Ra.th.hh:
يك بتطلعي فيني ؟
#حنيني_بقلم_مال_الشام
الجزء الثاني
سحبتني من ايدي و حضنتني : مرت اخي امانة تعي اطبخي ما الي غيرك ، بترضياها علي خجل جوزي قدام اختو الي جايه من كندا ؟ شو بدها تقول عندي وخمة و مأنشحة ونفسي مو طيب وماني معدلة ؟
حنين : اه ؟ .. انا ؟ .. اطبخ ؟
تطلعت على الساعه ورجعت سألتها : هلأ ؟؟؟؟؟؟؟؟؟؟؟؟؟؟؟
كل محاولات اقناعها انو نجيب اكل جاهز وانا بدفع ما نجحت ، ما لقيت حالي الا بالمطبخ لابسه المريول و واقفه عم قشر توم و قطع بصل وابكي و اسأل حالي انا شو جابني لهون !!
والمصيبه انو طلباتهن على العشا كانت غريبه .. لازانيا .. فيليه دجاج بالخضرا .. أصابع السمك المقليه ... بف بيستري .. لك حتى شوربة العدس بدهن ياها بكريمة .. قال جوز بنت حماها ذوقو صعب
وما بياكول اي شي ... ياكول سم على هالعلقة دعيت عليه مع كل معكب ماجي حطيتو ومع كل رشة ملح رشيتها .. والطبق الرئيسي من الهند دجاج بالكاري مع رز هندي ..
انفتح باب البيت والأكل بعدو ما استوى .. و صار قاسم ينده للجين لتطلع تسلم على اختو و جوزها الي جابهن وانا ابتليت فيهن ..
ندهتلو لجين للمطبخ ، وبس اجا وشافا صار يخانئ بس لمحني وسكت .. قالتلو لجين بس نص ساعه وبكون كل شي جاهز ومنطلع نستقبلهن .. وراح قاسم وتركنا بالمطبخ
لجين : يا لطيف على هالنهار ..
حنين : طيب انا صار لازم روح اخوكي دئلي اربع مرات ولازم ارجع لعندو
شلحت المريول ورميتو على الطاولة .. ومسكتني لجين من ايدي وسحبتني لورا
لجين : وين رايحه ؟ بدك تتعشي معنا
حنين : مو جوعانه صحة وهنا بدي روح نام خلص تعبت ..
لجين: سبحان الله يا حنين جيتيني من السما لولاكي كنت ضعت اليوم، عنجد رب صدفة خير من ألف ميعاد
رجعت بدي اطلع بس تزكرت من حكيها انو انا ماجبت صدفه وكنت بدي منها شي و وقفت مكاني : صحيح لجين بعرف الوقت مو مناسب بس انا جيت مشان هالشغله ونسيت .. انا طبعاً حكيتلك انو بكرا عيد زواجي و كنت بدي
لجين : لحظة خليكي لاتفقد الرز
راحت شافتو ورجعت لعندي
لجين : ليكي ما بنفع هيك نحكي خلص خليكي امانه فوتي غسلي واقعدي ارتاحي وبعدا بفوتك تتعرفي على بنت حماي .. اساساً انا كمان اول مره بشوفها لانها من زمان عايشه بكندا بس بعرف اسمها مريم
الاحسن تفوتي معي لانو بتعرفيني جدبه بهيك مواقف الله يوفقك ؟ .. وبعدين منقعد ومنخطط على رواق مشان حفلتك بكرا .. بوعدك ساعدك بكل شي .. وعد وعد وعد
فكرت شوي و بعدين هزيت براسي .. طلعت من المطبخ شوي شوي وسمعت صوت قاسم جوزها للجين عم يحكي مع جوز اختو .. كانو يحكو بالسياسة .. رحت على الجهة التانيه على غرفة نوم
مشان روح على الحمام الي بغرفتها غسل و نظف حالي و اقعد ارتاح شوي ..
مرقت ربع ساعه وانا قاعده بغرفة بنت حماي وعم اتطلع على الخزانة وعقلي عم يقلي يا بنت خدي الفستان خبيه تحت تيابك واهربي فيه اخلصي من هالشغله !!
الحمدلله قبل ما نفذ هالفكرة المجنونة اجا صوت لجين من برا عم تندهلي ..
طلعت لعندها ونطت بوشي عم تهمس - هي على اساس عم تهمس بس اكيد الضيوف سمعوها -
لجين : خلص كل شي جاهز .. رتبت كل شي الحمدلله ... رح فوت غير تيابي دقايق سريعه واجي لعندك اتفقنا ؟
حنين : ههههه طيب يلا خلصيني
لجين : ماشي انتي شوفي كيف زينت الأكل لارجع .. ثواني بس
ركضت على غرفتها و انا فتت شفت الأكل كانت كتير مرتب و ريحتو بتشهي .. ضليت امشي و اتفرج على الصحون و أصناف الأكل .. لوقت ما وصلت لعند أصناف الحلويات .. بلش يتشنج وشي و حرارتي صارت فوق الألف
لأ أكيد هدول مو الحلويات الي انا جبتهن .. مستحيل مستحييييييييييل لجين ما بتعملها .. ولا يمكن !! انا كيف بشك فيها هيك اصلاً !! أنا كيف بفكر فيها بهل طريقة الغير اخلاقيه !!
مستحيل لجين حبيبتي وبنت حماي و بتحبني .. اصلاً هي دايماً بتقلي انو انا الغالية مرت الغالي !!
لجين : حنين خلصت .. يلا نطلع نسلم على الجماعة
التفتت عليها و بصعوبة مسيطرة على حالي وسألتها بهدوء وبابتسامة عريضة ( لولو حياتي .. هاد الحلو ... جابو قاسم يعني ؟ )
ابتسمت هي بنفس الطريقة وصارت تلعب باصابعها : والله يا حنين .. بذمتي بديني بضميري .. بولادي ها .. انو بحبك .. لو مانك الغالية مرت الغالي وبعرف اني بمون عليكي ما كنت استخدمتهن
بس خليني اشرحلك شو الي صار
انا هون ما عاد ركزت حسيت حالي رح غوطن
لجين : يا حبيبتي يا حنيني .. فكري معي .. ازا انا وياكي ما عملنا حلو .. و قاسم ما جاب حلو .. انا شو اعمل شو اعمل
حطي حالك مكاني .. اتطلق ؟ اتطلق يعني ؟
بس حسيتها بدها ترجع تشغل صافرة الإنذار وتفتحلي مناحة .. مسحت وشي بايدي واخدت نفس عميق وابتسمت
خلص ما عاد بدي لا حفلة زواج ولا فستان ولا بطيخ بس بدي ارجع على بيتي .. استسلمت
حنين : يلا نشيل الأكل ؟ صار لازم روح انا .. جوزي و ولادي وهيك يعني
لجين : اي اي صح .. والله يا حنين لو مانك غاليه علي وبحبك كتير بذمتي بضميري بولادي ما كنت خليتك تساعديني هيك ، وما كنت اعتبرتك متل
