#النصف_الآخر_قصص
#النصف_الآخر_2 #النصف_الآخر
الحلقة الثانية
دخلت لجوا ولسه بإيدي الجكيت الأسود.. كان بابا وساجد قاعدين على الكنبه وساكتين.. وقفت قبالهم وحكيتلهم شو تفسير الشي اللي صار ؟!.. رفع راسه ساجد وقلي مابعرف!.. كان صافن وعم يفكر.. وشايفه طرف وجه ميس من ورا باب غرفتها المشوق عم تطلع عالصالة.. قال بابا.. هاد أكيد واحد من ولاد الجيران.. شاف ساجد عم بحفر وبدفن القطة راح نبش وطلعها.. والقطة اللي سمعناها وحدة تانية مو هيه.. شو ناسين مشاغبة الولاد وقديش بزعجونا.. عم يلعبو معنا أكيد بس أنا رح أشكيهم لأهلهم.. كنت عارفة أنه بابا عم يحكي هيك حتى مانخاف لأنه اللي صار فعلاً غريب ومثير للشك والريبه والقطة نفسها مو وحدة تانية.. واليوم أصلاً جمعة والولاد بكونو بالبيت مع أهاليهم يا أما بكونو طالعين معهم يتنزهو.. كل شي بهاليوم كان مستهجن ومريب.. وخربطنا وحط قبالنا ألف علامة إستفهام.. ميس سكرت الباب وضلت زعلانة وتبكي.. أنا حاولت أنسى اللي صار وأدخل أجهز حالي لحتى يجو بنات عمي المزعجات.. كنت بحب أبيّن أحسن منهم عطول.. وشايفه حالي بصوتي ولو أهلي بعرفو بعلاقتي بآدم كنت شفت حالي عليهم فيه.. لأني عارفة مارح يلاقو واحد بأدبه وأخلاقه ودينه وكل اللي بعرفوهم من شباب متلهم وعلى هيئتهم.. أنا كملت مكياجي وجهزت وبعتت مسج لآدم قلتله آسفه بس فعلاً مو عارفة شو بدي أحكيلك خلينا نحكي المسا.. طنشني ومارد.. كنت عارفة أنه حساس ومزاجه صعب خصوصاً من بعد ماتخانقنا على شغلة الحجاب لأنه طلب مني أتحجب وأبطل غنى بإحتفالات المعهد.. بس كنت عارفة انه بالنهاية برضى وبرجع احسن من الأول.. طلّعت امي بابا وساجد من البيت بحجة بيت عمي.. وراحو مع بعض عالقهوة.. حطيت الجكيت على التخت وكنت صافنة ربع ساعة بيني وبين حالي لحد ماسمعت صوت مرت عمي برا.. كانت عم تحكي بصوتها العالي المزعج اللي بضرب على طبقة أدني ضرب.. سألت عني.. وسمعت صوت غريب معها ماكنت عارفة مين كمان غير بناتها.. قلت كلمة وحدة قبل لأطلع من الباب.. الله يجيرني من هاليوم.. طلعت للصالة ورسمت على تمي إبتسامة صفره وبلّشت سلام ومجاملات كذابة لبنات عمي رهف ورفيف.. شفت المره البصارة مع مرت عمي نداء .. لابسه فستان واسع متل فساتين الغجر ومبرقع وعلى راسها حطه.. وعتمها مدقوق بلون أزرق.. صفنت فيها واستغربت من امي كيف قبلت تدخل هيك وحدة.. بس كان بدي أكمّل مجاملات لحتى أكسب بنات عمي ويعرفوني على ريّان.. ميس ضلت جوا زعلانه برغم انها بتحب تشوفهم بس لقيتها فرصة لأحكي معهم بخصوص المطرب.. قلتلهم شفت صوركم مع المطرب ريّان.. من متى بتعرفوه.. غمزتني رهف وقالت.. بعدين بعدين.. عرفت انه مابدها تحكي.. دخلو التنتين فوراً لغرفة ميس بعد ما سألو عنها وشافوها جوا بتبكي.. سكرو الباب وانا بقيت بالصالة جنب امي ومرت عمي والبصارة.. كانت ماما بترحب فيهم وبتقول مابدي أضيّع وقت قبل ليجو زوجي وابني.. لهيك بصريلي وشوفيلي الفال.. كان معها شريطة صغيرة ملوّنه وكم حجر أشكالهم غريبة.. فردتهم وبلّشت تتطلع على أمي.. قالتلها.. في عين.. في عين عليكم.. حكتلها عين شو.. قالتلها شفت بفالك في عين كبيرة.. حكت امي كيف يعني في حد حاسدنا !.. قالت لأ.. الشي مو واضح لإلي بس في شي فعلاً غريب ومبين واضح متل العين.. ومحطوطه فوق بيتكم تماماً.. حكت بسم الله عين شو.. حكت مرت عمي خليها تكمّل قلتلك حكتلي شغلات صح.. صح كتير.. رفعت إيدها البصارة وقالت بس!.. الموضوع مافي مزح.. في عين قوية عليكم.. في شي عم بلف حوالين بيتكم من فترة قصيرة.. وباين انه هالفترة رح تتطور كتير لقدام.. العين عم تكبر معي.. بس مو قادره أعرف الشي ولا أفسر اللي شايفته !.. امي بلعت ريقها وقالت اعوذ بالله.. وضحيلنا الله يستر عليكي.. حكت في بنت من بناتك سبب بوجود هالعين.. شفت المكتوب بقول انه بنت.. بنت وحدة.. والبنت من بناتك!.. انتي عندك كم بنت ؟!.. قالت هاي اللي قدامك وبنتي ميس جوا مع بنات عمها.. بترجاكي شو القصد من كلامك.. وضحي.. حكت نادولي البنت اللي جوا.. طلبت مني أنادي ميس.. وأنا بهاللحظة بلّشت أخاف وقلبي يدق بسرعه كتير.. كلامها كان فيه شي معقول من بعد كل الشغلات الغير معقولة اللي صارت الصبح واللي مالقيتلها تفسير واحد لهلأ.. فتحت الباب وناديت ميس.. قلتلها تعي بسرعه.. قامت مع بنات عمي ودخلت عالصالة.. حكتلها البصارة قربي لعندي يابنتي.. ميس خافت.. بطبيعتها بنت طفولية وبريئة وبتخاف من أي شي.. عكسي قوية الشخصية وأكبر من عمري.. حكتلها امسكي حجر من هدول الحجار وارميهم بين الحجار اللي انا رميتهم.. ميس اتطلعت بأمي خايفه وقالتلها ماما شو هاد؟!.. حكتلها امي ردي عليها !!.. مسكت حجر ورمته.. صفنت المره وحكت أنا مش متفائلة.. العين ماقرّبت من الحجر تبع بنتك ميس.. بنتك التانية خليها تقرّب مني شوي.. أنا بهاللحظة توترت.. وتطلعت عبنات عمي وقلتلهم بهدوء.. امك من وين بتجيب هالأشكال ؟!.. ضحكو بصوت واطي وأنا مسكت حجر وعاملة نفسي مو سائلة ولا خايفه ورميته وانا بضحك.. وبعد ثواني رفعت البصارة إيدها ومسكتلي إيدي وحطتها على الحجر وشدّت عليها.. أنا صرخت وقلت شو عم تعملي وجعتيلي ايدي.. تطلعت عليه بنظرات غريبة ومخيفه وبلّشت تعبس وتشد على حواجبها.. أنا ارتعبت من تصرفها وحكيت لأمي مشان الله بكفي قليلها تبعد إيدها عني!.. حاولت اسحب ايدي بس كانت شادة بكل قوة.. وشوي وشالتها وقالتلي.. العين عليكي يابنتي!.. العين عليكي!.. حكيت استغفر الله.. انتي شو عم تخبصي.. عين شو.. وعليه شو!.. امي قالت احترميها بنتي وخليها تكمل.. قالتلها شو شفتي احكي بترجاكي.. قالت بنتك عليها عين قوية.. وباين انه .. انه.. حكتلها امي انه شو !.. احكي!.. قالت باين انه رصد !.. امي توترت وصارت عم تعرّق.. ومرت عمي صفنت فيه وببناتها وبان انها خافت.. امي قالت شو عم تحكي.. رصد شو الله يكفينا الشر!.. حكتلها في رصد على البنت.. وباين انه من ذكر.. في ذكر بحياتها.. عينه فيها وبده ياها.. هوه ذكر.. وغير هالشي العين كانت قريبة منها كتير بس بنفس الوقت عم تتجه للحجر اللي رمته أختها.. يعني اختها الها علاقة بهالموضوع.. ميس قالت انتي عم تخبصي.. خلصينا بقى وشيلي هالمحرمه من قدامنا وبكفي تخبيص شو شايفيتنا هنود !.. ضحكو بنات عمي ومرت عمي سكتتهم.. وأنا بلّشت أفكر.. رحت بسرعه لجوا.. وجبت الجكيت الاسود.. اعطيته للبصارة وقلتلها تفضلي.. هاد شي مابعرفه لقيته الصبح بخزانتي.. عليه عطر رجالي أنا بحياتي ماشميته على حدا.. شو بتفسري هالشي؟!
يتبع..
Mahmoud Salloum
