الشرفة ومابعدها – قصة رعب لمحمود سلوم - Mahmoud Salloum
الحلقة التاسعة (9)
حكيت مع تيم.. قلي لازم نتصرف.. وأول شي نعمله أنه نخلع باب بيت ردينه.. مابعرف شو كان بفكر بس هوه كان حاسس بشغلات أنا مش حاسة فيها.. ولأني طلبت مساعدته بعد كلام إبتسام معي.. رحت أدور على شغل.. وبرغم أني مادرست جامعه إلا أنه الحظ نفتحلي فجأة ولقيت شغل بمحل ملابس براتب منيح.. وأنا ماشية طول الطريق بفكر باللي وصلتله.. وبالأشخاص اللي بحياتي واللي بظهرولي.. حتى اللي مابعرفهم.. كنت أشوف أرواح قدامي بس مش خايفه لأني عارف مارح يأذوني ولأني كمان عارفة انه قصتي والمطلوب مني مش معهم.. رجعت على البيت وبشّرت ماما.. انبسطت كتير بس بحياتها ماكانت متوقعه انه بابا يعمل معنا هيك.. كانت متوقعه انه يعمل أي شي الا انه يطلقها وينسانا وخروجه من عمارة إبتسام الساعة 2 بالليل خلاني أشك أكتر.. دوّرت على تيم بعد ماخبرت ماما اني توظفت.. ولأني شفت كنان من البرنده عم ببكي.. هالشي صدمني وصرت أأشرله.. ما كان يتطلع عليه حتى.. ماكنت عارفه شو لازم أعمل.. وقفت محتاره بالبرنده عم بأشر.. وبعد ماعجزت.. ماما مسكتني من ايدي وحكتلي.. انتي شو عم تعملي؟ لمين عم تأشري؟ حكيتلها كنان عم يبكي ماما.. حكتلي وينه هوه.. قلتلها بالبرنده قبالنا.. ضلك مصدومه وعم تتطلع فيه وانا عم أأشرله.. خافت عليه كتير.. حكتلي أنا مش قادرة أتصور انه انتي هيك يابنتي.. انا خايف تكوني لاسمح الله!! حكيتلها نجنيت.. مرضت؟ بس انا مش مريضه.. انا شايفه كنان قبالي وشايفه ناس كتير.. في شغلات رح تخليكي تصدقي بس بوقتها مش هلأ.. وطلعت من البيت وصرت ادور على تيم بس مالقيته.. بابا كان مختفي عن الأنظار لفترة.. وماحد عارف وينه حتى المحل تبعه كان مسكر.. وهالشي خلاني أشك أكتر.. قلت انا خذلت كنان.. وانا مابدي أحس بهالشي.. لازم أحل الموضوع واعرف المخبى ولو بدون تيم.. بهاللحظة رحت على حي المغاربه مرة تانية.. ودخلت من نفس المكان.. وقفت عم بتطلع حواليه وعامله نفسي مش خايفه.. قربت من البيت.. قربت كتير.. لحد ماوصلت إيد الباب.. ولما مديت ايدي عليها.. في شي ضربني ورماني لآخر الحيط.. أنا نصدمت وصرت أقول مين هون؟! عم تضربوني عشان ما أدخل.. بدكم تمنعوني أدخل.. أنا مش خايفه منك سامعني..!! وفجأة ظهرلي الزلمة مرة تانية من ورا حيط البيت.. وضل عم يقرب مني.. ويقلي أنا نبهتك ماترجعي من هون.. بس انتي عنيدة ورح تدفعي التمن.. وقرب مني كتير.. وأنا حاولت ازيحه أو أضربه بس للأسف كنت عم بضرب خيال.. ايدي عم تطلع من جسمه بدون أحس اني عم بضرب شي مادي أو شي جسم.. ووقف قبالي ونزل راسه.. كان بدون لون كأنه ورقة محروقه.. قرب مني ونفخ بوجهي.. وفجأة أغمى عليه.. بهاللحظة ماعدت وعيت.. صحيت واتطلعت لقيت حالي بنفس المكان بس راسي عم بوجعني.. ومش قادرة أتذكر اللي صار.. حسيت نفسي فقدت الذاكرة تماماً.. ومش متذكرة ولا شي.. حتى كنان كنت ناسيته.. بس تذكرت النفخه اللي نفخها الزلمه بوجهي.. قمت بسرعة وصرت أشوف البيت كأنه مقبره.. هربت منه وصرت اركض بالشارع لحد مالقيت تكسي.. صاحب التكسي انتبه عليه انه فيه شي.. وحكالي انتي لوين رايحه؟ لأني ماكنت قايلتله على شي.. كنت بهاللحظة فاقدة الذاكرة تماماً.. وماعرفت شو بدي أعمل.. حكيتله نزلني نزلني.. بهاللحظة وانا ماشية شافني تيم مرة تانية بالشارع وقرب مني حكالي شو عم تعملي هون..؟ حكيتله عفواً مين انت؟ حكالي استبرق انا تيم شو صاير معك وليه هيك عم تمشي بالشارع.. حكيتله مين استبرق؟ قلي انتي رحتي البيت؟ حكيتله انا مش متذكرة شي.. اخر شي بتذكره اني رحت بيت وواحد نفخ بوجهي وخوفني وصحيت مش متذكرة ولا شي.. قلي ليش ليش!! ليش عملتيها ورحتي بدوني.. حكيتله انت بتعرفني صح؟ حكالي تعي معي بسرعة.. رحت معه على بيتنا.. فتحتله ماما.. دخلني.. حكالها على كل شي وانا سمعته.. صارت تبكي وتحكي انا نبهتها بلا من هالشغلة.. ماكانت ترد.. يالله شو بدنا نعمل.. بنتي فقدت الذاكرة.. حكالها يمكن الأشي خطير أكتر من هيك.. لازم استبرق توعى على كل شي وتتذكر كل شي.. هاي لعنة من واحد ميت.. روح شريرة نفخت فيها شي ويمكن مابدها ياها ترجع مرة تانية لهيك خلوها تنسى ماضيها وحاضرها وكل شي بحياتها.. دخلت غرفتي بعد ماسمعت كل شي.. فهمني تيم اني كنت بشوف اموات وفهمني بابا شو عمل فينا.. ورجع عادلي كل شي صار هوه بعرفه عني من لحظة ماعرفني لهلأ.. حكيتله انا مش عارفه أتذكر.. ارجوك اي شي بتعرفه تعال احكيلي ياه.. ساعدني.. قلي رح أساعدك ورح أساعد كنان كمان.. بس لازم تيجي معي على البيت مرة تانية بكرا الصبح.. لازم هالشي.. والباقي عليه أنا.. تاني يوم الصبح قمت على البرنده.. شفت كنان.. صرت أتذكر شوي شوي.. شفته عم بتطلعلي وبدون مايأشر.. كأنه حزين على اللي صارلي منه.. بس أنا ماكنت فاهمة شي حتى لما اجت ماما جنبي.. حكتلي شايفيته هلأ.. هاد السبب باللي صارلك وصارت تفهمني من جديد كل شي.. بقيت هيك لحد ما اجا الليل.. رنلي تيم وحكالي أنا داخل العمارة الساعه 1.. واتفقت مع حد من صحابي نفتح الباب بطريقتنا.. ضليتني سهرانه طول الليل.. ولما صارت الساعة 1 طلعت على البرنده.. كان كنان مش موجود.. حاولت أتذكر شي بس كنت ماشية حسب اللي قلي ياه تيم.. برغم اني مش عارفة شي.. اتطلعت من البرنده لقيته دخل هوه صاحبة.. دخل على العمارة وفتح باب ردينة بالطريقة اللي بستخدموها الحراميه.. ودخل الشقة.. كانت فاضية.. وما استفاد شي.. بس باللحظة اللي كان بده يطلع فيها من الشقة سمع صوت فبيت إبتسام.. ولأنه عتمه ماكان شايف شي من العين الساحره.. بس حس بحدا دخل الشقة.. قله لازم ندخل البيت من البرنده.. وبالفعل دخلوا الشقة من البرنده من خلال برندة ردينة وبدون ماحد يحس وصلوا برندة إبتسام.. شفتهم لما دخلوا بس ماكنت فاهمة شي.. وشايفة بس كنان واقف بعربايته وهمه مش حاسين بوجوده.. دخلوا الشقة.. وبعد نص ساعة شفتهم نزلوا من باب العمارة.. أنا كان بدي أعرف اللي صار من بعد اللي فهمته منه.. بس هوه ماحكالي شي للصبح.. رنيتله مارد عليه وقلي بكرا باجي عندك.. طلع الصبح.. واجا لعنا.. فتحتله ماما.. قلها بدي أشوفها.. حكتله يا ابني ماتفضحنا أنا لسة مطلقة جديد ومابدي حدا يشوفك داخل فايت عنا.. حكالها بس دقيقة وحدة ورح اطلع.. خلي الباب مفتوح.. ماما سكرت الباب وقعدت انا وياه.. ماما دخلت على المطبخ.. حكالي شفت أبوكي مع إبتسام بغرفة النوم.. عم بخون أمك! حكيتله شو! انا ناسية شكله ومش متذكرة شي.. بس كيف هيك.. حكالي ماتحكي لأمك هالشي.. ابوكي بعرف إبتسام في وراهم شي.. وغير هيك صاحبي دخل الغرفة التانية.. همه كانوا مسكرين غرفة النوم ونحنا استغلينا الفرصة وفتشنا البيت فوقاني تحتاني.. لقينا البوم صور.. جبتلك ياه.. شوفيه.. انا صرت أتطلع بالألبوم.. وقلبته كامل.. شفت كنان مع ابتسام بصور .. وشفت زلمة تاني حسيت انه زوجها.. حكالي دققي منيح في صور تانية لناس تانين.. هيه محتفظة فيهم لحد الآن مابعرف ليه.. يمكن تعرفي حدا.. انا صرت اقلب اكتر بالصور.. ووصلت لصورة صدمتني.. ورجعتلي ذاكرتي.. حكيتله انا بلشت أتذكر.. هاد الزلمه اللي نفخ بوجهي بالبيت..!! هاد هوه بالزبط.. حكالي متأكدة قلتله اه.. لسه متذكره وجهه.. بلشت ذاكرتي ترجعلي.. وحسيت انها لعنه مؤقته بس لحتى ما ارجع على البيت.. وتذكرت صوت براسي.. لأول مرة بحسه.. قلتله الزلمه هاد هددني وقلي المرة التالتة رح تنقتلي.. بس لتعرفي اني فيه أأذيكي.. هلأ تذكرت كل شي.. وصرت أبكي.. قلي هاد الزلمه في اله صور مع وحدة شوفيها.. اول ماشفتها.. قلتله هاي ردينه!! هاي المرة الميته اللي نقتلت مع ابنها واللي كانت تظهرلي.. قلي خلص عرفنا مين الزلمه اللي محاوظ المكان بالبيت واللي أذاكي.. هوه زوج ردينه.. حكيتله شو بدنا نعمل انا هلأ تذكرت انه هددني وسامعه لسه صوته براسي.. قلي لازم نروح عالبيت حالاً.. وانتي معي ماتخافي من شي.. ماما جابت القهوة واحنا طلعنا وسكرنا الباب ورانا وصارت تنادي علينا.. بس أنا مارديت عليها.. طلعني بسيارته وأنا ماشيه بالسيارة شفت بابا طالع مع إبتسام بسيارتها.. وحكيت لتيم .. بابا معها لوين رايحين.. قلي طريقهم متل طريقنا.. وين ممكن يكونوا رايحين.. صرنا نلحقهم بدون مايشوفونا.. وفجأة وصلنا البيت وهمه نزلوا للحي هاد.. وأنا مصدومه.. حكيت مش معقول.. بابا جاي هون.. قلي ماتخافي وتعي معي لازم ندخل البيت ونعرف السر.. نزلنا وراهم من السيارة بعد دقيقتين.. وهمه دخلوا من الباب الرئيسي وسكروه منيح.. وأنا وتيم دخلنا البيت من الشق المهدود.. ولما وقفنا عند الباب حسيت حالي تعبانه ورح يغمى عليه.. تيم قلي تماسكي وصلنا ورح ندخل.. ولما اجا بده يفتح الباب سمعت صوت من جنب الحيط ورا بقلي..
يتبع
إستبرق 💜
