#الحاس��_رقم_سبعة_قصص
#الحاس��_رقم_سبعة_3 #الحاس��_رقم_سبعة
الحلقة الثالثة
ما عدت اوثق بأي شخص بحياتي مين ما كان يكون .. بعد ما سمعت كلام صعب من عيلتي والكل بعلق أغلاطي على المشكلة اللي بعاني منها في نظري.. وبالآخر اتهموني أني سرقت أختي بس الغباء الأكبر كان مني أني اعترفت بهالشي بس ماقدرت وقتها أحكي عن المره اللي دخلت بيتنا واللي أمنتلها ماما وخلتها تدخل على غرفنا ورشت شي على التخوت وخرمشت بإيدها على الصور اللي على الحيط.. كل واحد بالعيلة صار يطلع عليه بطريقة سيئة أني حاولت أسرق وأني مش عارف اشتغل حتى خواني الصغار.. تاني يوم الصبح وبعد ماطلعو خواني على المدرسة وخواني الكبار على جامعاتهم وشغلهم .. حكيت لماما خلينا نروح نزور المرة اللي أجت زيارة لعنا .. خلينا نعرف مين هيه .. وقتها سألتني شو بهمك لتعرف مين هيه ؟؟؟ حكيتلها إحساسي بحكيلي أنه في شي سر وراها.. حكتلي أنت دائماً بتحكيلنا إحساسك وبطلع غلط .. بس أنا وعدتها بزيارة وهيه حكتلي وين ساكنه ووصفتني البيت .. حكيتلها شو إسمها؟؟ حكتلي ميرفت أم عامر.. حكيتلها طيب بعد شوي خلينا نروح ندور عليها.. لبست وطلعت معها ومعنا اختي هبه الصغيرة.. وصلنا المكان اللي وصفتنا عليه وعنفس البيت بالزبط.. كان في برا ولد صغير بلعب حكيتله وين ماما.. دخل وصار يبكي .. طقينا جرس الباب طلعتلنا الخدامة .. حكينالها وين المدام؟؟ حكت أي مدام ؟ حكيتلها مافي حدا نحكي معاه هون .؟ دخلنا على البيت طلعلنا شب بعمري .. لسه قبل ما أسأله عن أمه شفت صورة معلقة بغرفة القعدة لنفس المرة اللي اجت عنا وعليها شريطة سودة من جنب .. توفت !!! .. سألته أمك توفت ؟ حكالي اه من شهر تقريباً.. حكيتله شهر ؟! كيف شهر ؟! مبارح أمك أجت لعنا .. حكالي انت بتهلوس وين أجت ؟! أمي بهالوقت صار رح يغمى عليها وجابلنا الولد ميه شربناها .. سألته شو اسمه حكا عامر.. قلي أمي متوفية من شهر حكيتله طيب كيف؟ حكالي انت شكلك مضيع او مشبه .. قلت إحساسي بمحله أكيد في شي صار كيف توفت من شهر وهيه اجت عنا مبارح ؟ حكالي كيف شكلها حكيتله هاي المرة اللي بالصورة هيه اللي اجت عنا .. اتهمني بالجنون وحكالي نحنا مش متحملين لسه مش متعودين على فقدانها ومع السلامة.. طلعنا أنا وأمي من البيت وعلى وجهنا علامات استفهام وقتها ماكنا عارفين شو اللي صار بالزبط.. حكتلي ماما مش مصدقة كيف هيك لعاد مين اللي اجنا عنا مبارح .. يعني ياهدول بكزبو علينا يا أنه اللي اجت عنا اعوذ بالله.. بس كيف حكينا مع روحها ؟ وشو غرضها لتيجي عنا .. شو بدهم يا امي انا خايفة.. حكيتلها امي انا من أول ما اجيت على البيت وحاسس رح يصير اشي وانتي بتكذبي احساسي .. أنتي لما نزلتي تجيبيلها مي كانت بترش اشي على تخوت خواتي وخرمشت بأصابعها على الصورة.. وانا ما كنت بدي اسرق كنت بفتش على الشي اللي حطته تحت الفرشات .. بس اجت هديل واتهمتني بالسرقة وخبرت بابا ولو نحكيلهم على الشي اللي صار ماحدا رح يصدقنا.. لهيك انا سكتت .. حكتلي طيب خلص يا ابني أنا وياك رح نكشف الموضوع اللي صار بس ما تخبر خوانك ماحدا منهم رح يصدقك وماحدا شاف المرة غيرنا وانت بتعرف العيلة بكذبو كل شي ..لازم نعرف شو اللي صار.. روحنا على البيت وصرنا نشوف الأماكن اللي قعدت فيها .. امي كبت فرشات خواتي ورمتهم برا البيت .. وحاولت تحرقهم كمان.. وكبينا كل الفناجين اللي شربت فيهم.. ومسحنا كل مكان دعست عليه.. بس ماكنا بنعرف شو حنستفيد لو عملنا هيك لأنه مش عارفين شو اللي صار!!.. رن التلفون فجأة رحت أرد طلعلي واحد بحكيلي هون بيت أبو غسان حكيتله اه تفضل حكالي إسمعني.. لازم تعرف إنه في ناس عايشين معكم بالبيت وأنا واحد منهم.. وسكر الخط!! وقتها نشفت رعبة وصرت أحس إنه الشي اللي صار ورا الثلاجة مش من قليل.. مارضيت احكي لأمي مين على الخط وشو حكا.. صرت احكيلها واحد غلطان حكتلي كيف غلطان وحكالك بيت أبو غسان.. ماتخبي عليه واحكي.. حكيتلها مابخبي يا امي بس ناس تانين مش إحنا يعني مافي غيرنا بيت أبو غسان.. مين الناس اللي عايشين معنا ؟؟ شو الي عم بصير؟؟ والمرة اللي اجت عنا طلعت ميته.. حكيت لأمي إحنا لازم نقنع بابا انه نرجع نطلع من هالبيت.. صدقيني إحساسي قوي وبحكيلي انه البيت رح يجيبلنا وجع راس للكل .. لازم نطلع منه بأسرع وقت.. حكتلي أبوك شراه بمبلغ منيح كيف بدك يانا نطلع منه .. حكيتلها خلينا نحاول نقنعه بأي طريقة المهم نطلع منه ..أجو خواني من المدرسة والجامعه وهديل من البنك .. صارت تحكي إنه في شي صار معها غريب بالبنك.. حكينالها شو.. حكت اليوم أجت عندي مرة وصارت تسأل عني وكأنها بتعرفني .. وصارت تحكيلي إنك رح تتزوجي واحد مش منيح والمرة بتعرفنا كلنا وصارت توصفني أشكالكم .. انا مرعوبة وخايفة .. كنت أول مرة بشوف هديل مكسورة وتعبانة وخايفة لهالدرجة .. حكيتلها كيف شكل هالمرة ؟ صارت تحكي لابسة طاقية وجكيت اسود وعمرها قريب من عمر ماما.. امي خافت وارتعبت وصارت تحكي لأختي حبيبتي ديري بالك هاي ابصر شو بدها.. اذا اجت مرة تانية بلغي الشرطة.. صارت تحكي بس بتعرف كل شي كل شي .. هاد اللي مخوفني وبتعرف اسمائنا كلنا .. وكيف عرفت اني رح اتزوج واحد مش منيح ؟؟ قلتلها خلص انسي الموضوع برغم انك زعلانة مني .. حكتلي أنا مش زعلانة بس أنا خايفة عنجد من اللي صار.. طلعت على غرفتها وشافت الفرشات مرمين .. صارت تسأل ليه فرشات الغرفة مش موجودات.. رح ننام على الأرض؟؟ واجت اختي شذى وسألت عن نفس الشي.. حكينالها الفرشات داخل فيهم بق.. ومعفنين رح نشتري غيرهم.. واجا الليل ونمنا كل واحد بمكان.. كان الجو برد وعاصف وكان بداية لشهر 11 .. ضليتني بغرفتي وبفكر بالشي اللي صار.. شو تفسيره المرة مين ممكن تكون وشو بدها منا.. والشخص اللي اتصل علينا وحكالي في ناس عايشين معنا شو كان بقصد.. حسيت بهالليلة انه رح يصير شي سيء .. واحساسي ما خاب.. قلت بعقلي المفروض بهاللحظة أنزل أشوف شو ورا التلاجة.. وشو الشي اللي فتح الحيط.. وأكيد مابصير هالشي غير بالليل لأنه صدفت مرتين وصارت بعز الليل وبالنهار بكون الحيط عادي جداً.. نزلت على الدرج وصرت أتطلع حواليه خايف من كل شي.. وصلت المطبخ.. واتطلعت ورا التلاجة .. شفت الحيط مشقوق شوي.. وكأنه فيه أقدر أشوف شي .. متل غرفة تانية ورا الحيط مش مكشوفة.. شي مش ملحوظ ولا عارف أشوفه منيح.. حاولت أدخل إيدي حتى أفتح الحيط .. كان متل باب ورا التلاجة وملمسه خفيف مش بلوك ولا قاسي.. حاولت بإيدي وزحت التلاجة بأقصى قوة بملكها .. فتحت التلاجة !!! .. وقع منها إشي.. شو اللي وقع .. !!! صرخت بصوت عالي .. شو هاااد شو اللي صار !!!! .. وقع من التلاجة أختي هبه الصغيرة .. كانت جوا التلاجة ومسكر عليها وبس زحت التلاجة فتح بابها ووقعت منها .. البنت متجمدة وشبه عايشه.. صرت اصرخ وأصرخ الحقووني.. لحد مانزلوا خواني وبابا وماما وشافو هبه على الأرض ووجها أزرق وشفايفها زرق.. وبتشهق.. حكيتلهم كانت بالتلاجة .. حكولي شوووو ؟! كيف بالتلاجة.. اتطلو خواني عليه بخوف.. كأنه انا اللي عملت هيك بأختي حكيتلهم مش أنا صدقوني .. اجيت افتح التلاجة لقيتها جواتها.. انا ماعملت اشي صدقوني ماعملت اشي.. امي صارت تبكي.. واتصلوا بالإسعاف.. ووقتها شفت صورة خواتي مرمية على الأرض بالمطبخ وهيه كانت اصلاً فوق.. ماقدرت احكي اشي واكتفيت بالصدمة وبنظرات خواتي وبابا وماما اللي عليها ألف علامة استفهام كأنهم بحكولي بعيونهم متل ماحاولت تسرق أختك ممكن تقتل أختك التانية.. يعني انا مجنون .؟؟ شو اللي صار .. ضليتني واقف لحد ما اجت الإسعاف .. وحطيت إحتمال وحيد فبالي إنه في حال صحيت أختي وعاشت رح تحكي مين عمل فيها هيك ولو ماتت رح أنا أروح فيها وأضيع وماحدا يرجع يصدقني مرة تانية.. وانتظرت معهم لحد ما اخدوها على المستشفى ولحد ماطلع الصبح علينا
يتبع..
Mد
