#الاصبع_السادس.. حلقة الرابعة ٢
صرت أتطلع على الصور.. كانو لنفس صور البنت يلي شفتها بالكافيه.. نفسها!.. قلتلها هدول صور مين!.. قالت ليه بتسألي.. حكيتلها يمكن أكون بعرفها.. حكت لبنت من عنا إسمها تالا.. هربت من الدار من شهرين.. ومو عارفين نلاقيها.. انتي بتعرفيها؟.. قلتلها لأ مابعرفها.. طلعت مع أيهم من الدار وقلتله صورة البنت نفسها يلي بالصورة.. نحنا لازم نلاقيها قبل الشرطة ما تلاقيها وتوخدها.. حكالي وين كانت بأي كافيه.. طلعت أنا وياه بسرعه لنفس المكان يلي شفتها فيه.. سألت صاحب المحل قال أنه صرلها فترة ما أجت.. حكيتله شفت إنها بلا أهل متل ماتوقعت.. ويمكن لو قعدت مع خالتي تتعلق فيها وتنسيها بنتها الوهمية يلي بتتخيلها طول هالسنين.. نحنا لازم نلاقيها.. لفينا كل المنطقة يلي جنب الكافيه ومالقيناها.. سألنا عليها مكان مكان بس ماكنا نشوفها ولا يلاقوها.. تعبنا كتير وبعد وقت طويل قلي تعي لنروح ناكل.. دخلنا مطعم وطلبنا أكل.. بعد ماخلصنا وطلعنا من المكان وقفنا قريب منه عم نحكي.. حسيت في حد شد طرف ملابسي من ورا وسحبه.. لفيت راسي.. شفت البنت واقفة ومادة وردة عوجهي وبتقلي.. الله يخليكم لبعض.. اشترو مني!.. تطلعت بسرعة على أيهم وقلتله هيها !.. حكالي رزان اسكتي أنا رح أتصرف.. قلها حبيبتي شو أسمك.. حكتله أنا تالا.. قلها طيب رح أشتري منك كل الورد بس فيكي تيجي معنا شوي.. وافقت.. حكالها إطلعي بالسيارة.. طلعت وما سألت ولا سؤال.. صار يحكي معها بالهدوء ويقلها شو رأيك تروحي على مكان منيح يريحك أحسن من الشارع.. تتنضفي وتلبسي لبس حلو غير هاد.. قالتله لوين.. حكيتلها لعندي.. أنا حابه أعتني فيكي.. وفي ست كبيرة كمان رح تشوفك وتحبك.. شو قلتي؟.. قالت موافقة.. حكت هيك وانبسطت.. بس أيهم كان حابب يعرف عنها أكتر.. سألها أكتر من سؤال.. وقلها أنتي وين ساكنه ومع مين.. حكتله بدار أيتام.. أنا ما إلي أهل بس طلعت منها لأنه صرت أحسها متل السجن.. قلها خلص بتضلي عند رزان وهيه رح تعتني فيكي.. قالت بس أنا بخاف من المديرة تمارا.. لو عرفت إني عندها رح تقتلها.. حكيتلها ليه هالقد خايفة منها.. حكت لأنها بتخوّف.. وبتعمل شغلات هيه والبنات يلي بالدار بتخوّف كتير.. أنا عشان هيك هربت.. أستغربت من كلامها وماعرفت شو أجاوبها بس كنت قدر الإمكان عم بطمنها لتوثق فيه.. قلت لأيهم قبل كل شي خلينا نروح لعند دعاء.. قلي ليه.. حكيتله لازم اعتني فيها والبسها من لبس أختها عشان خالتي رميزة تشوفها بشكل حلو.. بفتكر هيك رح تتعلق فيها أسرع.. رنيت لدعاء.. قالتلي بس أنا رح أطلع لعند بيت أهله لحسن.. مامعي وقت.. أنا قبلت أسمع منها وقلتلها نص ساعه مابطوّل.. وصلت البيت واخدت تالا معي.. نزلنا من السيارة ودخلنا على البيت.. شفتها معصبة والظاهر مرتبكة من شوفتي.. قلتلها دعاء اسفه بس صدقيني ضروري هالشي.. حكتلي بس حاولي تستعجلي لأنه امي طلعت وحسن جاي بعد شوي.. مابدي يجو يلاقوني مو جاهزة.. دخلتها لغرفتها وسرحت شعرها ورشيتلها عطر.. ولبستها من لبس أخت دعاء وكانت جاهزة لتطلع.. استغربت أنه أيهم طلع على البيت.. وماكان بدي يجي.. بس هوه عفوي وبفكّر كل شي عادي وطبيعي.. دخل وحسيت دعاء ارتبكت من وجوده وبس بدها أخلّص بسرعه.. وقبل لنطلع أجا خطيبها حسن وشافنا بالبيت وشاف أيهم.. صار يسأل مين هاد وهيه مابتجاوب.. صارو يصرّخو على بعض وعلي صوتهم.. ودعاء حاولت تفك بينهم.. بس علقت أكتر وحسن مد إيده على أيهم.. وأنا نصدمت.. أيهم دافع عن نفسه وضربه وفجأة صرّخت تالا صوت عالي.. وتطلعت عليهم نظرة غريبة ودخلت بالنص بينهم وبعّدهم بإيدها بعنف ودفعتهم.. وضربتها لإلهم كانت قويّة كتير لحسيت إنهم تألّمو.. رفعت أصبعها السادس بوجههم وقالت لو فكّرتو تعملو هيك مرة تانية لا تلومو إلا نفسكم.. حكتلي خلينا نطلع.. وتركنا حسن ودعاء عم بتخانقو مع بعض بسبب وجودنا الغير مبرر بالبيت.. رحنا لعند خالتي.. وطلبت من أيهم يروح.. كان بدي نضل لوحدنا.. دخلت على البيت وصارت تتطلع عليه بشكل غريب.. قلتلها عجبك.. حكت ايوه.. وفجأة دخلت خالتي عالصالة من غرفتها وشافتنا.. تطلعت على البنت وماقالت شي.. ضلت تتصفن فيها.. وآخر شي قالتلي مين هاي!.. استغربت من ردة فعلها.. توقعتها تحكي شي تاني.. قلتلها بنت حابة تتعرف عليكي.. طلبت من تالا تروح لعندها.. قربت منها وباستها على خدها.. ماعرفت شو يلي خلاها تعمل هيك.. خالتي فوراً ضحكتلها وقالتلها شو اسمك.. قالت تالا.. حسيتها فرحت.. وحسيت انه البيت عاجبها كتير ومبسوطه.. بقيت كل النهار بتحكي معها وبتطعميها وفرحانه فيها وانا بتطلع عليهم ومابحكي وفرحانه انه رح أخلص من تهيؤات خالتي.. بس يلي استغربته انه البنت بتضل تروح لجوا وتتركنا قاعدين وتمشي بالبيت وتتفتل وترجع لعنا.. كل ساعه او ربع ساعه تعمل هالشي.. أجا الليل وحسينا انه الهوا رجع قوي بهالليلة.. وكان باين رح تمطّر.. سألتها وين حابه تنامي؟.. قالت لو عندك بكون مبسوطه.. حكيتلها أصلاً سريري كبير ورح تنبسطي فيه.. حكت أكيد.. خالتي قالت لأ بتنام عندي بس البنت اصرّت تنام جنبي.. حكتلها شفت عندها ألعاب كتير وبدي ألعب معهم.. قلتلها ألعابي عحسابك.. دخلت معي لجوا.. وفرشتلها جنبي.. قلتلها ليه حكيتي بدي ألعب معهم قصدك عن الألعاب.. قالت لأ.. انتي والبنت يلي هون بالبيت.. معك ومعها.. تطلعت فيها وقلتلها أي بنت!؟ حكت في بنت هون بالبيت كنت ألعب معها طول اليوم.. بس هلأ راحت
يتبع..
