#النصف_الآخر_قصص
#النصف_الآخر_8 #النصف_الآخر
الحلقة الثامنة
سكتت وما جاوبت.. وكان كل تفكيري بساجد اللي رح يجيبلي صاحبه يخطبني.. وكان بدي أهرب من هالقصة بأي طريقة.. دخلت على غرفتي وسكرت الباب ومنعت حد يدخل عندي.. حاولت ماما تدخل بس قلتلها بدي أضل لحالي أنا منيحه.. بس أنا ماكنت منيحه أبداً.. كان الجو لسه غبره برا والناس صارت تفوت على بيوتها حتى صحاب المحلاّت سكّرو لأنه الغبرا دخلت لعندهم.. بالرغم من أنه الوقت لسه عصر.. وأنا بهاللحظة كنت بفكر أهرب من البيت.. ماحد رح يشوفني لو طلعت وماحد رح يسأل.. والناس مشغولة بالجو.. كان من المستحيل إنه أطلع من الشباك الصغير اللي بغرفتي لأنه نحنا بالطابق التالت ومافيني أنزل منه إلا إذا بدي أنتحر.. وأنا مستحيل أقتل نفسي لو الدنيا كلها أسوّدت بوجهي ووصل اليأس حده عندي.. قلت لازم أهرب بسرعة قبل لتشوفني أمي وميس.. وبهاللحظة كنت واعية على كل شي.. فتحت باب الغرفة وصرت أتطلع.. لقيت أمي بتعمل صوف بالصالة.. وميس كانت عم تدرس وباب غرفتها مفتوح.. ضليت واقفة جنب الباب وبتطلع لحد ما ماما دخلت على المطبخ تشوف الطبخه واللي استغربته انها سكّرت باب المطبخ برغم إنها بالعادة مابتسكره.. وأنا بهاللحظة كان لازم أهرب قبل لترجع.. فتحت الباب وأخدت موبايلي وشنطة صغيرة لإلي كان فيها ملابس.. طلعت بسرعة ونزلت من البيت.. وقبل لأنزل سمعت صوت ميس عم تنادي على ماما وبتقلها.. ماما.. أسماء هربت من البيت.. ماما ما لحقتني.. وميس حاولت تمشي وراي بسرعه بس كنت سريعة ونزلت على الحارة.. ماكان في حد كتير وكنت مغطية نفسي.. لقيت تكسي بوجهي.. طلعت فيه وقلتله لو سمحت امشي بسرعه.. كنت عارفة انه ميس رنّت لبابا أو ساجد لهيك حاولت أمشي قبل لحد يجي ويشوفني.. ماكنت عارفة لوين بدي أروح.. ومين بدي أشوف.. بس كان بدي أخلص من الجو المشحون اللي بالبيت.. وحياتي اللي صارت كلها تعاسة وكئابة.. وشعوري الحقير اللي عم بحسه كل ما بنام.. تطلع عليه صاحب التكسي مستغرب من شكلي.. ليه كلي كدمات.. حكالي بدك مساعدة.. بدك مستشفى؟.. حكيتله لأ.. قلي طيب ماقلتيلي لوين رايحه.. أنا فعلاً ماكنت عارفة لوين بدي أروح.. بس للحظة رنيت لريّان.. سمعت صوته!.. المطرب المشهور عم بحكي معي.. قلي مين؟ .. حكيتله أنا أسماء البنت اللي حكتلك عنها اختي.. قلي ايوه.. تفضلي.. حسيته مو طايقني ومل من قصتي ومابده نزعجه بدليل كلام رفيف بنت عمي.. قلي تفضلي عم بسمعك!!.. قلتله بدي أشوفك.. حكالي طيب انتي وين.. حكيتله انا بالتكسي بس انت قلي وين وباجي لعندك.. نص ساعة ووصلت لعنده.. اتفقنا اشوفه بكوفي شوب.. وأول ماوصلت كان عم بستناني.. انبسطت بس شفته.. وماسألت بشكلي ومنظري.. كنت كتير بشعة.. مو متحممة من يومين ولا مغسّلة حتى.. مو حاطة ميكب ولا لابسة متل الناس.. يعني كتير مشرشحة!.. كل جسمي أزرق وتحت عيوني كدمات بلون نيلي.. وجروح وتشققات بأيدي.. عدا إنه وجهي أصفر ومو آكله.. حتى ريحتي وسخة!.. شافني إستغرب.. شفت نظراته الخايفة أول ما شافني.. عرفت انه قرف.. أو خاف!.. حكالي أهلين.. قلتله تأخرت؟.. قلي لأ عم استناكي.. بس عفواً فيكي شي.. جسمك .. قلتله بعرف.. مو هاد موضوعنا.. أنا جاية أغني.. بدي تسمعني.. لو حبيت صوتي وقررت تساعدني بكون مشكورة.. ولو ماعجبك.. أنا رح أمشي ولا كأنك عرفتني من الأساس.. قلي ليه كل هالحدة ؟!.. أكيد رح يعجبني.. غني !.. بس قبل خليني أطلب شي نشربه.. قلتله أوكي.. كنت جوعانة وكنت بتمنى لو بهاللحظة يطلب أكل.. ماكان بدي أشرب أكتر من أنه أكول.. طلب شي نشربه وشربنا.. وبعد دقايق غنيت.. كانت أغنية فيروز.. قديش كان في ناس.. أول ماخلصت شفته عم يتطلع عليه مستغرب.. وقلي معقول.. معقول في عنا هيك مواهب ومدفونه وماحد بعرف فيها.. حكيتله عجبك صوتي.. قلي ماتوقعته هيك.. يعني.. ماتوقعت بنت متلك!.. حكيتله بعرف.. شكلي ومنظري وهيئيتي كلها مابتوحي إنه أنا بنت موهوبة وعندي صوت حلو!.. قلي مو هيك القصد أنا مابعرف شو صاير معك ومابدي أحرجك بس صوتك كتير حلو!.. قلتله رح تساعدني؟.. حكالي أكيد.. انتي أصلاً حلوة.. وملامحك رح تفيدك لتكوني مطربة.. أنا رح أعرفك على كتير شعراء وملحنين.. ورح يساعدوكي صدقيني.. بهاللحظة رن تلفونه.. رد عليه.. وحسيته انه توتر.. مابعرف ليه.. حكا اسم المحل.. وهوه متوتر.. ماعرفت ليه قال اسم المحل.. وقلي خلينا نحكي أكتر.. احكيلي عن حالك.. حكيتله كل شي.. حتى المشكلة اللي بمر فيها.. استغرب وحسيته خاف.. انه كيف!.. معقول البنت اللي قبالي ممسوسه.. فيها شي.. بس مانفر مني.. حسيته عشق صوتي.. حبه لدرجة انه ماقدر يهرب.. وشفت هالشي بعيونه.. بعد نص ساعة كان ساجد بالكوفي شوب.. استغربت.. قلي قومي.. بدك تهربي!؟.. عالبيت.. وشكراً لإلك غلبناك.. عرفت إنه ميس اعطت رقم ريّان لساجد حتى يتصل معه ويقله اني هربت ويحكيله اسم المكان ومايحسسني بشي.. ويمكن يكون هدده.. حكيتله قلتلي رح تساعدني!.. عكل حال شكراً إلك.. قلي ماتتدايقي بترجاكي.. بس ساجد ماخلاه يكمل كلام وسحبني من إيدي على البيت.. سكّر الباب عليه وأخد موبايلي وجاب واحد يحط ترباس للباب الخارجي ويغير القفول حتى ما افكر اهرب مرة تانية.. وصار الليل اللي بكرهه.. كنت معصبة وجانه وراسي رح ينفجر.. ماكنت متحملة ولا كلمة من أي حد وبس ببكي وبكسّر بكل شي بالغرفة.. كنت حاقدة على ميس.. حسيت انها مابتعمل هيك عشاني وبس لتثبت انها بتحب أختها وبتدافع عنها قدام اهلي.. حسيت اني بكرهها.. وماكان بدي تتدخل فيه أكتر.. سكرت باب غرفتي مرة تانية وقلتلهم مابدي حد يدخل.. بس ماما دخلتلي الأكل وأنا كبيته ومارضيت أكله.. طلعت وطفيت الكهربا.. وفتحت الشباك.. حسيت بريحة العطر مرة تانية.. وحسيت بهدوء فظيع.. شعور سيء تحس إنه في حد جنبك وحواليك بنص الليل وبغرفتك وعتختك وقريب منك ويمكن جواتك وفيك!.. ساكن ومعشش بعقلك وعم يتحكم بحواسك وتفكيرك.. وهمه الوحيد غرض رخيص منك.. غفيت وماوعيت على شي.. إلا لطلع الصبح.. وماكنت حاسة إنه فيني شي أو صار معي شي.. حتى جسمي ماكان أزرق كتير وكان خافف بدل مايزيد!.. فتحت عيني على صراخ.. كان في صوت صراخ برا.. ركّزت.. عرفت انه ميس اللي عم بتصرخ.. ماقدرت أتحمل وقمت بسرعة من التخت.. فتحت الباب وطلعت.. كان وجهها ازرق واديها كلهم خدوش قوية وأقوى مني بكتير.. ماما عم تبكي وساجد بضرب على وجهه وبابا بتفحصها.. وبقلها شو صار فهمينا.. قالتله صحيت شفت جسمي كله ازرق.. من جوا كمان.. كأنه كان حد عم بضربني طول الليل.. قلها ساجد حسيتي بشي وانتي نايمة؟.. قالتله ايوه حسيت بريحة قوية بأنفي وحسيت إنه الغطا ضل ينسحب مني طول الليل.. في حد كان عم بسحب الحرام من فوق جسمي وأنا أضل أرجعه.. طول الليل كنت عم بتغطى وببرد والغطا عم بنزاح من فوقي.. أنا خايفه.. يالله شو صابني.. قلتلها اللي صابني صابك.. امي حكت لبابا بترجاك شوف حل.. انا خايفه.. خايفة كتير على بناتي!.. وضلت عم تترجى.. ساجد قال خلص خلص!!!.. مابدي أسمع ولا صوت.. انتو مناح نحنا مناح.. مافي شي رح يصير.. رح تتحسنو.. صاحبي جاي اليوم مابدي تفضحوني.. قلتله هاد همك.! لتكون مرتاح أنا مو موافقة.. صرّخ عليه وصار يضربني.. وأنا بطلت قادرة أتحمل.. كنت بهاللحظة بدي أقتل نفسي وأرتاح بس حزنت على ميس لأول مرة بهالشكل.. وكنت متأكدة إنه كلام البصارة صحيح مية بالمية!
يتبع..
Mahmoud Salloum
