#هدو��_قاتل_قصص
#هدو��_قاتل_10 #هدو��_قاتل
الحلقة العاشرة
ركضت للبيت وصرت أنادي على إبني معتز.. كنت متطمنه وقت دخلت البيت إنه نايم وبأمان.. بس بهاللحظة قلبي حس فيه إنه بخطر.. البيت كان عتمه وماكان في صوت غير الصراخ يلي طالع من الطوابق العلوية.. صوت البنات وما كنت بعرف شو يلي بصير معهم.. دخلت الشرطة للبيت معي ومريم وزوجها وعبد الله.. كنت ضاوية المصباح وبسألهم وين إبني!!!.. قلي عبد الله تركناه نايم بغرفة أهلي فوق.. طلعت ركض وسمر وإياد بقيو ببيتي.. وصلت ودخلت غرفة النوم مالقيته.. فتشت البيت كامل ماكان موجود.. وأنا نازلة لتحت لمحت عيني على علبة الكهربا الرئيسية يلي موجودة ببيت أهل عبد الله.. شفتها مفتوحه وجنبها كرسي.. استغربت وعرفت إنه في حد قطعها عن البيت.. سألت نفسي معقول يكون معتز يلي قطعها لأنه صعب يوصلها بدون كرسي.. رفعت القاطع الكبير.. رجعت الإضاءة بكل البناية.. نزلت للطابق التاني.. ماكانو موجودين.. ناديت عليهم ماكان في حد بالبيت.. نزلت لبيتي وسألت سمر وإياد وينهم؟!.. حكو راحو كلهم لليمين وباين إنه البنات مرعوبين وعم ببكو.. حكيتلهم للتسوية!.. الطابق الأرضي.. يارب ما يكون صار يلي خايفة منه!.. ركضت بكل قوتي ولحقني إياد مع سمر لتحت.. نزلت لقيتهم متجمعين بالغرفة يلي لقينا فيها جثة إبني مجد.. بعدتهم عن بعض.. لقيت معتز واقف على كرسي بالزاوية وحاطط سكين على رقبته.. حاولت أقرّب منه.. الشرطي بعدّني وقلي خليكي بعيدة بلا ما يأذي نفسه.. سأله ليش بدك تقتل نفسك؟.. حكا هوه أمرني.. وأنا إشتقت لأخوي مجد وبدي أروحله.. قله مين يلي أمرك؟.. حكا يلي عايش هون بالبيت.. أنا بشوفه كل يوم وبحكي معي.. حكيتله ابني بعدها عنك أرجوك.. حكا ماما انتي لازم تقتلي نفسك.. مجد بده يانا.. هوه قله إنه اشتاقلنا.. حكاله الشرطي هوه عم بحكي معك هلأ !؟.. قله أيوه سامعه بقلي لازم يطلعو من الغرفه بسرعة قبل ليقتلكم.. سأله وينه هلأ ؟.. حكا هوه حوالين البيت عم بمشي.. وجاي لعندكم.. عبد الله توتر وقال للشرطي لازم نقرب من الولد.. السكين رح تجز رقبته.. منعه وقله خلينا نسمع منه كل شي.. حكا معتز عم بقول إنه رح يقتل ماما.. متل ماقتل مجد.. أنا خفت وصرت بتطلع على الباب وكلهم مترقبين وعيونهم عليه.. وفجأة وقع شي برا الغرفه.. سمر كانت جنب الباب.. قلتلها شو يلي وقع؟.. حكت في أغراض عم توقع لحالها.. وكأنه في حد عم بزيحها.. الشرطه صارت تتطلع ببعض.. وأنا حابسه دمعتي ونفسي عم بطلع بصعوبه.. وفجأة همس معتز بصوت واطي.. صار هون.. قله الشرطي عم تشوفه؟.. كيف شكله؟.. صار يقول.. زلمه أبيض.. لحيته بيضه وطويل كتير.. وعنده شامه كبيرة على خده.. أنا ذهني راح فوراً لمختار !.. المريض يلي مات.. صاحب الجثة يلي كانت بالبيت.. هاد شكله.. هاد هوه !.. وقبل ليكمل كلامه.. حسيت في شي ضربني على راسي ووقعني.. قرّب مني إياد وحاول يقوّمني.. وفوراً نضرب وصار يصرّخ.. قرّبت سمر وصارت تعمل حركات برجليها على نفس المكان يلي عم نحس فيه هالشي عم بضربنا.. نسحبت لورا ونشد شعرها.. مسكوها الشرطة وقالولنا لازم نطلع من هون.. تطلعت على إبني وصرخت من بعد ما شفته جرح رقبته بالسكين ووقع عالأرض وصار بنزف.. أخده شرطي وطلّعه لبرا وأنا لحقتهم.. الكل كان عم بطلع من البيت ورانا.. صرت ببكي وبحكيلهم أنا رح أموت لو صرله شي.. بترجاكم خلوه يعيش.. بترجاكم!!.. راحت السيارة وبقيت ببكي جنب البيت بالشارع.. لحقهم عبد الله بسيارته والبنات ماكانو قادرين يمشو خطوة لجوا البيت.. سألوهم الشرطه يلي بقيو بالبيت شو يلي شفتوه فوق؟.. قالت حنين معتز طلع لعنا وحكالنا إنه حيصير في جريمه بعد شوي ورح تنقطع الكهربا.. طلع لفوق مره تانيه وأنا حاولت ألحقه بس فكرته عم يخوفنا ويحكيلنا هيك لنلعب معه.. لأنه كتير بعملها.. بس نصدمنا وقت قطعت الكهربا ونازل عم يحكي أنا معي سكين أنا معي سكين!.. قال الشرطي أي مكان آمن ماصار جواته شي من يلي صار اليوم نامو الليلة فيه.. بكرا نحنا رح نتصرف.. بقيت دورية برا البيت.. وأنا قلت لإياد خدني على المستشفى.. ونحنا طالعلين لبرا شاف سيارته.. وانصدم من منظرها.. تالفه ومدمره.. شافوها الشرطه وسألوني .. قلتلهم يلي صار معي وأنا جواها.. أخدت تكسي ورحنا للمستشفى.. حكيت مع الدكتور وقلتله بدي أشوف أبني.. قلي هوه بغرفة العمليات.. مافيكي تشوفيه إلا ليطلع.. قلتله أنا دكتورة.. بمستشفى تاني.. خليني أدخل لو سمحت.. حاول يمنعني بس أنا دخلت بالقوة.. بقي إياد وسمر بستنو برا.. دخلت غرفة العمليات وشفته.. كان آذي نفسه بشكل كبير ناحية الشريان.. الجرح أثّر على مجرى التنفس ونزف دم.. وخبروني بإنه يمكن العملية ماتنجح وممكن يموت.. طلبت منهم أجري العلمية بنفسي.. قالو ممنوع وهالشي مخالف.. ماسمعت كلامهم وفوراً لبست روب وعقمت أيدي ومسكت الأدوات يلي قدامي.. حكيتلهم اسجنوني أنا مارح أخسره.. وبدي أنقذه بإيدي.. بقيت ساعتين معهم عم بعمل العملية.. دموعي اختلطت بدمه.. وعشت أصعب لحظات حياتي.. أخدت القوة منه وعيوني بقيت عم تتذكر اللحظة يلي شفت فيها إبني مجد ميّت وروحه الغاليه غابت عني للأبد!.. كنت سامعه صوته بأذني.. وحاسه فيه بطلب مني أنقذه ليعيش.. طلعت من العملية ببكي.. وإياد وسمر بسألوني شو صار؟!.. قلتلهم إبني عاش.. ابتسمو وسمر حضنتني وبكيت معي.. روّحت لبيتهم وكنت متطمنه إنه معتز بخير.. مضى هاليوم الصعب والصبح وصلني مكالمة من الشرطه.. بحكو للأسف حق إبنك يمكن مايوصلك.. القاتل ماكان بشر.. متل ماتوقعنا.. راقبنا الكاميرات مبارح بالليل بالبيت وحواليه بعد ماطلعتو.. واتضحلنا اليوم من بعد ما شفناها.. إنه في حركة غريبة ضلت عم تصير طول الوقت لوجه الفجر.. الشجر كان بتحرك عكس حركة الريح.. وباب البير كان بفتح وبسكّر لوحده.. عدا عن الخيالات يلي كانت تمشي جوا بيتك وبزوايا الغرف وعمدخل التسوية يلي مات فيها إبنك.. حكيتله يعني شو.. مارح أعرف قاتل إبني.. حكالي لو القاتل نفس الشخص يلي قلتي عنه.. فمستحيل نقدر نسجن شخص ميّت.. حكيتله كيف الميت فيه يأذي وهوه ميّت؟.. قلي مابعرف بالروحانيات للأسف.. انتي عارفه مهنتنا بتنبنى كلها على شي ملموس.. هاد الشي أول مره بصير معنا.. حكيتله أنا بدي عنوان أهل مختار.. حكولي مختار المريض يلي مات عإيدك بالعملية ؟!.. حكيتله أيوه المجرم مختار !.. بدي أشوف أهله.. أنا متأكده همه بيعرفو الحقيقه.. قبل لأخسر إبني وأخسر حالي لازم أنقذ نفسي من يلي حطّوه فيني.. حكالي في شي ضروري لازم تعرفيه.. مختار ماطلع المجرم يلي نحنا كنا بندوّر عليه !!.. قلتله كيف يعني!.. قلي يلي مات بالعملية ماكان المجرم.. حكيتله كيف هالكلام فهمني.. لكن مين يلي حققتو معهم.. مو اهله للمجرم!!.. قال صح نحنا حققنا مع شب وبنت.. بس اليوم نمسك مختار.. وهوه بالسجن حالياً مو ميّت.. يلي مات نحنا مابنعرف مين هوه.. إسمه مختار بس بالسجلات مو موجود.. وحتى يلي حققنا معهم اختفو ومابنعرف مين همه كمان !!.. حكيتله أنا رح أنتهي خلص.. أنا ضعت.. طيب مين بكون يلي مات.. مين صاحب الجثة !!.. قال حتى صاحب المقبرة مابعرف لمين الجثة.. نحنا كنا مخربطين.. ويلي صار تشابه بالأسماء فقط.. الشخص يلي أنقذتيه كان شبه متشوّه.. فكان صعب علينا نتعرف عليه وانتي عارفه الميت بكون شكله غير عن الشكل الطبيعي العايش.. بصيبه تنفخات وافرازات وكتير أمور بتجعل شكله يتغيّر.. بس المجرم عنا ومو هوه.. حكيتله خليني أشوفه لو سمحت.. قلي عشان ظرفك الصعب رح أسمحلك بالرغم من إنه هالشي ممنوع كونه مجرم خطير.. نزلّني معه على سجنه الإنفرادي.. فتحلي الباب.. وناداه ليقرّب مني.. شفته.. وصفنت فيه كتير.. ماقدرت أعرف مين هوه ومتأكدة إني ولا بعمري شفته !!
يتبع..
لا يوجد أي ردود على هذا الموضوع
