#الحاس��_رقم_سبعة_قصص
#الحاس��_رقم_سبعة_5 #الحاس��_رقم_سبعة
الحلقة الخامسة
طلعت أنا وهديل عالغرفة فوق عندي بعد ما سمعت صوت الولد بالمطبخ.. حسيت الشي غريب لدرجة لا يمكن تصدق.. حكتلي احكيلي كل شي شو سمعت تحت أنا سمعتك بتحكي مع حدا.. حكيتلها في ولد صغير عايش معنا هون بالبيت.. وعلى ما اظن هوه روح .. توفى مع والده ووالدته والمرة اللي شفناها توفت معهم!! .. أكيد في علاقة بتربطهم وقوية كتير وأنا سمعتها بتحكي مع ماما بس اجت عنا.. ومستحيل يكون غير هيك لأنه على حسب حكي ابنها هيه متوفية من شهر.. نحنا لازم نعرف كيف توفت!! .. حكتلي كيف بدنا نعرف قلتلها اليوم بنحاول مع ابوكي نقنعه أنه البيت ما لائمنا لازم نعمل شي انا وياكي حتى نطلع منه لازم!!.. حكتلي شو لازم نعمل.. حكيتلها خلينا نخرب البيت .. نخرب أماكن الصرف الصحي ونخرب الحيطان وكل شي عشان يقتنع انه البيت على وشك الإنهيار أو شي متل هيك.. يا بنأذي البيت وبنطلع منه يا أما نحنا بنتأذى كلنا.. انتي بترضي انك تتأذي وتضل علينا لعنة كلنا أنا وانتي وخوانك وأمك وأبوكي ؟ حكتلي أكيد لأ.. قلتلها طيب خلص لكن امشي معي وخلينا نخرب البيت بكرا الصبح حاولي تعطلي من البنك وياريت ماتروحي حتى نباشر بمهمتنا.. في شي تحت كمان بالمطبخ أنا صرلي حاسس عليه من لما سكنا.. ورا التلاجة في حيط بلوك عم بتحوّل الحيط لملمس متل الفلين خفيف وأظن انه في شي وراه.. لازم بكرا الصبح نحاول نعرف بس اللي محيرني أنه مابطلع هالشي غير بالليل.. أنا حاستي السادسة بتحكيلي أنه بكرا بالذات رح يصير شي كتير قوي.. حكتلي شو حاسس؟؟ حكيتلها واحد منا يا هديل رح يتأذى .. ممكن أنا .. ممكن أنتي .. ممكن أمك .. ممكن خوانك .. المهم لازم نخرب البيت ونخلي أبوكي يقتنع انه خطر علينا بأي شكل من الأشكال.. ولازم مانحكيله شي على قصة الأرواح اللي فيه أو عن المرة .. مابدنا مشاكل انتي بتعرفي ابوكي ما بآمن بهالأمور شو ماصار ومابدنا يصير مشكلة مع بيت المرة اللي اجت عنا خصوصاً انه هيه متوفية وبيتها قريب منا.. فهمتي؟ حكتلي فهمت وطلعت من الغرفة .. وبهاللحظة أنا ضليتني أفكر شو ممكن أعمل وكيف ممكن أتصرف بكرا خصوصاً انه حاسس رح يصير شي كتير قوي.. طلع الصبح وكل واحد من خواني راح على مدرسته وشغله .. افطرت مع امي وضليتني أتفحص البيت شوي شوي.. عرفت وين منفذ الصرف الصحي والأماكن اللي ممكن تخرب علينا عيشتنا بالبيت .. هديل ماراحت على شغلها واتفقنا نخرب البيت.. بس للحظة رن تلفونها كانت صاحبيتها بالبنك بتحكيلها لازم تيجي عالشغل بسرعه في شغلات ضايعة ومش لاقيتها ومافي غيرك ممكن يلاقيها.. حكتلها بس انا اليوم تعبانة ومش قادرة.. اقنعتها تروح وبالفعل تركتني بالبيت وراحت على شغلها وضليت لحالي أخرب بالبيت.. كانت امي بتشتغل بالمطبخ وفجأة المي فاضت عليها بهاللحظة ماكنت بعرف اذا هالشي رح يجيب نتيجة واصلاً بده وقت حتى يقتنع بابا فيه.. حكتلي ماما كيف بدي اشتغل هلأ وكل شي خربان بالمطبخ حتى طبخ مش عارفة أطبخ.. حكيتلها طيب شو رأيك توخدي طبختك وتروحي عند جارة من الجارات بما انك تعرفتي على ناس كتير.. حكتلي ممكن معك حق.. طلعت من البيت واخدت طبختها وضليتني لحالي بالبيت.. أول شي حاولت أحكي مع الناس اللي بالبيت معنا.. قلتلهم فرجوني حالكم اذا انتوا موجودين.. أنا لحالي وبدي أواجهكم.. يا ولد يا صغير انت ياللي حكيت معي مبارح بالليل.. اطلع فرجيني حالك انا لحالي.. ماكان حدا برد عليه وفجأة اطلت بالمراية ورايه شفت وجه مغبّش لولد وكان يبكي.. لفيت راسي ماشفت حدا.. حكيتله انت هون ؟؟ شو ببكيك ؟؟ حكالي بابا زعلني.. حكيتله ليه شو صار احكيلي انا جنبك وبساعدك.. فجأة اختفى الصوت .. وصرت أخرب بالبيت أكتر بكل شي بقدر عليه.. طلعت من البيت وحكيت لازم أطلع أراقب بيت المرة اللي حكولنا توفت .. لازم أتوصل لشي.. طلعت وضليتني اراقب بيتهم من بعيد ماكنت بشوف شي ملحوظ.. رجعت على البيت بعد ساعه من المراقبة كان بابا بالبيت ومعه اختي هبه..وماما رجعت من عند جارتنا.. وصلوا خواني من المدرسة ولقيت بابا بحكي بصوت عالي مع اخوي غسان وامي.. بحكيلهم التحاليل بتحكي انه البنت نعطالها منوّم قبل ما يصير الشي معها .. معناته في حدا معطيها اشي وعمل معها هيك .. انتوا متأكدين انه ماحدا دخل على البيت .. اخوي صار يحكي الشي اللي صار غريب وليه حتى يأذو بنت صغيرة شو بدهم منها.. ومين الي بده يكون عمل هيك.. كانت هبه فاقدة الذاكرة تماماً وحاولوا يفرجوها المطبخ والمكان اللي كانت رح تموت فيه وأكتر من مكان بالبيت حتى تتذكر.. العابها ووجه ماما .. بس ماكانت متذكرة اشي وبس بتطلع بوجوهنا يا أما بتضحك يا أما بتبكي.. روحوا خواتي شذى وأفنان ودعاء من المدرسة بركضو على البيت وببكوا كلهم حكينالهم شو مالكم شو في؟ حكولنا في مرة مسكتنا برا وصارت تحكيلنا انه احنا رح نموت وانها بتعرف اهلنا وبتحكيلنا لازم نطلع من البيت .. كان بابا موجود صار يحكي شو الي بسمعه ؟؟ مين هاي المرة.. وغسان اخوي كان موجود وهمه مابعرفوا شي عن القصة .. انا صفنت وامي صفنت فيه وبطلنا عارفين شو بدنا نحكي.. بابا عصب واخوي غسان عصبي اكتر منه صار يحكي احكولنا شو فيه ولا تجننونا .. حكيناله نحنا مابنعرف شي وغمزت امي بدون ماحدا يشوفنا على أساس ماتحكي.. حاولت أتجاهل الموضوع قدر الأمكان وصرت احكي لخواتي وين شفتوها.. حكولي عند مدرستنا .. غسان وقتها صار يحكي هسه هسه بدي اروح ادور عليها مين هاي اللي بتعرفنا وليه هيك لتحكي لخواتي.. طلعت معاه على مكان المدرسة وصرنا ندور عليها ولفينا بالسيارة كل مكان مالقينا حدا.. نزلنا سألنا الناس عليها حسب ماوصفونا خواتي.. بدون نتيجة.. وبس رجعنا على السيارة لقينا عالزجاج ورقة مسكها أخوي وقرأها .. كان مكتوب فيها "أمك مخبية عليك إشي وفي كتير شغلات انت مابتعرفها بتخصك ..لو بدك تعرفها إسأل أمك عنها بس تروّح وياريت تطلعوا من البيت" حكالي أقرأ شوف مين كاتب هيك ! حكيتله بصراحه مابعرف شو اللي بصير أنا احترت .. روّح على البيت معصب ولقينا بابا وماما معهم عامل وبزبطو بالبيت .. حكيت ليه هديل تأخرت بالبنك بدي ياها توقف معي وتقنع بابا انه خلص لازم جد نطلع من البيت.. وماعرفت احكي شي حتى مايفكروني بعرف شي.. طلع العامل من البيت وصلح اللي خربته وفجأة غسان رمى الورقة على ماما وصار يحكيلها شو مخبية علينا احكيلنا وشو مكتوب بهالورقة في حدا حطها وبعرف شي إحنا مابنعرفه.. بلشت ماما تحكي عن المره وانا ماكان بدي يصير هيك لأنه رح تقلب مشاكل وفعلاً ممكن تكون ميته في لغز بالبيت اللي ساكنين فيه وهاي روحها صعب الواحد يتحكم بأفعال روح ميته ونأذي ناس عايشين ومادخلهم بشي.. لأنه نحنا مش عارفين إشي ببساطة.. حكتله ماما عن المره وانه ولادها ساكنين فوقنا وحكولنا انها متوفية من شهر وهيه اجت عنا من كم يوم وبعدها صارت كل المشاكل.. بابا صدق الموضوع برغم انه صعب يصدق هيك شي.. وصار بده يروح عند بيتهم واخوي غسان ناوي على مشاكل مع اهل المره.. لأنه من كلام ماما لإله انها رشت شي على تخوت خواتي وبنفس الوقت راحت على البنك عند هديل وحكت وخوفت خواتي الصغار لهيك لازم نعرف شو اللي بصير.. حكيتلهم استنو ممكن تكون فعلاً روح.. رن التلفون وكانت هديل على الخط بتبكي وبتحكيلنا الحقوني انا مخطوفة ومابعرف وين أنا.. سألها بابا مابتعرفي وين انتي مين عمل هيك احكيلنا .. وأنا طالعه من البنك في واحد سحبني ودخلني عسيارة وبس وصلت لمكان ضليتني أصرخ وماحدا يرد عليه وتركوني بغرفة سودة .. وفي واحد هلأ فتحلي خط معك وأنا سمعت صوت المرة اللي شفتها بالبنك بالمكان هون أنا متأكده انه سمعت صوتها يا بابا لأنه صوتها بعده بأذني .. أنا مخطوفة وخايفة .. وفجأة سكر الخط..!! .. صفنا كلنا ببعض وأخوي غسان صرخ وفتح الباب وطلع ووقتها عرفنا انه رايح لبيت أهل المره هاي!!.. وبابا لحقه وضليت أنا وماما بنطلع فبعض مصدومين وبعيونها دمعه وحكتلي إلحقهم بسرعه قبل مايصير شي نندم عليه
يتبع..
