النصف الاخر الحلقة السابعة٢

#النصف_الآخر_قصص
#النصف_الآخر_7 #النصف_الآخر
الحلقة السابعة ٢
.. وأنا لأول مرة ماكنت سائلة ومبسوطه بوجوده.. وقربه زاد عليه لدرجة اني حسيت حالي محبوسة ومشلولة ومو قادرة أتحرك أبداً.. ولأول مرة نطق.. سمعت صوته بقلي.. أنتِ إلي.. أنا مابتركك.. كان صوت خفيف عند أذني وكأنه لشب .. كنت شامّه ريحة نفس العطر اللي عالجكيت وكنت بحكي معه ومو واعية شو بقله.. بهاللحظة والهوا بدخل من الشباك .. ما صرخت وماعملت أي شي.. لحد ماطلع الصبح.. صحيت من نومي لقيت جسمي كله أزرق وعأديه خدوش حمرة كتيرة.. صرخت من المنظر وبهاللحظة وعيت منيح.. لبست ملابسي وطلعت بركض للصالة.. شافت ماما جسمي وقالتلي مين عمل فيكي هيك.. انتي عملتي هيك!!.. قلتلها مابعرف.. وفجأة قلتلها مادخلك!.. حكيتلها بألم.. ماما ساعديني أنا تعبانه.. ورجعت قلتلها بعصبية أنا مبسوطه هيك لا تتدخلي فيني!.. كنت انسانه مفصومه وعم احكي شي وأرجع أقول شي تاني كأنه في شخصيتين جواتي عم بمشوني بدون إرداتي.. كنت بهاللحظة كرهانه ملابسي وبس بدي أطلع من البيت.. امي قالتلي انتي مو طبيعية مارح اخليكي تروحي على المعهد.. ميس دخلت لعنا وقالت يلا اسماء أنا جاهزة.. حكتلها اختك مو طبيعية لا تتركيها وأنا لوحدي من بعد ماطلعو ابوكي واخوكي عالشغل وخايفه عليها ومن البيت كمان!.. قالتلها ماتخافي عليها.. صرخت بوجه ميس وقلتلها مادخلك فيني انتي كمان.. ابعدي عني.. فتحت الباب وقررت انزل لتحت واخلع ملابسي على مرآى الناس وأهل الحارة.. كنت عم بفك زر القميص اللي لابسته وأنا نازلة من البيت لهيك ميس خافت وقالت لماما اني رح اعمل شي.. حكتلها امي الحقي اختك واتصلي مع ابوكي واخوكي بسرعه !.. طلعت بركض لبرا البيت.. وصرت أنزل على الدرج بسرعة ورجل بتسبق رجل.. ماكنت واعية أنا ليه بدي أعمل هيك وشو المغزى من كل اللي عم بصير.. بس اللي براسي كان إنه أنزل على الحارة وأشلح كل ملابسي قدام أهل الحي.. كنت عارفة إنه ميس عم تلحق وراي وبدها تمنعني إنه أعمل هيك.. كان أول الصبح وكانت في حركة كبيرة بالحارة.. خصوصاً إنه حارتنا جاية على شارع تجاري والصبح بكون في تجمعات كبيرة بالحي.. كانو نسوان الحارة عم يغسلو وكل وحدة عم تنشر ملابس على برندتها.. وصلت للشارع ووقفت بنصه.. كان في سيارات عم تمر.. بس ماكنت سائلة.. وقفت بالنص جنب عمارتنا ومنعت السيارات تمر.. وقفت عم بتطلع عليهم وبتطلع على الناس.. صوت السيارات عم تزمر خلّا الكل يتطلع.. وأنا بهاللحظة صرت بصرّخ أتطلعو عليه.. شوفوني.. كانت ميس بهاللحظة واصلة لتحت وعم تمنعني أعمل هيك.. شدتني من إيدي وحكتلي خلينا نمشي على المعهد بترجاكي أسماء.. حكيتلها بعدي عني مادخلك فيني.. بدي كل الناس تشوف جسمي.. حكتلي شو بتحكي انتي.. نجنيتي؟!.. شو هالكلام.. استغفر الله.. تعي بسرعه لا تخليني أضربك قدام الناس.. شوفي الكل عم بتطلع.. بعدّت إيدها وكان الكل عم يتطلع علينا والسيارات واقفة والرجال بكل مكان جنب محلاتهم والنسوان على برنداتهم واقفين وأنا مو سائلة وعم بعمل بس اللي بحكيلي ياه عقلي.. شديت على قميصي وصرت عم بفك زراره.. ميس مسكت إيدي وقالتلي أسماء لأ.. لا تخلي الناس يفكرونا بنات مو مناح.. نحنا مو هيك.. بترجاكي لأ.. سمعة أبوكي وسمعة أخوكي وسمعتنا كلنا.. صارت ميس تقول اختي تعبانه شوي نحنا بنعتذر يا جماعة.. صرخت عليها وقلتلها اتركيني أنا حرة.. ماحد اله دخل فيه.. طلّع واحد راسه من الشباك وصار يقول خلصونا.. بدنا نمشي.. حلّو مشاكلكم بعيد عن الشارع.. شو هالعالم هي!!.. بهاللحظة هربت من ميس لبعيد وفكيت كل قميصي.. كان باين كل شي تحت القميص وأنا مو سائلة.. ميس صارت تضرب على وجهها وتبكي.. مديت إيدي على بنطلوني وصرت بدي أنزعه.. بدون ما أسأل عن شي.. وقبل ليصير شي قرّبت مني ميس وضربتني على وجهي وحاولت تلبسني.. وثواني وكان جاي ساجد وبابا بالسيارة.. نزلو وهجمو عليه.. لبسوني بسرعه وطلعوني لفوق على البيت.. وكل الحارة شافت اللي صار.. كنت سامعة النسوان بحكو من فوق.. استغفر الله يارب الدنيا آخر وقت.. شو هالبنات.. ياعيب العيب ماضل حيا ولا أخلاق.. الحياة خربت.. وسامعة صوت بزقة الرجال وأنا طالعه مع أهلي.. طلعوني وسكّرو الباب عليه وساجد صار يضربني بعنف ويسب عليه ويحكي نحنا ماعرفنا نربيكي.. فهمينا ليه عملتي هيك.. ليه وسختي سمعتك بإيدك.. وامي تبعدهم عني وتبكي وتحضني.. وأنا بس بتطلع على ميس وحاقدة عليها لأنها ضربتني قبال كل الحارة.. كانو ماسكيني من اديه وبضربوني على وجهي.. بابا قال لأمي ليه أديها وجسمها أزرق.. حكتله صحيت من النوم لقيتها هيك وأنا مو عارفة شو صار معها بالليل.. بنتي عم تضيع مشان الله لاقو حل.. حكا بابا.. بعد اللي صار تحت.. سمعتنا توسخت وصار الكل يفكرنا عديمين شرف وأخلاق.. أول شي رح نعمله انه نزوجها لأي واحد بيجي لعنا.. ومانسأل عن شي.. حكيتلهم مارح أسمحلكم هوه بحبني وأنا بدي ياه.. مارح أسمحلكم.. ساجد رجع يضربني وقلي مارح اخليكي تتزوجيه لهالمجنون المتعصب شو ماصار.. ومتل ماقالك ابوكي أول واحد رح يجي على البيت رح نزوجه ياه..
يتبع الحلقة السابعة ٣