الشرفة ومابعدها – قصة رعب لمحمود سلوم - Mahmoud Salloum
الحلقة الرابعة (4)
اخدتني ماما من عمارة الشب ومن الشقة اللي دخلت فيها تحديداً على بيتنا.. وأنا ماعدت عارفه شو لازم احكيلها لأني عارف انها مش رح تصدقني بس هددتني لو قررت اطلع من البيت رح تحكي لبابا عن كل شي.. ورح تقله اني بعرف شب.. أنا حلفتلها وقلتلها اني مابعرف شب ولا شي.. بس ماقدرت أفهمها اني عم بشوف أموات.. أنا تأكدت أني عم بشوف أموات من وقت ماطلبت مني المره اني ادخل ايدي براسها.. دخلت ايدي براسها وطلعت من جهة تانية.. هاد الشي أكدلي أني داخلة لغز كبير.. وأنا بالذات.. ليه هيك مابعرف.. بالوقت اللي كنت فيه مع ماما بالبيت.. حسيت بصوت البنت اللي شفتها آخر مرة تحت البيت عم تبكي.. وكان صوت بكاها قريب من البيت كتير.. كنت عم بكنس الغرفه ووقفت وسرحت وصرت أدور على الصوت بكل مكان.. ماما كانت بهاللحظة عم تتطلع عليه من بعيد بس مش مخليتني اشوفها.. وفجأة حكتلي عشو بتدوري.. قلتلها ولا شي.. وسألتها انتي مش سامعه صوت قريب؟ حكتلي صوت شو؟ قلتلها صوت بنت عم تبكي أو شي متل هيك.. قالت بنت صغيرة؟ حكيت لأ بنت كبيرة بعمري هيك مش سامعه شي متل هيك؟ حكتلي لأ مافي صوت.. بس الصوت كان قريب كتير وأنا كنت سامعه.. طلعت على البرنده وصرت ادور على الصوت.. وماكنت اشوفها.. الشي اللي رماه الشب ضل معها وانا كان بدي أخده بس لولا ماما ما لحقتني كان شفتها واخدته بس هيه حكتلي أنا رح أطلع بحياتك مرة تانية ومانسيت هالجمله.. ماما صارت تلاحظ التصرفات الغريبة اللي بتصرفها وبلشت تقلق وتخاف عليه .. وانا بلشت اخفف من تصرفاتي حتى اكسبها وحتى أشوف شو بده يصير.. تصرفت عادي.. وباللحظة هاي كنت عارفه ومتأكده انه ماما مارح تسكت على الشي اللي صار.. ورح تحكي لبابا.. برغم ظلمه وقسوته وبخله علينا.. الا انها على طول صافه معه ضدي.. وبتحكيله كل شي.. بداعي الخوف وانه هوه بقسوته هاي وشدته بكون خايف علينا.. اول ما اجو خواني من المدرسه.. اخدت اخي سفيان على غرفتي.. وحكيتله بدي اقلك شي بس ماتحكي لماما.. اعطيته مصاري اله .. واعطيته مفتاح البيت.. وقلتله بدي ياك تروح على السوق اللي ورا الجبل.. بس ماتخلي بابا يشوفك ..بعد عن المحل اللي بشتغل فيه وروح من طريق تاني.. وخد هاد المفتاح.. انسخ منه نسخه.. وارجع بسرعه قبل ما يجي بابا.. هوه طلع من الغرفه وأنا شفت اختي اسراء ورا الباب.. وكان عم تتسمع علينا.. وعرفت شو اعطيته.. وبطبيعتها بتحكي كل شي بتشوفه.. بهاللحظة قلت رح تحكي كل شي.. اخدتها على الغرفه واقنعتها انه في شي خطير عم يصير.. لو حكت شو اللي صار رح تقلب مصيبة بالبيت وأنا بدي أحل موضوع ومشكلة كبيرة.. بعد ما خوفتها حسيتها اقتنعت انه مارح تحكي بس ماكنت متأكده من هالشي.. سفيان طلع من البيت وراح نسخ نسخه من المفتاح ورجع قبل بابا.. بابا وصل البيت بعده ودخل ليتغدى.. اول كلمة حكاها.. انا نسيت اليوم اسكر المفتاح ورح اسكره بكرا.. حدا طلع من البيت.. انتي أو بنتك؟ ماما حكتله لأ.. وانا صرت أنزل حواجبي لتحت حتى ماتحكيله.. بس اول مادخل يغير ملابسه دخلت لعنده وقالتله اني طلعت.. وحكتله البنت حركاتها مش طبيعيه وفي شي مخبيته عنا.. بابا نجن ودخل لغرفتي وصار يصرخ عليه ويقلي شو مخبيه وشو بتعرفي احكي.. بس انا ماقدرت احكي شي.. وهوه اصر عليه..حكالي بتعرفي واحد ساكن هون مش هيك.. انا كنت حاسس بهاد الشي.. ولأنك مابتطلعي من البرنده أبداً.. شقته اللي قبالنا مش هيك.. اذا مابروح أكسر الباب عليه ما بكون أنا أبو سفيان.. ضربني ووقعني على التخت.. وطلع بسرعه من البيت.. وأنا دخلت عند ماما حكيتلها انتي مابتعرفي تسكتي والله لأخلصكم مني.. راح بابا وفتح الباب وطلع من الشقة وانا رحت وراه ركض.. حكيتله بابا استنى ماتتهور.. وصل العمارة وطلع الطابق التاني.. وصار يخبط على باب الشقة التانية.. أنا كنت خايفه كتير وماكنت قادرة أحكي شي.. تذكرت فلاش باك سريع براسي كلام المره اللي حكتلي ياه.. انه انا عم بشوف اموات ورح يصير معي شغلات كتير لازم اشهد عليها.. شو اللي رح يصير.. ولازم اكون مستعدة.. واللي عم بشوفه رح اشوفه انا وبس ومش لما يكون معي حدا.. يعني الشب اللي بشوفه لو ميت مارح يطلع ويفتح الباب.. ولا رح أقدر أشوفه مع بابا.. بعد دقايق وبعد ماتعب بابا وهوه يضرب الباب.. قلي اذن هاي هيه الشقة الحقيقة اللي كنتي بدك تروحيها مش اللي جنبها.. وبعد دقايق فتح الباب.. أنا خفت كتير وبلش قلبي يدق.. طلعت مره منه وكان شكلها غريب كتير.. طلعت من الشقه وحكت لبابا.. انت مش حاسس انك خلعت الباب؟ مين حضرتك وليه عم تدق علينا بهالطريقة!!! قلها وينه ؟ وينه احكيلي.. حكت مين؟ قالها الشب اللي ساكن هون.. قالت مافي شباب هون.. انا عايشة لحالي.. دخل بابا جوا البيت يصرخ وهيه صارت تصرخله بطريقه مخيفه.. انا دخلت وراه وحكيتلها اسفه بنعتذر.. وفجأة شفت صورة الشب مبروزة بصورة ومحطوطة على الطاولة.. وكانت قريبة كتير على وجهه.. صفنت فيها.. وبابا جوا عم بدور وهيه معاه.. وأول مارجع بابا شافني عم بتطلع على الصورة.. قرب مني ومسكها وقالي هاد هوه صح؟ سرحانه فيه ياحقيرة انتي بدك تفضحينا!! مين هاد.. حكتله المره احترم حالك هاد الشب ميت من خمس سنين.. اطلع من هون أحسن ما اجبلك الشرطة.. حكا بابا ميت !! كيف بدي أتأكد.. قالتله روح شوف شهادة الوفاة ولا اجبلك ياها عشان تتأكد.. ومسكت التلفون وصارت تهدد لو ماطلع رح تتصل بالشرطة بس بابا اقتنع وطلع.. ورجعت انا على البيت ببكي.. بدخولي على البيت شفت كتير شغلات غريبة ومن الصورة ومن ملامحه قدرت افهم كتير شغلات مخبيه.. بس كان في شي بحكيلي.. انا لازم أرجع مرة تانية لهون.. وأنا وطالعه من البيت مع بابا وعم ببكي.. شفت البنت اللي طلعتلي بالليل.. وكانت واقفه عند الباب بالزبط.. وجهها مشوه وعم تتطلع نظرات مرعبة عليه.. ومسكره الباب وواقفة تماماً.. وماسكه شي بأيدها وشاده عليه.. بابا ماوقف حكي وغلط عليه.. وأنا مش قادرة ما اشيل عيوني عنها.. وقفت بعيد عن الباب وهوه كان رح يدخل.. دخل من الباب وفات جواها.. وطلع وكأنه مش شايفها أصلاً.. أنا صرخت بالشارع ووقعت بس شفت هالمشهد.. وبابا رجع مرة تانية وقلي شو صارلك! حكيتله خايفه كتير.. قلي ليش حاطه ايدك على وجهك شو صرلك.. عيوني كانت بإتجاه الباب وشايفه البنت واقفه.. قلي وين عم تتطلعي شو في عند الباب.. حكيتله في بنت واقفة.. بهاللحظة ماقدرت أكذب.. لأنه المنظر اللي شفته ماكان يخليني قادرة أزيف الحقائق أو أخبي.. حكالي مافي بنت.. شو صارلك احكي!!! وانا بصرخ بنص الشارع والناس بلشت تتجمع عليه.. البنت صارت تضحك وطلعت الشي اللي بأيدها وكانت ورقه.. بلشت تقرأ بصوت عالي مسموع بالنسبة لإلي أكتر من صوت بابا والناس اللي حواليه.. وقالت اسم شارع.. حي المغاربه بيت رقم 7.. هناك السر.. وهاي الرسالة من كنان .. كنان.. وكررت اسم كنان مرتين.. وبعدها اختفت.. انا برغم صراخي بس كلامها علق براسي وقدرت افهمه منيح واحفظه.. بابا طلعني على البيت وماما شافتني صارت تصرخ وتحكي شو صار للبنت.. بابا قلها البنت مش طبيعيه.. دخلوني نمت.. وتركوني لحالي لحد ماهديت.. سجلت الكلام اللي قالته البنت على تلفوني حتى ما انساه وخبيت المفاتح جوا المخده بالصوف.. وقررت اروح على المكان اللي قالته لأعرف شو هوه السر.. اذن الشي اللي رماه الشب هوه رسالة وكان مكتوب فيها هيك.. انا ماكنت فاهمة ولا شي بصير معي.. بس كان بدي أوصل للآخر لأكتشف أنا ليش بالذات صار معي هيك.. وليش أنا الوحيدة اللي عم بشوف الأموات.. ضليتني تاني يوم نايمه بغرفتي.. بابا لأول مرة حسيته خايف عليه وقال لماما طلعيها على السوق.. وتعالو على المحل لو بدكم.. ويمكن أتطمن شوي بس عرف انه الشب ميت.. بس ثقته انهزت اكتر وبس اخف من الصدمه رح يخنقني أكتر من اللازم.. طلعت انا وياها.. وانا ماشية بالشوارع.. ولأول مرة بحياتي بلشت أشوف ناس عم بتطلعو عليه نظرات غريبة.. كل ربع ساعه او عشر دقايق أصدف شخص غريب شكله مخيف بيتطلع عليه.. وتحديداً بكونوا واقفين بأمكان غريبة متل البنت اللي طلعتلي وكانت واقفة بعرض الباب وبابا مش شايفها.. كنت بشوف ناس ماشية بالسوق وماما جنبي وبعترضو هدول الناس.. يعني بمشو ومابشوفوهم وبدخلو فيهم وهمه مش حاسين بهالشي.. كنت شايفه وساكته.. وعارفه انه الأشخاص هدول أرواح موجودين بكل مكان.. إذن في شي تاني اكتشفته.. اني مش بس بالحي هاد انا عم بشوف الناس الميته هدول.. لأ وبكل مكان في قصة لروح معينه ماتت بحادثة وعم اشوفها.. معقول اللي صار معي في اله حكمة.. كنت متأكده انه في شي رح يصير بعدين.. والسر بلش من عند كنان والبرنده ورح يكتمل من عند حي المغاربه اللي قالت عنه البنت المشوهه
يتبع
إستبرق 💜
