قصة قرأتها واعجبتني
*كل فترة واحد زميلي ينزل صورته مع زوجته وابنه وهما بيخرجوا وبيتفسحوا في اماكن مختلفة ... وانا كل شوية اعمل لايك وانا مبسوط بالعلاقة دي وبجمال الصور .
*ابن صحبي دا بيحبني شوية فابوة طلب مني اننا نخرج سوا ... المهم خرجنا وروحنا قاعدنا في كافية شربنا القهوة وكله تمام بعدها بشوية قالي يلا نمرجح عمر .
*راح عند شباك التذاكر ولاقيته جايب تذكرتين لكل لعبة
استغربت من التذكرتين بس متكلمتش!
* المهم اول ما وصلنا للالعاب اخد زوجته وابنه وركبهم الالعاب كلها وانا واقف مندهش من طريقة التعامل دي ...
للحظة معينة حسيت اني خارج مع صحبي وابنه وبنته.
*الجميل ان ملامح زوجته كانت مبسوطه يمكن اكتر من ابنها
وهي بتلعب زي الاطفال مع ابنها وصحبي واقف يتفرج عليهم
وبيضحك .
*عدي اليوم ووصلناهم للبيت ورحت انا وصحبي نقعد علي القهوة ... الفضول اخدني اني أساله عن مفهوم للزواج ... صاحبي قالي :-
* العودة اشوف بابا كل ما يجيب شوكلاتات او حلويات
لاخويا الصغير لازم يجيب لأمي ... وفي مرة اخويا سأله
وهي ماما صغيرة عالحاجات دي ؟
* بابا ضحك وقاله دي بنتي الاولي انا عندي تلات ولاد وبنت .
واستغل الموقف وقعد يشرحلنا يعني اية "مراتك وبنتك"
*الست مهما كبرت لازم تحس انها طفلة انا اتجوزت امكم وهي 21 سنة يعني لسة مشافتش الدنيا بقيت اعرفها واعلمها الحياة من اول وجديد ... عاشت معايا اكتر ما عاشت مع اهلها
اتعودت اجبلها الحاجات دي بمناسبة ومن غير مناسبة ... كل فترة لازم تحس انها مكبرتش وانها لسة اول طفلة وبنت وست في حياتك ... الست مبتعجزش بس اللي حواليها هما اللي بيعجزوها ... وطول ما انت بتعامل حبيبتك علي اساس انها بنتك هتفضل تحبها وهتفضل تحبك حتي لو بقيت راجل عجوز هتفضل في نظرها أجمل راجل فالدنيا وهتفضل هي أجمل بنت في حياتك حتي بعد ما تعجز وسنانها تقع والتجاعيد تسكن كل ملامحها هتفضلوا تحبوا بعض لانكم حبيتوا بعض بصدق .
*الخلاصة
قبل ما تختار شريك حياتك لازم تفكر في طبيعة الحياة معاه
هتبقي ازاي بعد الجواز ... كتير من الرجالة المصريين بيستغربوا من شكل البنت بعد الجواز وخصوصآ بعد ما تخلف ... ببساطة الموضوع زي ما هو تغير جسدي
لكنه في الاصل تغير نفسي بيأثر عليها البنت لو حسيت
انها لسة بنت حتي بعد الجواز هتفضل مهتمة بشكلها ومظهرها ... هي دايرة واحدة بين الحب والاهتمام واحساس انها لسة بنت صغيرة رغم كل شئ .
*مش حابب اكون ظالم واقول ان المسؤلية كلها علي الراجل
بالعكس هي علاقة مشتركة ... لو الراجل فعلآ بيحب حبيبته
هيحافظ علي النقطة دي ولو البنت عرفت وفهمت جوزها كويس هتعرف ببساطة تطلع الإحساس الفطري للراجل
كونه اب في البداية سواء ليها او لاولادهم .️
~ منقول ~
