#الحاس��_رقم_سبعة_قصص
#الحاس��_رقم_سبعة_4 #الحاس��_رقم_سبعة
الحلقة الرابعة
كانت الصدمة كتير كبيرة بس شفت أختي وقعت من التلاجة بنص الليل.. وصوت صراخي صحى كل خواني والبيت.. ولما شافوها على الأرض وحكيتلهم انها كانت بالتلاجة كذبوني.. وهديل اتهمتني بالجنون وانه انا اللي عملت فيها هيك متل ماحاولت اسرقها.. بس فجأة ماما سكتتها وحكتلها اسكتي انتي مش عارفة اشي.. صارت تحكيلها هديل كيف يعني مش عارفة.. حكتلها مش وقت هالحكي هسه .. خلينا نتصل بالإسعاف بسرعه .. اتصلنا بالإسعاف واجت واخدت اختي ..وضليت أتسائل انه معقول تعيش ..؟؟ معقول نعرف شو اللي صار بالبيت.. ضليتني بغرفتي وعيون خواني بتستحقرني كل شوي .. لحد ماطلع الصبح.. كنت بدعي انها اختي تقوم بالسلامة لتحكي شو اللي صار معها.. بعد ساعه اجانا اتصال من بابا بحكي انه اختي قامت بالسلامة وحالتها منيحه ولحقوها بالوقت المناسب.. صرت احمد الله وبس بدي ياها تروّح عالبيت حتى نعرف شو صار معها .. دخلت عليه هديل على الغرفة وسركت الباب بإجرها وهيه معصبة.. وكنت عارف انها جاي تكمل حكيها وتجرحني أكتر.. صارت تحكيلي هسه بدي افهم انت شو عم تفكر تعمل؟؟ احكيلي انت بتكرهنا .!! كل هالقد حاقد علينا فهمني.. كيف فيك تقتل اختك الصغيرة وعشان شو .؟؟ وكيف فيك تحاول تسرقني؟؟ حكيتلها اقعدي واسكتي وخلينا نحكي بكفي عم تظلميني وانتي مش عارفة اشي!!. حكتلي شو بدك تحكي وشو بدك تكزب!! .. حكيتلها مابدي أكذب وامي الصبح كانت رح تحكيلكم شي قبل ماتيجي الإسعاف على البيت.. حكيتلها شفتي المرة اللي اجت عندك على البنك وحكت معك ؟! حكتلي اه ؟؟ حكيتلها هاي نفسها اجت عنا على البيت.. وطلعت على غرفتكم ورشت شي على التخوت وبعدها طلعت ولما رحنا على بيتها اللي هوه فوق بيتنا شفنا صورتها وعليها شريطة سودة ولما سألنا وينها حكالنا إبنها إنها توفت من شهر !! تخيلي من شهر... !! انا ماكنت بدي أخوفكم بس انتوا ظلمتوني.. بهاللحظة هديل بطلت تستوعب شي وصارت تحكي معقول اللي بسمعه!؟ مين هاي المرة وشو هدفها من اللي عملته وشو بدها منا وليه هيك عملت؟؟ حكيتلها انا مابعرف مابعرف اشي ماتحكولي لأنكم ظلمتوني بما فيه الكفاية وامي حكتلي خلينا نحل الموضوع بينا عشان مانخوف حدا وانتي عارفة ابوكي لو عرف رح يعمل مشكلة لهدول الناس أو اخوكي غسان عشان هيك ماحبينا نحكي.. ياريت تساعديني وتوقفي معي وما تضلي تتهميني إني حدا عاطل وبنتقم منكم عشان نظري لأنكم أحسن مني .. حكتلي طيب خلص بس شو لازم نعمل.. قلتلها لازم نلاقي المرة ونمسكها وياريت تحكيلي شو حكتلك بالزبط.. حكتلي اجت على البنك وصارت تحكيلي انها بتعرفنا وانها اجت عنا وانه انا حتزوج واحد مش منيح بس لازم أقبل فيه ووصفت خواني واحد واحد كإنها بتعرفنا من سنين.. فجأة اتطلعت عليه وصفنت وعيونها كانت خايفة حكيتلها مالك؟؟ قالتلي خايفة تكون عن جد ميته وجاي تنتقم منا لأنه سكنا هالبيت لأنه عحسب حكيك انه لما اجت عنا ضلت تحكي عن أهل البيت؟! .. حكيتلها ماكان مبين عليها انها ميته .. بتشرب وبتمشي وشايفينها متل أي حدا.. حكتلي انا قارءة عن هالشي كتير وعن الأموات وممكن تكون فعلاً ميته وجاي تبلينا لتنتقم من شي كان بهاد البيت.. اكيد في الها هدف بهلاكنا ليه لعاد رمت على تخوتنا شغلات اكيد بدها تأذينا.. طلعت من الغرفة وصارت تعاملني بشكل منيح.. اجت امي من المستشفى وكانت بتبكي وما عرفنا نوقفها.. هديل حكت لأخوي غسان ولبابا انه هبه دخلت التلاجة من حالها عشان تجرب فيلم كرتون شافته بس صعب يصدقوها لأنه كانت شايلة الرف السفلي من التلاجة وكيف سكرت عحالها.. في حدا عمل هيك.. هدينا ماما وصارت تحكي أبوكم ضل عند أختكم بالمستشفى لأنه الدكاترة حكوا انه طوّلت وتجمدت البنت وأثر هالشي على خلايا مخها لهيك فقدت الذاكرة .. صرنا كلنا نبكي ومش عارفين شو بدنا نعمل.. كيف بدنا نعرف اللي صار؟ دخلت امي منهارة على غرفتها وبتبكي ومافي حد عارف يهديها وبابا ماكان مصدق أنه هيه اللي عملت بحالها هيك بس ماكنا قادرين نحكيله عن شغلة المرة وعن أهلها من خوف ما يأذوهم لأنه ممكن فعلاً تكون ميته وبدها تنتقم.. حكيت لهديل في حال شفتي هاي المرة بلغي عنها امن البنك واذا لقيتك برا البنك لهيها واتصلي معي فوراً.. اتفقت مع امي ومع هديل عنفس الموضوع.. وما حكينا لحدا وخلينا القصة بس بينا.. ضلت اختي بالمستشفى وبنفس اليوم بالليل نزلت على المطبخ لأشوف اذا بقدر اكشف شي تاني بنفس المكان.. نزلت وايدي على قلبي خايف يصير شي تاني .. وصلت المطبخ وشغلت الضو.. مشيت شوي شوي ناحية حيط التلاجة.. شو السر اللي جنب الحيط .. مش قادر أفهم شو اللي بصير وليه كل يوم بالليل بظهرلي.. كان قلبي بدق وحاستي السادسة بلشت تشتغل انه رح يصير شي بهاللحظة.. حاولت أتراجع حتى ما يصير شي تاني أصير فيه متهم.. قربت ناحية إيد التلاجة وفتحتها بسرعه.. لقطت أنفاسي بعد ما شفت انه مافيها حدا.. تراجعت مرة تانية وحاولت أسرق نظر ناحية التلاجة .. سمعت صوت ولد صغير..بحكيلي أنا هون .. اتطلعت ورا التلاجة مافي حدا بالمكان مافي حدا.. رجع يحكيلي انا هوووون.. وبضحك وصوت جريه عم بركض وأنا مش لاقي أثر ولا شايف حدا.. بحكيلي اتطلع هناك .. وين هناك ماكنت عارف؟!! .. صرت احكيله مين انت ؟؟ حكالي أنا الولد اللي شفت صورته واخدتها عغرفتك.. وقتها شكيت انه فعلاً البيت مسكون وفيها حدا عايش معنا وكلام الزلمة اللي حكا معي ما كان كذب.. حكيتله حبيبي انا مش خايف منك .. احكيلي شو بدك منا ومين انت ؟؟ حكالي بابا بحكيلكم إطلعوا من البيت.. حكيتله انت من وين بتحكي؟ انا مش شايفك .. كان خوفي أكبر من أني أمشي بمكان بالمطبخ ضليتني واقف بمكاني ومش عارف اتحرك والصوت قريب من ورا التلاجة.. انا شاكك انه في شي وراها .. من اخر مرة شفت فيها ضو عاكس وراها وكأنها في وراها غرفة.. قلتله خلص عرفت وين انت بس احكيلي ليش بدكم يانا نطلع من البيت.. حكالي نحنا مابنحبكم وهاد بيتنا ليش اجيتو عليه ؟؟ اطلعو منه لأنه لو ماطلعتو رح تموتو.. ضليتني أخد وأعطي معاه بالحكي حتى أوصل لسبب للشي اللي بدهم ياه.. حكالي ليش اخدت خاتمي ؟ حكيتله خلص رح ارجعلك ياه بكرا الصبح .. وفجأة نفتح الضو .. صرخت بأعلى صوتي وصرت احكي مين ؟ لقيت بوجهي اختي هديل .. حكتلي شو بتعمل بالمطبخ؟؟ حكيتلها نشفتي دمي موتتيني شو جابك انتي شووو؟؟ حكتلي بتحكي مع حالك ؟؟ مع مين بتحكي شو في احكيلي خوفتني أنا جاية اشرب مي بس انت شو بتعمل ومع مين بتحكي؟؟ حكيتلها للأسف في ناس فعلاً عايشين معنا وبدهم يانا نطلع من البيت.. حكتلي شو بتحكي؟؟ انت كنت بتحكي مع المرة اللي اجت عنا؟ حكيتلها لأ بس من بكرا لازم نلاقي طريقة نقنع ابوكي واخوكي انه هالبيت مابناسبنا ولازم نطلع منه بسرعه.. وامشي معي على الغرفة لازم نحكي فوق أنا وياكي المكان هون نشفلي دمي.. طلعت معها على غرفتي وتركنا الوضع متل ماهوه تحت بدون مانعمل ولاشي
يتبع..
Mahmoud Salloum
