك ناس وبتحب هالشي بس من باب الفضول.. ولو بدك تتهمنا بشي يُفضل انك ماتتكلم.. قلها انه هوه جاي هالمرة بالهدوء وحابب يشوف البصارة مرة تانية.. امي اعطته رقمها وقالتله حاكيها ولو بدك انا بخليها تيجي لعندكم.. حكا معها واعتذرلها وقلها بدي اشوفك.. بدي أعرف شو الكلام اللي حكيتيه لمرتي لأنه بنتي أسماء بحالة صعبة ولازم تيجي.. قالتله شفت انك رجعت حكيت معي متل ماقلتلك ؟!.. أنا قلتلك رح تحكي معي وتطلب أجي وأنا عم بقلك مارح اجي.. بسبب اهانتك لإلي.. يعني مارح أجي.. قلها بترجاكي الموضوع خطير.. وانا بدي أعرف شو صار.. رفضت البصارة ومرت عمي نداء استغربت وحاولت تقنعها.. قالتلها انا مابقبل.. فخار يكسر بعضه مادخلني وياريت ماتتصلي فيني مرة تانية.. سكرت الخط بوجهها وقالت لبابا انها رافضة تيجي.. قلها لازم نخليها تيجي غصب عنها والا رح ابلغ عنها واحبسها.. واحبسك معها.. قالتله بترجع وبتهدد مرة تانية؟!.. روح عالج بنتك المجنونة بعيد عنا.. مادخلنا فيك.. عمي حاول يهديه بس دائماً مرته بتمشّي كلمتها لهيك طلع بابا من البيت وحاول يتصل مع البصارة مرة تانية.. وبعتلها مسج انه رح يروح عالشرطة ويقدم فيها بلاغ انها بتضحك على الناس وبتوخد فلوسهم لو ما وافقت.. رنتله بهاللحظة وقالتله بحكيلك شو صار بس بشرط بعد ما اقلك لا بتعرفني ولا بعرفك.. قلها اتفقنا.. قالتله أنا رح اجي على بيتكم المسا لأني صرت بعرفه.. بتمنى ماحد يعرف اني جايه حتى مرت اخوك.. وبعد ما حكا معها اتصل مع ساجد ليعرف شو صار معه.. وبمساعدة ميس قدر ساجد يعرف عنوان بيته لآدم.. ولأنه كانت عطلة أول السنة كان آدم بالبيت ومو بالمعهد لهيك قرر يشوفه وجه لوجه ويحكي معه.. وصل بيتهم ورن الجرس.. طلعته امه قلها أنا صاحب ابنك وبدي احكي معه.. حكتله تفضل استناه بغرفة القعدة لأنه بصلّي.. وبعد دقايق دخل الصالة وشافه وقله بهدوء.. أنا أخو أسماء.. فتح معها موضوعي وقله تعبانه وبتهلوس.. احكيلي من متى بتعرفها لحتى اذا صاير شي أو حد آذيها.. قله انه بحبني وبخاف عليه أكتر من أهلي.. وحتى موضوع حلمي بإني اصير مطربة كان رافضه.. لأنه شخص متدين وبخاف الله وتقي وبدليل إنه طلب مني أتحجب وأترك الجامعة وأنا رفضت.. وكتير بخاف عليه أنجرف بالحرام وأعمل شي غلط.. وقله انه انتو باين انكم مو متدينين ومنفتحين زيادة عن اللزوم.. لهيك تاركينها تغني بالمعهد قدام الطلاب وبالندوات والمهرجانات الطلابية ومابتسألو.. ساجد عصب من كلامه وعرف انه شخص متعصب ومتشدد كتير وماكان بده إلا إنه يعرف هوه شو علاقتة فيني ولو بعرف شي.. بس ماتركله مجال وتركه يطلع من البيت بدون مايحكي بالوقت اللي مفروض مايعمل هيك.. طلع ساجد بدون نتيجة وترك رقمه مع آدم حتى لو عرف شي بتعلق فيه يحكيله.. رجع على البيت معصب وقال كل شي لبابا وعلى مسمعي.. كنت معصبة منهم ومو طايقه أشوفهم وبس بدي أقعد لحالي.. كل مايقربو مني أبعدهم بس ماما خافت انه أأذي نفسي.. وحكت لبابا تصرف بسرعه قبل لتضيع من بين إدينا.. أنا بس سمعت اسم آدم حسيت اني كرهانيته ومو طايقه أسمع سيرته.. خصوصاً انه بابا حاول يكرهني فيه بعد ماشاف حالتي وقلي أنسيه.. رح يجيكي عرسان كتير وأول شخص رح نشوفه مناسب رح نزوجك ياه.. مابدي تزعلي على شي أهم شي صحتك بنتي.. كرهني فيه بكلام كتير سيء وأنا ماكنت قادرة أتحمل أكتر.. بس اقتنعت وكنت مبسوطه بهالكره.. وعقلي بالغنا والشهرة حتى بعد ما ساجد شجعني على هالشي وبابا نفس الشي وحكولي انسي آدم لأنه شخص متعصب ومجنون ومارح يساعدك لتحققي حلمك.. نحنا أهلك بنوقف معك.. كانت الطريقة الوحيدة حتى يحسو اني تحسنت وشفيت انهم يذكرو حلم الشهرة قدامي وميس صارت تقلهم انه في مطرب ممكن يساعدها عرفنا رقمه لو بتحبو نحكي معه ويسمع صوتها.. بابا ما مانع وساجد نفس الشي وحكو نحنا ضد العلاقات اللي متل آدم ومابنسمح فيها.. بس شي اله علاقة بنجاحها وتوفقها ما بنمانع فيه.. احكي معه واحكيله عن اختك.. انا بهاللحظة انبسطت وتغيرت كتير.. بس كنت خايفه اقوم أغسّل وكنت مو طايقه المي ومابدي أحطها على وجهي.. جابولي ياها لعندي بطشت كبير.. وغسلت منها.. بس بلحظات كنت بحس انه مخي مشوّش وعم بكره اللي بحبوني وبدي أضل لحالي وأحس إني متدايقه من ملابسي وبس بدي أرميهم.. حاولت أمنع نفسي أعمل هالشي وما افكر بأي شي سيء.. خصوصاً بعد الدلال اللي شفته من أهلي فجأة.. أرتحت ونمت ساعتين بدون ما أحس بشي وصحيت على صوت أهلي جوا الصالة كانو عم يحكو مع حد.. باب غرفتي كان مشقوق وكنت سامعه نص الحكي بس من بعيد.. قمت لأسمع كان صوت البصارة.. كانت عم تحكيلهم كلام ما كنت فاهميته بالأول بس لمّا ركزت قدرت أستوعب.. حكتلهم الظاهر إنه بنتكم ممسوسه.. وإذا هاد الكلام اللي قلتوه صار.. فاللي شفته بالفال تبعها وتبع أختها أله تفسير واحد.. إنه بنتكم أسماء معشوقة من جن وصايبها مس العشق.. وهالنوع من الجن مابترك معشوقته اللي إختارها إلا لحتى يتملكها وتكون إله ويبعد عنها كل مين بحبها.. لأنه التملك عنده بكون أهم من أي شي.. وبدليل إحساسها بوجود حد جنبها بالحمام وبغرفة النوم.. وملابسها اللي خلعتها فجاة ورمتها من الشباك.. هالشي كان بأمر منه لأنه بحب يشوفها بدونهم على طول!.. انتو لازم تنقذوها قبل لهالملعون يستحوذ عقلها ويتملكها نهائياً.. سمعت ميس عم تحكي وصوتها برجف.. قالتلها كيف فينا نساعدها.. حكتلها انتي اختها التوأم وباين انك شبهها !.. والفال تبعك اللي شفته بعد مارميتي حجرك ماببشر خصوصاً إنه القطة اللي نقتلت كانت إلك!.. حكتلها كلامك بخوّف فهميني ليش وكيف!!.. قالت اللي فسرته إنه الجن دخل بيتكم لسبب ما.. أسماء عملت شي ماحد بعرفه غيرها لحتى أغرم الجن العاشق فيها وحبها وقرر يتملكها.. وتقريباً هيه العين اللي شفتها واللي تأكدت منها هلأ.. هيه عينه اللي ماغابت لحظة عن بيتكم ولأنه شفتها عم تكبر يعني القصة رح تكبر وتتطور.. وقرّبت منك كتير.. بابا خاف وامي نفس الشي وقالولها بنتي ميس شو دخلها؟.. قالتلهم لأنها من نفس الجينات تبع اختها.. يعني من نفس البطن وطبيعي يكون قريب منها.. غير إنه بتشبهها.. وبالبداية كان دخوله لهالبيت عن طريق القطة.. قتل روحها ودخل فيها لحتى يضل مقرّب من بيتكم.. وانتو شهدتو عهالشي من بعد مادفنتوها ورجعتو مالقيتوها.. وشفتوها عايشة !.. ومتل مابتعرفو الجن بتشكّل بأي شكل بده ياه إن كان إنس ولا حيوان.. شو هالتفسير غير انه الجن تملّك القطة ليضل جنبكم ومع أسماء.. امي زاد خوفها وقالت يعني هوه معنا هلأ ؟.. قالتلها وبكل لحظة كمان !.. وممكن انتو تنأذو.. والنصيب الأكبر ميس !.. ميس قالت بس أنا مو حاسه بشي.. أنا طبيعية.. حكلتها يمكن بعد فترة يمكن بعد شهر.. يمكن هلأ !!.. انتي لازم تنقذي اختك.. ويمكن الخلاص تبعها بإيدك.. بس أنا ماعندي خبرة صدقوني.. أنا مجرد بصارة بشوف بالفال وبعرف شو مخبى.. غير هيك مابقدر اعمل.. والشفا بإيد ربنا وبإيد اللي بعرفو بهالأمور.. حكالها بابا مين اللي بعرف بهالأمور احكيلنا.. قالت في شيوخ كتير إسألو ورح تلاقو.. قامت وقررت تنسحب وقالتلهم انسو اسمي.. وانسوني نهائياً.. أنا وصلتلكم رسالتي وقلت اللي عندي.. بتمنى انها تنشفى قبل لتوصل أذيتها لألكم.. طلعت من البيت واهلي وقعو بحيرة من كلامها وانا سمعت كل الحوار من ورا الباب.. كنت شبه واعية بس جواتي شعور بقلي انتي مبسوطه بهالشي.. كوني مبسوطه انه في حد متملك روحك وبحبك بهالشكل.. كأنه جنبي وحاسه بوجوده وبحبه.. بس كيف فيه أنبسط واللي حاببني جن؟!.. عملت نفسي أني ما سمعت شي.. وطلعت لبرا طبيعية وبضحك وقلت لأهلي متى رح نشوف ريّان.. أنا حاسه إنه صوتي رح يعجبه ورح يشجعني ويقدملي مساعدته.. كلهم كانو خايفين وشايفه هالشي بعيونهم.. دخلت عغرفتي مبسوطه وأول ما قعدت عتختي شفت مسج من آدم بقلي أنا مابدي أتركك.. اللي سمعته من أخوكي خوّفني عليكي بترجاكي احكيلي انتي منيحه لأنه حابب أساعدك.. اتصلت معه وقلتله انت شخص مابتعنيلي ولا رح تقدملي شي بحياتي ورح توقف عائق بطريقي اتركني بكون أحسن لأعيش حياتي
يتبع..
Mahmoud Salloum
