#النصف_الآخر_قصص
#النصف_الآخر_13 #النصف_الآخر
الحلقة الأخيرة (1)
دخلت ماما تبكي وأنا عم بشد على حالي وبصرخ وحاول تبخرني بشي بإيدها وتقرأ عليه كلام غريب وأنا بزيد صراخي وألمي.. سحب بابا الشي اللي حطته على راسي من إيدها وقلها بكفيكي تخبيص بعدّي هالشي عنها.. وضل هوه عم بمسكني وبحاول يهديني عطريقته.. قلي خلص أهدي مارح نزوجك ولا رح أجبلك هالسيرة.. متل مابدك رح بصير.. حكيتله أنا أصلاً أنا مش حلوة.. أنا بشعة.. شوف شعري كيف عم بوقع.. كله صار يهر ومافي حد رح يقبل فيه.. شوف تحت عيوني كيف أسود.. شوف وجهي الباهت.. أنا بشعة ومابنحب وماحد رح يحبني ولا يتزوجني.. اتركوني.. هوه قبلان فيني وبده ياني لا تزوجوني لحدا !!.. وكل ماحد يحاول يهديني أثور بزيادة.. لو جاملوني بشكلي أنجن أكتر.. ماكان بدي حد يحكي عني حلوة.. صرت أبكي وأكسّر بكل شي قدامي.. وأضرب وجهي.. يمكن كان عندي أو عنده إحساس إنه الشيخ جاي.. وصحي ووعي لمّا سمع سيرة الزواج.. وفي حد رح يوخدني منه.. ضليت ساعة وأنا عم بعمل هيك لحد ماوصل الشيخ للبيت.. كان شيخ بشرته بيضه.. ملتحي وباين انه متدين وتقي.. شافني.. ومن أول مالمحني وشاف كيف بتصرف وشو بحكي عرف شو فيني.. آدم سأله.. شو فيها ؟.. قله بتمنى الكل يلتزم الصمت واتركوني بحكي معها.. حاول يستفزني بالكلام.. ويسأل لأول مرة الشخص اللي فيني بكلام موجّه إله مو لإلي.. كيف حبيتها ؟.. قلتله مادخلك اطلع برا البيت.. صار يحكي مابطلع إلا لتقلي كيف حبيتها.. وشو بدك منها !!.. قلت مابدي انت واحد فاسق عديم أخلاق أطلع من بيتي.. حاولت أهزأه وأسبه.. بس كان صبور وهادي.. صار يقرأ عليه قرآن بصوت عالي وقوي وإيده على راسي.. وأنا صرت برجف وعيوني يدمعو لا إرادياً.. حاولت أضربه وأشده من ملابسه.. بس بعدني بهدوء وطلّع قنينة مي.. فتحها وشرّبني منها غصب عني.. صرت ابزقها بس كان عم بحطها بتمي غصب عني لدخلت كلها جوا معدتي.. شربتها كلها بعد مامسكوني.. وصرت أبكي وبكاي يزيد.. مرة أسماء الواعية وبقول ليه هيك بتعلمو فيه.. ومرة هوه بيحكي وبقول اتركوها أنا بحبها.. خلوني معها !!.. الشيخ قله اتركها مابتحبك.. مابدها ياك ومابتطيقك.. وانا بقله لأ أنا بحبها وحبيتها من صوتها.. صوتها كان أحلى من جسمها وأنا حبيته قبل لأشوفها.. حكاله هيه بتكرهك.. أفهم بتكرهك.. زاد صراخي وفجأة غمضت عيوني ونمت بدون كلام.. الشيخ استغل نومي.. وزاد قراءة القرآن عليه وكان طول الوقت يرش عوجهي من نفس المي.. كان البيت بهاللحظة مخيف.. وصحيت فتحت عيوني وأنا عم ببتسم.. شايفتهم كلهم حوليه ووجوهم قريبة مني.. كانت سعادتي بهاللحظة أكبر من لحظة السعادة اللي حسيتها أول يوم صارت الحادثة.. ويمكن أكتر.. قلي الشيخ الحمد لله على سلامتك يا بنتي.. شر وزال عنك.. شو حاسة ؟.. حكيتله مرتاحه كتير وحاسه اني مبسوطه.. الصداع راح.. والجو هدوء ورايق.. قال الحمد لله.. مرت ساعة.. كنا كلنا بالصالة أنا وبابا وماما وآدم وساجد وميس والشيخ كان معنا.. كنت بردانة وحاطة شرشف عجسمي.. وكان عم بحكي معي.. قلي انتي بتغني بالحمام يابنتي ؟.. حكيتله كل يوم وكل مابدخله تقريباً.. قلي طيب ماعمرك قرأتي دعاء الدخول للحمام؟.. حكيتله أبداً.. قلي طيب أدعية قبل النوم أو سوّر من القرآن.. حكيتله نادر هالشي.. قلي بتصلي ؟.. قلتله كنت وبقطّع ومهملة كتير.. حكالي هاد السبب.. إنتي بعيدة عن ربنا.. وكان في عين عليكي من جن عاشق.. سمعك وحبك وقدر يقرّب منك لأنك بعيدة عن الله.. وأكيد أي بنت بسنك ومتل أي بنت بهالوقت الصعب.. بهمها اللبس والطلعات والأصحاب والأغاني وكل ملهيات هالعصر.. بس للأسف بضل في شي مفقود جواتك ومو عارفة تمليه ولا عارفه شو هوه بسبب تلهّيكي وضياع وقتك بهالأمور.. وهالشي هوه القرب من ربك.. لو كنتي قريبة بشكل كافي منه ماكان صابك هالشيء.. بس قدّر الله وما شاء فعل.. ويمكن صار كل الي صار لحتى توعي على نفسك وترجعي لطاعته.. ربنا انقذك وسخرني لإلك لأقدملك المساعدة من خلال إيماني وتقواي.. ولازم تعرفي.. الجن العاشق سهل عليه يتملّك عقل وجسد الشخص البعيد عن ربه.. وهوه تملكك من صوتك.. ومن بعده قدر يتملك جسمك وروحك.. انتي مو أول وحدة بصير معها هيك ولا آخر وحدة.. في كتير بنات متلك وشباب كمان.. في أنثى عاشقة متل مافي ذكر عاشق من الجن.. وممكن تتملك الرجل بسهولة وتستحكم على عقله وإحساسه لتوهمه بنفسها وتكون معه كأنها زوجته.. قلي أنه قرأ عليه الرقية الشرعية وأنا نايمة وقرآن كتير لقدرت أشفى نهائياً ولو ما صار اللي صار اليوم كان مارضي يتركني.. طلب مني ألتزم بعباداتي وأذكر ربنا دائماً وخصوصاً وقت أخلع ملابسي وعند دخولي للحمام.. لأنه عيون الجن والشياطين بتكون مفتوحة وممكن تعجب بالإنسان وتفترسه وتتلبسه.. طلب مني أقرأ أذكار الصبح والمسا.. وأقرأ قرآن وما اهمل صلاتي.. فهمّني اللي صار بالتفصيل وقلي إنه كان معجب بصوتي ولأني انسانة مهملة لديني وعبادتي كان سهل عليه يتملكني ويتملك جسمي وعقلي لبعدين.. ويتهيألي على شكل إنسان بدون ملابس جنبي ليوهمني بحبه وكأنه زوجي.. وأشوفه من خلال قطة ماتت قتلتلها بإيدي وأنا مو واعية وبأمر منه.. ماكان يحب يشوفني بملابس أبداً لهيك كان يطلب مني أرمي ملابسي من الشباك وأوسخ سمعتي قدام الناس وأحكي عن حالي كلام أنا مو واعية عليه بس لحتى يضل إلي ومعي وماحد يوخدني منه.. وأهمل نفسي ونظافتي حتى ماحد ينجذب لإلي.. وأشم ريحة عطر جنبي وفوق أي غرض ممكن يكون معي.. وكل هالشي ليخليني أحس فيه إنه موجود وبطرق كتيرة.. إن كان بصوت نفسه ولمساته أو بجكيت أسود مو معروف لمين وعليه نفس ريحة العطر.. كلها مؤشرات منه لإلي ليقلي أنه هون جنبي ومعي عطول.. استغفرت ربنا وطلبت يسامحني على كل لحظة تقصير قصرتها معه.. وعرفت إني لو ماكنت ناسية نفسي وديني وتفكيري كله مشغول بصوتي وغناي وحلم الشهرة اللي ماصار بالأصل .. ما كان صابني هالشيء وقدّر يقرّب مني وكله نتيجة لتساهلي وعدم إهتمامي.. اعطاني الشيخ علبة صغيرة فيها مسك طاهر لحتى أدهن جسمي فيه قبل ما انام وكتاب لحتى أقرأ على نفسي المعوذات لأطرد الأرواح الشريرة والخبيثة ماتقربلي.. طلع من بيتنا.. ورجعتلي الحياة من جديد.. لأول مرة ماكنت حزينة على صوتي اللي نسلب مني من بعد ما اختي أخدته بإحساسها فيني وتأثرها بألمي وتخاطر روحها بروحي.. كأني ممنونة للي صار حتى ما أرجع أغني وأكسب أثم عكل كلمة بتطلع مني ليسمعوها البشر وبس لأكون مبسوطه.. آدم فرح وحس انه الروح نردتله وقلي رح نتزوج ورح نعمل عرس شرعي غير مختلط ورح يخمّرني ومايخليني أكمل دراستي بالجامعة ولا أشتغل ونضل سوا طول العمر.. كنت مستغربة من كلامه وتشدده الغريب.. كان متشدد لدرجة كنت متأكدة رح يجي اليوم اللي رح اختنق فيه معه.. وأنا بعرف إنه الدين ماكان عمره هيك.. لأنه الدين يسر ومو عسر متل ماعم يخنقني بكلامه.. تركته يحكي وكنت بقله بصير خير !.. أجا الليل.. كان هدوء والجو رايق.. صليت واستغفرت وبقيت بدعي ربنا وبتشكره لأنه ريّحني من اللي كان فيني.. وطول الوقت بصلي وبدعي للصبح.. وأنا منشغلة بالصلاة سمعت صوت الباب الخارجي فتح.. فتحت باب غرفتي وتطلعت.. لقيت ميس ماخدة شنطتها وطالعه من البيت.. سكرّت الباب وطلعت وأنا دخلت بسرعة لغرفتي واخدت تلفوني ورنيت لآدم فوراً.. صحيته وقلتله اختي هربت ساعدني أنا مرّبطة ومو عارفة شو أعمل.. قلي صحي اخوكي ليلحقها بسرعة قبل لتبعد عن البيت.. وأنا رح أتصل فيه لألحقه وأشوف إذا في حد ضاحك عليها وبده يأذيها لتهرب معه.. دخلت عند ساجد وصحيته.. قلتله اختي هربت انزل الحقها بسرعة.. صار يصرخ بصوت عالي لحتى أفهمه لوين ومع مين هربت.. قلتله لقيت مسج من واحد وكان طالب منها انها تهرب معه.. بجوز بعدها تحت.. صحي بابا وماما على صوت صراخه وفهمو اللي صار.. وطلب بابا يروح معه بس ماما تأثرت وفكّرت انه في حد خطفها وبده يأذيها.. لهيك قالت مابتطمن وانا لحالي خدوني معكم
يتبع..
Mahmoud Salloum
