.. ايش التجهيزات اللازمة .. ايش المكياج الأفضل لـ صباح / مساء العيد .
و شوية أمور مهمة لطلة العيد
عنايتك بنفسك لازم تكون منتظمة و مو محدودة بمناسبات معينة .. أعرف كثير ما تهتم بنفسها غير قبل المناسبة بكم يوم و تبغى فرق كبير .. لا يا حبيبتى ما راح يبن الفرق اللي تحلمي فيه .
خليك في السليم و أتعودي تخلي عنايتك دايمه مو محدودة بمناسبات ، صدقيني بتشوفي الفرق واضح بعد فترة لابأس بها من الاهتمام و العنايه
(البشره)
كيف أجهز بشرتي ليوم العيد ؟!!
المفروض يكون عندك روتين عناية ماشية عليه من زمان و لما يقرب العيد تبدئي تضيفي عليه شوية جلسات عناية مكثفة مره بالأسبوع أو كل أسبوعين كافية سواء سويتها بالبيت أو في صالون أو مركز عناية بالبشرة .
لكن أعرف أغلبكم اما يهتم و يترك فترة و يرجع يهتم أو من الأساس ما تهتم ببشرتها
أهم أهم الأشياء اللي تسوي فرق في البشرة الموية>> اشربي كوب مويا كل ساعه تقريبا كذا تضمني انك رؤيتي جسمك باحتياجه من الماء"
خصصي لك وقت تعتني ببشرتك .. اما بعد ما تخلصي شغل البيت و الطبخ أو قبل ما تنامي.
بالنسبة لي في ليلة العيد روتين عنايتي كالعادة لكن أضيف ماسك منظف أو مقشر و أركز على ترطيب المناطق الجافة في وجهي .
و أنتم تقدروا تضيفوا الخطوة المناسبة لكم سواء تستخدموا مقشر بس أو ماسك مهدئ أو أي خطوة تحبوا تسووها قبل المناسبة
(العنايه بالجسم)
قبل العيد بيوم اسوي تقشير وتنطيف عميق للبشره
بالنسبة للعناية بالقدمين و اليدين للعيد بالعادة أسوي جلسة تنظيف و ترطيب عميقة لهم يوم 28 - غالباً مافي شغل كثير في الأيام الأخيرة فأستغل الفرص في تدليل يدي و قدمي -.
شوفتوا جل الفازلين بزبدة الكاكاو هذا ترطيبه يجنن ،، احط قبل النوم على رجولي و أصحى ألقيها مترطبة بشكل جيد - على فكرة ريحته سيئة جداً بالنسبة لي ، لكن اتغاضى عنها عشان ترطيبه ممتاز- .
(العنايه الشعر)
الافوكادو .. تخلطين 3 ملاعق زبادي حبة افوكادو زيت جوز هند عضوي ( تخلطين المكونات مع بعض وتحطينها على شعرك ساعتين .. النتيجة نعومه رائعه والنفشه تخف كثير )
تجهيز تسريحة شعري ليوم العيد غالباً ليلة العيد أكون صاحية في الليل فأسوي شعري و لأن عيدنا في الصباح فأفضل تسريحات الشعر المرفوعة و كمان لما نروح نعيد أكون بعبايتي أغلب الوقت و هذا يخيلني أختار التسريحات الناعمة الكلاسيكة .
أما في الليل فباب الأبداع مفتوح و أفكار التسريحات كثيرة لكن غالباً ألف و أدور و أرجع أسوي شعري كيرلي - أريح شيء
(المكياج)
لازم تكوني مخططة للي بتسويه من بدري حتى يكفيك الوقت و تلحقى تعيدي مع الناس من بدري .
مكياج العيد في الصباح عندنا يكون بسيط و ناعم خصوصاً أول يوم في العيد الناس بتجي تعيد و تشرب قهوتها و تمشي و أنتِ بتحتاجي تتحركي كثير و ممكن تخرجي تعيدي كمان من غير التصوير في أول يوم في العيد . لو كان طابع عيدكم كذا فالأفضل تختاري منتجات مكياج ثباتها طويل و تتحمل الحر و الرطوبة.
و في الليل و العزومات أطلقي ابداعك لأنه غالباً تكوني ضيفة - طبعاً مو تبدعي فوق المعقول لو كان طابع عيدكم كذا فالأفضل تختاري منتجات مكياج ثباتها طويل و تتحمل الحر و الرطوبة.
عموماً لبسك و تسريحتك يوم العيد تحكم مكياجك و كمان طابع عيدكم و متى تخرجوا تعيدو و طبيعة العزومات في مجتمعكم كيف كلها تحدد اختياراتك في لوك المكياج .
لو كان لبسك ملفت سواء لونه قوي أو مشغول أو في ضمن تنسيقك قطع بارزه فالأفضل مكياجك يميل للهدوء و النعومة يعني ما تشطحي كثير و تخلي مكياجك بارز، أعطي كل شيء في مظهرك حقه بيطلع شكلك ناعم و مرتب و الأناقة تقطر منك .
تنسيقك للبسك هادئ و ناعم ، حلو إنك تبرزي شيء في مكياجك .. الآيلاينر فيه مجال واسع للإبتكار ممكن تستخدمي فيه أكثر من لون .. تخلي فيه لمحة جرافيتيه ، الظلال ، الروج كلهم نفس الشيء لكن الأفضل و الأسلم تعتمدي على إبراز شيء واحد في مكياجك .
و أهم شيء أعطي عمرك حقه ، البعض يخطيء في اختياراته في المكياج فيظهر بشكل مايناسبه و ممكن يعطي عمر أكبر .. فلو كان عندك أحد يعرف في المكياج أمك .. أختك .. قريبتك .... استشيريها في اختيارك ممكن تنبهك لشيء غفلتي عنه .
و بعد ما انبسطنا و فرحنا و رجعنا للبيت باقي شيء مهم !!
تنظيف البشرة من المكياج و ترطيبها .. مهم مهم مهم جداً ، انتبهي تهملي هالخطوة .
💕
