هدوء قاتل الحلقة الاخيرة 2😱😱😱😱

#هدو��_قاتل_قصص
#هدو��_قاتل_12 #هدو��_قاتل
الحلقة الأخيرة (2)

حسيت إنه الجثة ملعونه وعملت أثر بالبيت من بعد مادخلناها وبلينا مرت أخي فيها لحتى الشرطه تفكّر إنها بتعرفه وعم تنتقم منه.. وفرحنا وقت عرفنا إنه في مجرم على إسمه مفكرين إنه هوه.. حكيتله خفف زيارات.. الوضع مو مستتب.. بس هوه قرر يجي.. التقينا بالحديقه وحكينا بهدوء بالليل.. كانت أم ليندا برا وسمعت كلامنا.. أنا كنت حاسه إنها شاكّه فيه أنا واخواتي من زمان.. لهيك قلتله أطلع وأنا بحكي معها.. بررتلها مافهمت.. وفكرتني على علاقة بقاتل إبن بنتها.. توسلتلها لحتى ماتقول عنه لأهلي لأنه مارح أشوفه.. ووعدتني.. كانت قد وعدها.. بس نصدمت إنه معتصم رجع.. ولقيته بنص البيت.. طلبت منه يطلع ماقبل.. وصار بينا شي.. ندمت وبكيت.. حكالي رح نتزوج لا تخافي.. قلتله بكرا الصبح أم ليندا حتقول كل شي ورح أنفضح.. قلي رح أخلصك منها.. نزل لبيتها وقتلها بطريقه إحترافيه والدرج المفتوح بينا وبين بيتهم سهّل كل شي.. قلتله شو عملت!!.. قلي في شي عم بصير تحت وكان باين انه خايف.. انتبه انه خاتمه مفقود وقلّي بجوز وقع مني وأنا بركض لأني سمعت ليندا بتنادي على إبنها بالمطبخ.. قلي حسيت إنه في شي عم بشدّني وبحركني لا إرادياً.. خاف وقلي مارح أرجع.. طلب مني مصاري وحسيت إنه بخدعني وتوقعت إنه قتل مختار يلي بشتغل عندهم مو شخص تاني.. لطمع أو لشي تاني.. لهيك استغربت إنه وافق يقتل أم ليندا بسهولة ويمكن كان طمعان فيها.. ندمت تاني مرة.. وغلطتي الأكبر كانت وقت قتلت افين.. حسيتها شاكه فيّه ووجودها السريع بعد مانقتلت أم ليندا خوّفني.. قلت ممكن تكون شافتنا !.. لهيك طعنتها بالحديقه بعد ماراقبتها من فوق ونزلت من باب طابقنا الخلفي.. كانت عم تصوّر شي بالتلفون.. بس قبل لأقتلها شفتها بتركض وخايفه.. وكأنها شافت شي رعبها.. استغليت خوفها وقتلتها.. توقعتها شافت الحرامي يلي مسكوه من بعد ماكشفو الجريمه.. بس متأكدة إنها شافت شي تاني!.. بعد هالكلام.. مسكّو قاتل أمي.. وعرفو أهل عبد الله بجريمة بنتهم.. الشرطة حققت مع إبني معتز بعد ما طلع من المستشفى.. وسألوه ليه قتلت أخوك!.. قال ماقتلته.. مالمسته.. قالوله بس أنت يلي رميت راسه بالحديقه!.. قال الصوت.. الصوت.. الزلمه يلي بحكي براسي!.. يلي بشوفه.. هوه أمرني أحط راس مجد بكيس وأرميه.. قال وقت رميته برا.. كانت ماما بتحكي مع شب.. وكانت بتقله أطلع من هون.. بس ماكانو شايفيني من الظلمه.. حطيته وراهم ورجعت هربت لجوا.. ماكنت بعرف ليه بعمل هيك.. بس في شي كان بسيطر عليه برغم إني حزين على أخي كتير.. الشرطة تعقدت.. وأنا تعبت نفسيتي.. إذا حنين وحبيبها قتلو أمي وخدامتها.. مين يلي قتل إبني.. مين يلي عمل فيه هيك.. مين!!.. راحت الشرطة تشوف المكان يلي نقتل فيه إبني مرة تانيه.. وبعد معاينات مكثفة وفرز لكل الكراكيب الموجوده بالغرفه.. لقيو آلة فرم لحمة يدوية قديمة حادة .. ومن خلالها قدرو يعرفو كيف تمت الجريمة .. بس السؤال كان عم بغيب وبرجع من جديد.. مين القاتل !!.. تذكرت كلام هيام.. اني مسحوره.. ويلي حكوه وصار قدام عيونّا كلنا.. بقول فعلاً في سحر وقوة خارقة تحكمت بكل شي.. سر الطوق والتاريخ.. أذية إبني معتز لنفسه.. وحمله لراس إبني مجد للحديقه.. سألت نفسي ليه حطو بالوقت يلي كنت بحكي فيه مع إياد وجنبنا ونحنا مو حاسين؟!.. هاد ما اله غير تفسير واحد.. السحر راد يأذيني أنا وإياد سوا.. من بعد مايلاقو جثة إبني.. رح يكشفونا بالحديقه ويشوفو راسه جنبه.. التهمه بتلبسه وأنا بنحرق قلبي عإبني.. رحت لهيام أنا وإياد.. قلتلها انقذيني بترجاكي.. فكّي هالسحر عني متل مافكيتيه عن غيري.. أنا خايفه عإبني وعحالي. الخوف ماعم بفارقنا.. قالت جيبي الطوق.. رح أعرف وين مخبى السحر من خلاله.. حكيتلها هوه معي!.. أخدته وقرأت التاريخ.. قالتلي إحكيلي كل شي صار بهاليوم من أول الصبح لآخر المسا.. حكيتلها قبل عشر سنين هالكلام مو متذكره!.. إياد قال أنا بتذكر كل تفاصيله.. مابنساه أبداً.. بتذكر كنا بساحة المستشفى.. كنتي لسه طالبة متدربة فيه.. وكنت جايبلك ياه هديه.. انتي كنتي معصبه وقتها.. كان صاير شي.. بس قلتيلي بهالهديه نسيت يلي صار.. فرحتي وحكيتلك هالتاريخ لو مر عشر سنين عليه نفسه وماكنا مع بعض رح يكون يوم موتنا.. حكيته بصوت عالي وقدام كل الناس.. حكيتله صح.. بس شو يلي كان صاير معي!.. قالت هيام هاد شي مهم.. اتذكري.. حاولت أتذكر ماقدرت.. وفجأة قال إياد.. صح.. بتذكر في وحده أسعفتيها وكان وضعها مزري.. وقلتي إنك غلطتي بشي بجسمها وخايفه يصيرلها شي.. كنتي معصبه ومنكده وانا قدرت أروقك وانسيكي هالحدث السيء.. حكيتله صح.. ولهلأ مابعرف اذا عاشت أو لأ.. لأنه كنت متدربه وطالبه وجازفت فيها لأثبت نفسي.. متل ماصار معي بالعملية.. قالت هيام.. لازم تفتشي على هالبنت لنعرف اذا عايشه أو لأ.. طلعت ببكي وإياد بهديني.. وخايفه لأنه هيام ماقدرت تعرف مكان السحر من الطوق.. بس فهّمتني إنه نعمل على نفس التاريخ ليصير حدث سيء معي بالتزامن معه وبعد عشر سنين.. عشت أشهر وأنا مكتئبه وحزينه والخوف لحقني للبيت الجديد يلي استقليت فيه مع إبني.. الهواجس والرعب يلي كان معنا توقعت ينهيني بعد فترة قصيرة.. لوقت ما نطرق باب بيتي.. ودخلته بنت أول مرة بشوفها.. قالتلي أنا نويل .. معلمته لمعتز بالمدرسه.. طلبت تشوفه وقالتلي جيت خصوصاً لهون لأدرسه الدروس يلي راحت عليه وقت كان بالمستشفى.. ابنك تلميذ شاطر ومحبوب.. انبسطت ورحت أعمل عصير.. وفجأة قلبي نقز.. حسيت في شي بعمري ماحسيته.. تركت يلي بإيدي ورحت فوراً للغرفه.. شفتها حاطه سكينه على رقبته وبدها تقتله وايدها على تمه.. صرخت وقلتلها لأ بترجاكي لأ.. حكتلي توقعته يموت متل اخوه.. بس عمره طلع طويل.. قلت باجي لأنهيه بإيدي.. حكيتلها ليش وانتي مين.. حكتلي أختها.. أختها للبنت يلي قتلتيها قبل عشر سنين بسبب غلط طبي.. وبسبب إستهتارك.. حرمتيها من ولادها التنين وحرمتيهم منها.. يا لطيف قديشك حقيرة.. بالوقت يلي قتلتيها فيه.. كنتي عم تضحكي مع حبيبك برا.. وكأنك ماعملتي شي!.. أهداكي طوق وحفرلك تاريخ هاليوم الأسود وقلك لو عشنا لهالوقت وماكنا لبعض رح يكون يوم موتكم.. كان معه حق لأنه فعلاً كان يوم موتكم.. هاد اليوم كان يوم موتك انتي وولادك.. وأنا يلي عملته بإيدي.. ماقدرت أنتقم منك من بعد ما قدمت فيكي شكوى لأنه ما أستفدت شي لأنك بنت وزير وواصلة مافيه حد يدعسلك عطرف.. بس انتي بتدعسي عالناس وبتقتليهم بدم بارد.. لهيك بنفس اليوم سحرتك.. بسحر الشياطين بتعجز عليه.. ودمرتلك عيشتك.. سحر مؤقت كان عم يمشي معك يوم يوم لوقت ما يجي هاد اليوم.. رح تكوني فيه متزوجه وعندك وولاد.. ورح تخسريهم بأحداث رح تتلخص بالأشياء يلي رح تصير معك.. يعني كل شي سيء رح تشوفيه بهاليوم رح يقلب عليكي لجحيم.. ورح يأذيكي.. وغصب عنك رح تتدمري.. متل ما انهيتي حياة اختي وحرمتينا منها !.. روح جثة قاتل خفي رجعتلي حق أختي منك وسيطرت على إبنك التاني ليقتلك ويقتل نفسه ! .. بالوقت يلي كانت عم تحكي فيه وترجف وبإيدها السكين أجا إياد.. دخل البيت وسمع كل شي.. دخل البيت بهدوء لأنه كنا متزوجين.. هجم عليها وضربها لوقعت السكين من إيدها وربطها وطلب الشرطه.. دقايق وأخدوها وانا بحالة صدمه.. بعد يوم شفتها وحكيت معها.. شرحتلها عن حزني بخسارة إبني وعن خوفي بخسارة التاني.. طلبت منها تكون أحسن مني وتغفرلي هالغلطة يلي دمرت حياتي.. وتقلي وين السحر يلي دمر حياتي لحتى أفكه وابعد الخوف والشر عني.. وبالفعل قالت.. كان مدفون بنفس أرض المستشفى يلي كنت قاعدة فيها بهداك اليوم مع إياد.. طلعته وهيام فكته عني.. الرعب اختفى من حياتي.. وخوفي على إبني راح.. بس حزني على مجد ما راح.. كل فترة كنت عم بزور قبرة مع معتز وببكي وبطلب منه يسامحني.. يسامحني على الغلطه يلي غلطتها بحق هالإنسانة يلي حرمتها من أختها وحرمت ولاد أختها من أمهم بسبب إستهتاري وخوفي من أوامر أمي لأكون شخصية عنيدة وصاحبة قرار .. غير عن الشخصية يلي هيه صنعتها فيني من أول حياتي لهاللحظة يلي ندمانه فيها.. يمكن لو رجع الزمن كنت حاولت أختار.. وكنت بعدت عن كل شي نفرض عليه بالقسوة بشكل صحيح.. بس الندم ما بيصلح يلي راح.. الندم بيخلينا نتعلم من الأغلاط يلي عملناها خارج إرادتنا وغصب عنا لنكون أقوى من قبل ولحتى ما نكرر الغلط مرة تانية.
هدف القصة
الأخطاء الطبية يلي بتحصل بالمستشفايات أخطاء مابنغفرلها أبداً.. للأسف في كتير أطباء بالدنيا بلا ضمير وبلا إنسانية.. بيتعاملو مع المريض بدون رحمة وبإهمال تام لحالتة الصحية ومابحافظو على حقوقه كإنسان.. وبينسو قسمهم أمام الله بعد مزاولة المهنة.. وبيتجردو من معاني الأخلاق المهنية وواجباتهم كأطباء ناسيين إنهم بمارسو أسمى مهنة بالوجود.. في كتير ناس أنتهت حياتها كاملة بسبب خطأ طبي.. وفي ناس ماقدرت توخد حقوقها.. وفي كتير تسببو بأضرار قاسية سواء كانت نفسية أو جسدية.. بتمنى نجد أحكام قضائية عادلة ورادعة للمخطئين والمستهترين بأرواح الناس.. وبتمنى من كل طبيب يحط ضميره بين عيونه قبل ليستهتر بحالة أي إنسان مريض.. لأنه الصحة أغلى شيء ممكن يملكها هالإنسان الضعيف.. وما بعتقد في أغلى من الصحة لكل بني آدم ويلي مستحيل إنه يرضى لشخص المفروض إسمه طبيب.. يسلبها منه بسبب غلطة صغيرة.
النهاية...
رأيكم.. ❤