كنت أحلم يكون ليلة العمر، طلع للاسف خايس بكل ما تعنيه الكلمة. سويناه باستراحه وبأقل التكاليف، مهري كان قليل وزوجي وقتها يقول ما معي فلوس. كنت أشوف أختي هي اللي تركض وتجهز الاستقبال والحلى وتزين المكان، وأنا كنت في حالة ذهول، مصدومة ومبسوطه بنفس الوقت، ومو فاهمة ليه أبوي وزوجي مستعجلين على العرس كذا!
مادريت إن الضحكة اللي على وجهي كان وراها نيه ثانية من زوجي. اكتشفت إنه كان يبي يقهر خطيبته القديمة اللي تركته، وأهلها لما شافوه تزوج استعجلوا وراحوا زوجوها لأي أحد بس عشان يقولون له شف مادرينا عنك وبنتنا انخطبت وتزوجت
تخيلوا صرت أنا 'الوسيلة' اللي يقهرون فيها بعض! وزوجي بكل وقاحة جالس يعلمني أخبارها، إنها تزوجت فلان وإنها ما تبغى تحمل، وأنا على نياتي أسلك له وأقول يمكن ما تبغى أطفال الحين.
أندم الحين ألف مرة ليه ما كرشته وقتها، ليه وافقت أكون تكملة عدد في لعبة كيد وعناد؟ انظلمت فرحتي، وانحرمت من الزواج الفخم والكوشة والتفاصيل اللي أشوفها مع البنات الحين وتكوي قلبي كوي. أحس إني انسرقت في أحلى أيام عمري عشان تصفية حسابات مالي فيها ناقة ولا جمل
