السلام عليكم حبيت اشارككم قصة حملي و انا للحين ماولدت ان شالله بعد رمضان موعدي 🙏 الله يتمم لي و لكل الحوامل على خير , بداية لما تزوجت اشترطت على زوجي اسافر سفرة ثانية غير شهر العسل عقب احمل 😂 بس للأسف بعد زواجنا بشهرين راح الخدمة الوطنية " تجنيد الاجباري لمدة تسع شهور " تزوجت ااخر شهر واحد و اهلي كانو مقررين يسافرون على شهر ثمانية وهو وافق اسافر معاهم .. المهم قبل السفر بشهر وقفت امنع و لما كنت بالسفر صارتلي اشيا غريبة بجسمي .. حللت بالسفر طلعت حامل ومع تعب السفر ماكملت ثلاث ايام ونزل 💔😞 الحمد لك يارب .. رديت البلاد و بديت احاول احمل مرة ثانية .. شهر شهرين ثلاث شهور احلل وعلى اعصابي لين رابع شهر حللت وطلعت حامل الحمددلله يارب ترزق كل محروم .. اول ثلاث شهور كرهت الاكل مع لوعة لكن الترجيع كان خفيف الحمدلله .. دخلت الخامس نزل علي دم و خفت لاني ما ااخذ مثبتات.. رحت المستشفى جيكو عالمهبل و الرحم وعنقه والبي بي كل شي مافي ولاقطرة دم .. بس كل ما اروح الحمام يطلع 😢.. طلع فيني التهاب بول شديد خذيت مضادات تحسنت لكن قالو بيجوفون كليتيني احتياط يمكن في حصة و الصدمة ! جافو بكليتي اليمين كتلة كبيرة قالتلي الدكتورة يمكن هالكتلة تكون خبيثة قالتها بكل سهولة و ماحست فيني للأسف 😢 و حسيت مثل قشعريرة بجسمي كله من الصدمة , وبعدها هديت نفسي لانه اللي برحمي امانة من الله حرام ااذيه بنفسيتي , بنات لما تمرون بوقت صعب لازمو الاستغفار وسورة البقرة .. اسبوع كامل تبهدلت بالاشعة وبهدلو ولدي معاي 😭 و طول الوقت ادعي ربي ما يتأثر منها .. رحنا عند اختصاصي اورام جيك جسمي كله ماحصل غير هالورم اللي على كليتي اليمين و قال مانقدر نسويلج جراحة وانتي حامل , نتابع حالتج اذا لاسمح الله كبر الورم اكثر فشهورج الباقية و بعد الولادة نستأصل الورم .. ادعولي بنات بقتلي 4 شهور و احتمال كبير يكون حميد ان شالله و يقول الدكتور انه الورم فيني من 9 سنوات تقريبا ولولا صارلي التهاب البول ماكنت بعرف بوجوده 🙏 يارب لك الحمد
