بسم الله الرحمن الرحيم
انا شغوفه بعالم الاجندات و احب انظم وقتي و ارتب اهدافي
كل سنه الحمدلله اتطلع اني اشتري اجندة جديدة للعام الجديد ... و بعتبرها ثروة قومية
حابه اعطيكم كم نصيحه في كيف تستفيدي من الاجنده
الاجندة مو بس عشان تذكرك بالمواعيد
الاجنده عشان تقسمي اهدافك ع خطة زمنية معينه و تكون قدام عينك طول السنه تعرفي ايش تحقق منها و ايش ضاع
كل شهر له خاصيه مميزة و له اهدافه الخاص حسب اهتماماتك و ادوارك
فمثلا شهر رجب لربة المنزل قد يعني تنظيف المنزل استعدادا لرمضان
و شهر شعبان قد يعني شراء ملابس العيد و عمل اكلات تسهل عليها الشغل في رمضان و هكذا
الاهداف كثير لكن لازم تعرفي ترتبيها
فيه امور مسلم بيها كل يوم .. مثل اعمل غداء .. او اتحمم او انام
هذي مو من ضمن اللي تكتبيه
ممكن تكتبي وجبات لكامل الاسبوع .. لكن انك تكتبي روتينك العادي لأ مو حلو
اذن
الاجنده عشان
* اهداف كل شهر تحققيها
* مشتريات لكل شهر تذكري نفسك بيها
* لو حابه تتعودي على عادة جديدة فهذي لازم تنكتب في الاجنده و تتابعي نفسك
اعطيكم مثال
هذا برنامج ديني احاول التزم فيه ان شاء الله
و القلوب اللي قدام كل عمل
املأها بالقلم الاسود اذا انجزت هذا الشي
و اذا ما انجزت هذا الشي اتركه فارغ من الداخل
يعني شهر كامل كل يوم خمسه قلوب
المجموع = 150 قلب .. و هذا اللي يقيم نفسي عليه آخر الشهر ان شاء الله
اشوف كم جمعت من 150
و اجندتي تذكرني بالمواعيد و المهام اليوميه اللي حابه اسويها هذا اليوم
و بالمشتريات لو حابه اجهز شي او اشتريه
هذي اجندتي
تقسيمتها من الداخل ما عجبتني كثير لانهم مقسمين اليوم ل صباح و مساء
فأنا خليت الصباح تذكير بالمهام و المواعيد
و المساء عشان اتعود ع العاده الجديدة ان شاء الله
مين تحب الاجنده مثلي ترفع يدها 🙋
