من 3 أيام بالضبط
كنت قاعدة انا وجوزي وسهرانيين كل حدا فينا ماسك جوالو وقاعد مع شلته عالواتس
بقوم رفيقو الله لا يوجهلو الخير زتلو فيديو أغنية ديسباسيتو
وكاتبلو فوق : يا هيك النسوان يا بلا .. نوتيلاا يا زلمة نوتيلااا
مو متل يلي عنا غوريلا وتريلاا
مارح تصدقوا اذا قلتلكم ضل 4ساعات وهوي فاتح عيونو هيك وك ما رمش عينو حتى ما يروح عليه شي ...
وكل شوي يطلع عليي بإشمئزاز ..
قلي : تعي تعي تعلمي هيك رقص ولي عليكي ...اتدلعي واتمايلي متلون ولا ما بيطلع معك
قلتلو : لا شو ما بيطلع معي ياما مكسرة البست بالصالات تكة رايحة عالمطبخ شوي ((هادا ما قلتلكون انو المطبخ هو عبارة عن تجميع القوة الرقصية والموهبية لكل إمرأة وخاصة أثناء الجلي ))
قعدت أعمل تحماية وتشحيم وتزيت العضلات العاطلة عن العمل .. وصرت ارقص بالمطبخ رقص غربي على شرقي بشل وك فشرت شاكيرا قدامي
بس رحت لعندو لبلش ارقص مابعرف شو صرلي ...
مديت رجلي لقدام وهزيتا تلات مرات ..
رفعت راسي لفوق ونطيت نطة
وصرت هز وجدبتا
مابعرف شو صرلي قدامو كأنو في شي ملقط مكلبشني حاولت ارقص #ديسباااسيتو .. بس ماطلع ديسباسيتو طلع فشكاليتو متل رقص خجو وصبحية بمسلسل بكرة احلى
قلي : هلق بربك هاد اسمو رقص والله طالعة شبة خفاقة البيض
أو متل متل الغسالة الخربانة
لك حتى متل يلي ضاربها توتر عالي ومتكهربة ب220 فولط
وين خصرك يلي بهز .. وك بزمتي ما شفت شي يهز إلا كرشك . افففف ياااااه شو هااااااد والله غير اتزوج عليكي
........
نفخ بوجهي تركني وراح عالغرفة التانية ورجع شغل الفيديو وضل يعيدو.. وك ح موت قهر وغيرة .. رحت احكيه وبررلو هالإعاقة العضلية الرقصية وصرت العب بأصابيعي وقلتلو تشرب قهوة ياروحي
قلي : قهوة ومعك وك ما انتي خربتي مفصلات المزاج وجلعصتي التلافيف يلي بمخي .. شوفي منظرك وشوفي هدول روحي عن وجهي
يالله شو بكيت وبكيت فقت الصبح عيوني مبجبجين من البكا..
راح ع الشغل ...
أندق الباب طلعت جارتي أم النور بدها تشرب قهوة عندي .. بس شافت عيوني هيك انجنت قالتلي لك شبكي ؟؟؟ شو صاير معك !!!
(( رح احكيلكم لمحة سريعة عن أم النور .. قوية .. قوية .. حية حية حية .. لعنة مكبرتة .. حاقدة .. ماحقة .. كارهة كل رجال الدنيا .. لو بإيدها كانت جمعت كل رجال العالم وحطتهم بحفرة وزتت عليهم زيت كاز وحرقتهم و محت كلمة رجل من قاموس التاريخ .. أو مارست أبشع أنواع التعذيب بحقهم من بعد خيانة أبو النور إلها )))
قالتلي: شو باكي احكي .. جوزك المقوص مزعلك اكيد ؟؟؟
قلتلا : أي وركضت ع حضنا صرت ابكي وقلتلا انا سمينة وبشعة هيك عم يحسسسني .. كلا من اغنية ديسباسيتو بس شاف كيف النسوان جسما حلو وكيف عم ترقص بلا كرش صار بدو يتزوج عليي
قالتلي كلمتين حلوين : قالتلي كرشك شبو قليلي ..
كنتي قليلو هاد الكرش بوابة خروج أطفالك ع الدنيا .. يلي متت وانا أحمل ووأتوحم وأولد مو متل كرشك يا معفن يلي مو نافع غير للأكل ...
ليكي ولي جحشة اذا بدو يهددك بالزواج مشان كرشك قلعيه والخيط يلي باقي بينك وبينو اقطعيه ونتفي شواربك فيه .. أو انكشي ونضفي سنانك فيه ..غير هيك مارح تستفادي من الزلمة.. أو ليكي الخيط يلي عم احكيلك لفيه على رقبته و اخنقيه
قلتلا : كيف ؟؟؟
قالتلي : تعي قربي أدنك لعندي وعملي هيك هيك هيك هيك هيك
...........
بس اجا جوزي كنت حاطة اغنية ديسباسيتو ومندمجة وعم هز براسي.. قلي شو مرتي عما تتعلمي منهم انشالله !!
طلعت عليه بقرف واشمئزاز وفتلت وجهي وبلشت غني .. رجع لعندي قلي شو مالك تطلعي عليي هيك ..
رفعت قميصو عن كرشو وقلت انيييييع
رجعت أتطلع على جوالي وغني ديسباسيتو
رح يجن انو شبني انا ..
رجع قرب راسو لعندي وقلي وك شبك شبك ..
رجعت انا حطيت أيدي على شعراتو بكل قرف وقلتلو انيييييع
قلي لمين هي انيع الي ؟؟ هاتي الجوال لشوف ..
كنت مطبقة فيديو للاعبين ريال وبرشلونة مع بعض واحلى الصور وقلتلو : بربك هاد شكل وانتا شكل
هاي لياقة وانتا لياقة
هاد شعر وانتا شعر
هاي عضلات وانتا عضلات بربي انتا كتلة كرشية تتدحكل في الملعب .. وك انتا كتلة لحمية تأكل وتشرب فقط
شوف شوف تعلم منهم ...شكلهم ..ييييه شو جاب لجاب
هوي عمل عيونو هيك وآخد وضعية المصدوم
قلتلو بعد عني هفففف خليني اعرف اسمع الأغنية ورحت حطيت السماعات بأدني وبلشت غني مع الأغنية بصوت عالي
ديسباااااااااسيييتوووو😂
روح شوف كرستيانو رونالدينو.
وميسي يلي مالو نتفة كرشيتو
وبيكيه يلي شعراتو بجنننيتو
الإرجنتيني والاسباني والايطاليتو
والله رح عيشك على المعكرونيتو
فافوريتو فافوريتو
بسيتو بسيتو والله لأخرب بيتو ..
على كل دمعة بكيتو بكيتو
جنننتو وانا غني
أجا لعندي شال السماعة وقرب لعندي وقلي حاجيتو حاجيتو والله انصرعيتو
شو رءيك يا روحي نروح نتغدى بالمطعميتو ...
ولبسي الفستان الاحمريتو... يلي لبستيه وقت شفتك فيه وطار عقليتوو
يا أجمل النساء بالكرة الأرضيتو😂😂😂😂😂
...........
جابت نتيجة هالأم النوريتو 😂😂😂😂😂
