التوقيت وما وراءه الحلقة الخامسة الجزء الثاني🎬🎥😱

التوقيت وما وراءه١١:١١
الحلقة الخامسة
الجزء الثاني

بيبقى الحبل يلف على جسمي ليوصل رقبتني.. وبرفعني معه.. بشعر بالموت وقبل ليلتف بقوة أكتر بسمع صوت الباب بنفتح.. برفّس برجلي على الباب.. وبسمع صوت بنات كتير بالحمّام.. بنفتح الباب وبشوف وجوه كتيرة قبالي.. بصرخو وبشوف بنت طويلة جهمة بتصرّخ وبتقلهم إبعدو!.. بتشدني من إيدي وبتقلهم يبدو البنت مغمى عليها وكأنها مخنوقة وجهها أزرق!.. بفتح عيوني بعد شبه اغماء بمكتب صغير.. وقبالي بنت ومرة كبيرة.. بتقلي المرة بنتي شو صرلك؟!.. قلتلهم لازم أمشي وين تلفوني نسيته على الطاولة جيبوه.. بتعطيني البنت التلفون وبتقلي في رقم رنّلك يمكن عشر مرات.. بس بدنا نعرف شو صرلك.. وجهك كان ازرق وكأنه كان في حد عم بخنقك!.. حكيتلهم صعب تفهمو.. قالت المرة طيب ليه قلتي إنه في بنت بتحاول تنتحر!.. نحنا بس فتحنا الباب ما لقينا حدا غيرك.. بنتي فهمينا أنا مديرة الصالون وبدي أعرف إذا في وحدة أذتك لنوخدلك حقك قبل لتهرب؟.. حكيتلهم أنا متبوعة!.. شفت نظرات استغراب على وجوههم.. قالت البنت ما فهمت شي!.. والمديرة قالت حبيبتي انتي بخير؟.. شو يعني متبوعة؟.. رقبتك كانت حمرة وكأنه في حد خنقك خنق!.. حكيتلهم أنا متبوعة من قريني.. نفسي بدها تقتل نفسي!.. شفت بعيونهم نظرات رعب.. والبنت قالت لمديرة الصالون خلينا نطلّعها أنا بخاف من هالأمور.. حكتلها البنت مو طبيعية شوفي وجهها!.. كيف رح تتزوجّي اليوم وهيك حالتك؟!.. زوجك بعرف !!؟.. أخدت التلفون وكنت برن لكرم بس كان الخط مشغول.. وحاولت كتير كان مشغول.. الرقم يلي رنّلي عشر مرات كان ياسمين!.. استغربت وحاولت ارنلها.. ردت عليه وقالتلي ماما بتبكي ومنهارة بسبب الكلام يلي قلتلها ياه.. حكيتلها شو قلتيلها ؟!.. قالت حكى معي كرم وقلّي إنه شاف علبة فيها أشياء لواحد بخصّك وحكالي ما أقلك.. بس أنا قلت لماما عن ورد ويلي كان بينك وبينه.. وماما حكت رح يلتغي العرس اليوم أكيد بسبب هالشي!.. حكيتلها خلص يبقى أجت منه ما أجت منّي!.. قالت ياسمين بكون أنكسر خاطره.. ماما بدها تحكي معك!.. سمعت صوت ماما بتشهق وبتبكي وبتقول.. اذا اليوم بخرب العرس بدي أتبرى منك فاهميتني!؟.. خرّبتي حياتك بإيدك.. وقبر أبوكي لا تروحي عليه!.. الماضي لحقنا وجوّ البيت سيء وكل شي بصير مش من فراغ.. رح تنأذي لو رُحتي!.. سكّرت الخط بوجهها وطلعت من الصالون.. أخدت فستاني واستنيت برا لأجى تكسي.. ركبت وطلبت منه يوخدني على مقبرة الضاحية الكبيرة.. بعد ساعة تماماً وصلت.. مشيت بين القبور بدوّر على قبر بابا.. أو الزلمة يلي ربّاني ما كان بفرق معي كتير النسب بقدر ما فرق معي يلي عمله معي بحياتي.. شُفته من بعيد.. فتحت الكيس ولبست الفستان ورحت أركضله.. قلتله حققتلك أمنيتك.. أنا اليوم عروس!.. بس بدك تعذرني لأنه هالعرس ما رح يكمل.. عشانك.. وعشان ترتاح.. بس ما قدرت أحرمك من هاليوم وخفت أكبر وأكبر وما أحققلك حلمك متل ما حققتلي كتير أمنيات تمنيتها.. إشتقتلك بابا.. بقيت بحكي معه بقرابة الساعة.. ومن تعبي وإرهاقي نمت.. بس كنت قادرة أحس بإيد عم تقرّب مني وتحضنّي.. قربت مني كتير وشدّتني ووقتها شمّيت ريحته.. كان بابا.. قلّي أنا جنبك ما رح أتركك.. أنا معك بكل لحظة.. وبعرف إنك ما رح تبعدي عني.. الإيد صارت تضربني ضربات خفيفة.. قومي ريحانة.. قومي.. فتّحت عيوني وشهقت خايفة.. بابا !!؟.. لفّيت راسي لورا.. شفت كرم!.. قلي أنا معك!.. حكيتله وين بابا ؟!.. قلي أنا كنت جنبك وعرفت إنك هون امك حكتلي وين رحتي.. قومي ريحانة.. العرس رح يتم وأنا عارف انك بتحبيني.. ما تخافي أنا عرفت كل شي.. وشفت ورد وأخدت رقمه من الدفتر الصغير يلي كان بالعلبة.. اعطيته اغراضه وقلي إنه رح يخطب.. لو كنتي بتحبيه هالشي ما بعنيني.. بس أهم شي إنك تبقي معي والأيام رح تغيّرنا ورح تحبيني!.. كنت مصدومة بكلامه!.. ما توقعت هالنتيجة تصير!.. أنا ما تمنيت هيك يصير!!.. قوّمني وخاف من زراق رقبتي وسألني وما جاوبت.. طلعني وحكالي شكلك حلو بالفستان مع انه بحكو فال سيء العريس يشوف عروسته بالفستان!.. ما قدرت أحكي.. وطلعني بسيارته ووصلني على البيت.. قابلتني امي بإبتسامة ورضا وياسمين قالتلي رح أمكيجك أحسن من ألف صالون!.. كانت الساعة 7 المسا.. وأنا خايفة ومترددة.. رن تلفوني وياسمين بتمكيجني.. كان ورد.. حكتلي ياسمين لا تردي عليه.. خلص بيكفي يلي صار والحمد لله إنه كرم طلع إنسان عاقل لهالدرجة.. بصراحة انصدمت فيه وما توقعت يعمل هيك!.. رديت وقلتله شو بدك؟.. مو أخدت غراضك!.. قلي ريحانة وأنا بتطلّع على الأغراض لقيت شي خوّفني ورعّبني.. ركزت معه وطلبت من ياسمين توقف.. حكيتله شو شفت؟.. قلّي أوراق صفرة كانو بقفى العلبة من تحت مرسوم عليهم بقلم حبر!.. قلتله شو مرسوم؟.. تردد وقال خايف أحكيلك تفكّري أنا عملت هيك خصوصاً لسبب!.. أنا ما بيني وبينك شي.. صدقيني انا بتمنالك الخير.. بس شكلك مرسوم بطريقة غريبة وبجسم حيوان مع وضعيات غريبة أشبه ما تكون إنتحار أو قتل.. ومكتوب جملة إتبع أكثر من مرة.. هالعلبة كم سنة صرلك محتفظة فيها ؟!.. قلتله تعال على بيتنا بسرعة وجيب الورق معك!.. حكالي أنا وعدت خطيبك ابعد عنك نهائياً وكان بدي أحرق العلبة لهيك مزعتها بس لو ما مزعتها ما كنت كشفت هالصور يلي ملزقين تحتها.. ويمكن لو قرأتي باقي المكتوب تكرهيني.. قلتله ما بكرهك ولا تفكر كنت محتفظة فيهم لأني بحبك.. أنا إنسانة بحب أعذب نفسي بالذكريات ولسه محتفظة بأشياء من طفولتي البائسة لليوم برغم اني كان ممكن اتخلص منهم بس استنيتك تحكي معي متل ما توقعت ويلي توقعته صار لهيك اعطيتك ياهم.. قلي شو مكتوب وما رح اخاف!.. حكالي مكتوب على قفى الورق الطريقة يلي رح تموتي فيها مع التاريخ والوقت.
شو اكمل؟