#الحاسة_رقم_سبعة .. الحلقة السابعة😱😱

#الحاس��_رقم_سبعة_قصص
#الحاس��_رقم_سبعة_7 #الحاس��_رقم_سبعة
الحلقة السابعة

تركت أمي وهديل بالمطبخ وحكيتلهم خليكم حتى أطلع أشوف مين في فوق.. أخدت معي سكين من المطبخ وامي خافت وصارت تحكيلي دير بالك عحالك أنا خايفة.. قلتلها لا تخافي.. حكتلي إتطلع منيح عشان نظرك الخفيف.. طلعت لفوق وحسيت في صوت بغرفة البنات.. مشيت شوي شوي.. وبدون ما أطلع أي صوت.. مسكت السكينة لأدافع عن نفسي في حال طلعلي حدا بوجهي.. فتحت الباب بأقصى قوة.. ما لقيت حدا.. دخلت صرت أفتش بكل مكان بالغرفة.. بالخزاين ورا الستاير تحت التخوت.. مافي حدا!! .. خفت وأنا عم بدور يلتهي وينزل أو يهرب كونه مافي حدا بالبيت أبداً.. أو يكون متخبي بغرفة تانية.. طلعت بسرعة من الغرفة .. وتوجهت لغرفتي.. بسبب صغر حجمها ماشفت فيها حدا أبداً.. سكرتها وتوجهت لغرفة ماما وبابا.. فتشتها منيح .. ماكان في حدا.. استغربت.. هديل بتحكي انها شافت الشخص الي تزوجته !! توقعت انها بتهلوس أو من بسبب الصدمة اللي صارت معها صارت عم تحكي هيك.. نزلت فوراً وحكيتلهم مافي حدا فوق.. أنا متأكد دورت بكل مكان مافي أي مخلوق.. حكتلي هديل بس أنا مابهلوس أنا شفته صدقني.. وفجأة إختفى.. قلتلهم معناته اذا مش فوق.. فهوه هون حوالينا !!!!!.. صارت هديل ترجف بقوة وأكتر من الأول وأمي شوي وكان رح يغمى عليها.. قلتلهم إطلعوا فوق بسرعه أنا رح أدور هون وماتخافوا عليه إطلعوا لأنه هبه لحالها فوق وهلأ بتصحى تبكي.. بكفي اللي صار معها .. طلعت ماما وهديل لفوق بركضو.. وضليت أنا لحالي بالمكان .. صرت أتطلع حواليه .. وأدور هون وهون.. فتحت الباب الخارجي واتطلعت برا .. مافي ولا صوت.. لمحت عيني مرة تانية على الكلب الأسود اللي بشوفه قبل ماتصير أي مصيبة بالبيت.. كنت حاسس أنه رح يصير شي لأنه لمحت عيني عليه مرة تانية.. كان عم يعوّي وصوته معبي كل الحي.. سكرت الباب بالمفتاح ورجعت أفتش بكل مكان.. فجأة خطرلي أنه ممكن يكون دخل للمكان اللي ورا الحيط.. صرت احكي مع حالي .. بركي طلعلي الولد الصغير مرة تانية.. حكيت أنت هون؟؟ أنا عم بحكي معك ؟! .. قربت ناحية الحيط .. وفتحت أوله لحتى أدخل بس مش دائماً بكون متل مابدي وبقدر أدخل لهالغرفة الغريبة .. فجأة طلعلي صوت الولد وصار يحكيلي .. بكفي.. بكفي .. بكفي.. حكيت شو قصدك انت هون ؟ رجع عم بكرر نفس الجملة وبحكيلي بكفي بكفي.. قلتله شو يعني بكفي؟؟ شو الي بكفي.. وفجأة اختفى الصوت.. طلعت لماما وصرت احكيلها ماتخافو مافي حدا بالبيت.. هديل ضلت تبكي وتحكي بدي أتطلق ولازم تلاقولي ياه من تحت الأرض لو شو ما صار.. امي كانت منهارة على خواتي اللي ضاعو وخايفة بنفس الوقت يكون في حدا بالبيت .. حكتلنا خلص من بكرا لازم نطلع من هون حتى لو مافي مكان نروحه.. الوضع بطّل يحتمل .. كل واحد عم بصير معاه مصيبة شكل ومش قادرين نعمل اشي.. واختك تزوجها واحد مابنعرف مين هوه بس عشان يهربها.. ليش صار هيك وشو السبب؟! اكيد في سبب لكل هالشي.. هديل حكت نفس الشي .. أنه الشخص ليه ليتزوجها ويتركها؟ وكلام المره اللي اجت عنا طلع صح.. لهيك تخربطنا وبطلنا نعرف شو بدنا نعمل.. ما أجالنا نوم.. وعالفجر كان جاي بابا ومعاه خواتي التلات .. امي صارت تحمد الله وتشكره وسألتهم وين لقيتوهم.. حكالي غسان لقيناهم جايين .. اللي خطفوهم تركوهم وما بنعرف شي عنهم.. ليه ليخطفوهم دام بدهم يتركوهم!! .. هديل بطلت تجمع وصارت تحكي نفس الشي.. اللي خطفني ليه ليتزوجني دام بده يتركني.. والبنات نخطفو وطلعو فوراً.. اللي عم بخطفنا بس بده يخوفنا ما بده يأذينا بس انا نأذيت انه تزوجني وانا مابعرفه.. حكالها بابا ماتخافي حبيبتي .. اللي تزوجك رح نجيبه من تحت الأرض واحمدي الله انه تركك وماصار شي .. يعني بس كان بده يخوفك.. ماما اقنعته نطلع من البيت ونروح لمكان تاني بكرا الصبح بس العفش بالبيت كتير وماصارلنا اقل من شهر ساكنين .. حكالها بابا الطلعة من البيت مابتصير بيوم وليلة بدها وقت ولازم أقل شي أسبوع.. أنا كان عندي احساس انه كان حيحكي هيك.. قلتلهم لازم تعرفو انه طول ما احنا هون رح تستمر المشاكل.. اللي بضرونا مارح يتركونا بسهولة تأكدو عندهم هدف.. طلع الصبح .. بهاللحظة كنت صاحي أول واحد .. نزلت لحتى أفطر.. حسيت بصوت بالبيت وواحد بحكيلي أنا هون.. اتطلعت وراي.. وكتمت صرختي.. شفت واحد شبه بابا بالزبط بإختلاف بسيط بالملامح.. حكيتله مين انت ؟ انت بابا .؟!! .. انا هسه شفته نايم فوق وكلهم نايمين.. يبقى مين انت ؟! ليه بتشبهو هيك.. حكالي أنا أبو الولد الصغير.. حكيتله ليه بشبه بابا؟؟ انت شبهو بالزبط.. جاوبني.. حكالي لسه بكير لتعرف ووقتها رح تقتنع ليه أنا شبه أبوك.. شفته عم بطلّع ناحية الحيط ومصدوم.. قلت شو شاف.؟؟ لفيت راسي مالقيت شي.. رجعت تطلعت عليه لقيته اختفى وراح.. نصدمت وطلعت مرة تانية على غرفنا.. فتحت باب غرفة ماما وبابا لقيتهم نايمين وبابا موجود.. اذن مين هاد؟؟ وليه شبهو هيك؟؟ ماقدرت اصحي حدا من العيلة لأنه ماحدا بعرف انا شو بحس وشو بطلعلي بالبيت .. رحت اتطمن على خواتي وعلى خواني.. فتحت بواب غرفهم ولقيتهم نايمين.. ماكان بدي انزل مرة تانية لتحت.. كل مابنزل لحالي عم يصير شي .. ماكنت ملاقي تفسير للشي اللي بصير .. رجعت على غرفتي وضليتني فيها لحد ماصحيوا كلهم ونزلوا يفطرو ليروحو على مدارسهم وشغلهم.. حكيت لهديل رح تروحي اليوم عالبنك؟؟ حكتلي اه لأنه معي بس اليوم وبكرا ولا رح انفصل.. حكيتلها طيب ديري بالك على حالك.. أحساسي بحكيلي اليوم رح يصير شي سيء.. حكتلي انت مابتحس غير بالسوء؟؟ ليه مابتحس بشي منيح فهمني؟؟ حكيلتها لازم نوخد احتياطاتنا ودام الله منعم عليه بهالحاسة فلازم أنبه على الكل.. حكيت لأمي تدير بالها على حالها ولبابا كمان وفهمتهم احساسي بحكيلي اليوم رح يصير شي لازم ندير بالنا.. بابا حكا خلص انا رح اروح ادور على بيت تاني.. ولازم ندير بالنا .. غسان كان متدايق وصار يحكي لهديل لاتخافي أنا رح ادورلك على اللي تزوجك ووعد مني لألاقيه شو ماصار .. وهيه اتطمنت لأنها خايفة وزعلانه ونفسها تخلص من الشي اللي صار معها.. كل واحد طلع مكان وأنا ضليت مع ماما واختي هبه .. حكيتلها لازم ندير بالنا البيت سيء كتير يا ماما وصاير فيه شي الله وحده بعلم شو هوه .. لهيك خلينا ندير بالنا على حالنا لحد مانطلع منه.. حكتلي مبارح بس حكيتلنا نطلع انا واختك فوق وقت ماحست انه الشخص اللي خطفها وتزوجها موجود بالبيت .. سمعتك بتحكي مع حدا؟؟ مع مين كنت بتحكي؟؟ قلتلها يا امي انا كنت بحكي مع هاد الشخص في حال كان موجود بالبيت انه يطلع .. حكتلي ابني انا بعرف شو في بعيونك وحاسة انه في شي.. حكيتلها مابدي اخوفك.. قالتلي احكيلي أنا أمك ومارح أخاف عحالي قد ما أخاف عليك.. حكيتلها يا امي في ولد صغير هون عايش معنا.. ومبارح شفت ابوه شبه بابا بالزبط.. وحكا معي وانا حكيت معاه ومابعرف شو بدهم منا بس بحكولنا انه نطلع من هالبيت.. يمكن ماتو فيه من زمان ومابدهم حدا يسكن فبيتهم ويوخد ذكرياتهم وحياتهم اللي كانت فيه لهيك عم بعملوا معنا كل هالمصايب حتى نطلع .. فهمتيني.. حكتلي صحيح وفي حال طلعنا رح ترجع حياتنا متل ماكانت.. انا مارح أرد على أبوك ورح نحاول نطلع اليوم قبل بكرا.. بكفي بكفي مشاكل ومصايب.. وفجأة رن تلفون ماما.. ردت عليه طلعلها واحد بحكيلها.. زوجك مخطوف.. نصدمت وصارت تبكي بتحكيلي في واحد بحكيلي زوجك مخطوف.. خبّر أخوك بسرعه وقله يجي على البيت

يتبع..