عندى مشكله ومش عارفه كل حاجه فيا متلخبطه
انا متزوجه من 10 شهور وحامل فى السابع وجوزى سافر بعد جوازنا ثلاث شهور هو قبل ما يسافر كان شايل فلوسه معايا ولما جه يسافر اخد منى الفلوس ونزلها لولدته وادانى فلوس كتير الحمد لله ك مصاريف ليا لو حبيت اجيب حاجه بعد سفره نزلت عند ولدته كنت عادى بعمل اللى بقدر عليه فى البيت تحت اطبخ انضف البيت اغسل المواعين شغل البيت العادى ولما بكون تعبانه مكنش بعمل حاجه على اعتبار ان ده بيتى المهم انى مكنتش بدخل غرفه نوم حماتى غير بكنسها وبس وده مبياخدش دقيقه المهم انها قالت لزوجى ان فى فلوس اتسرقت من الفلوس بتعته وزوجى كلمنى بهدوئ وقالى انزلى احلفلها على المصحف علشان ميبأش فيه كلام كتير ولا النفوس تشيل من بعضها اخته قاعده مع ولدتها علشان زوجها مسافر وهى ربنا يرزق الجميع عندها توأم وبنوته عمر شهرين فا نزلت حلفت انا واخته على المصحف وطلعت وطبعا حماتى وجهت الكلام ليا قالتلى ليه كدا احنا بناكل فى طبق واحد دا احنا طول عمرنا بنرمى الفلوس هنا وهنا عمر ما حاجه بتروح وكنت انا لوحده الموجوده وانا مردتش عليها طبعآ طلعت شقتى منهاره وجوزى كلمنى واعتذرلى وقالى متنزليش تحت تانى انا نفسيآ مكنتش مرتاحه ابدآ وفضل يومين يكلمنى طول اليوم لانه عارف انى مستحيل اعمل كده وانا معايا فلوسي الخاصه ومعايا الفيزا بتعتى وكنت بشتغل وجايلى ارباح سنويه من شغلى يعنى الحمد لله معايا فلوس استاذنت منه انى اروح بيت اهلى وهو وافق جم خواتى البنات اخدونى ومقلتلهمش على حاجه قبل ما امشى من بيتى بيوم اتصل بيا وبيكلمنى عادى جدا وقالى انا خقول للجماعه تحت انك هتروحى مع خواتك ولما رجع يكلمنى تانى لقيته مقلوب عليا وقالى انتى اللى سرقتى الفلوس يا حرميه وقعد يشتم فيا من معرفتش ارد عليه غير بحسبى الله ونعم الوكيل روحت بيت اهلى وبعد اسبوع من شات شتيمه وتهزئ ودعاوى عليا انا طفلى اللى لسه فى بطنى قالى انى سارقت تاج اخته وانها شافته عندى يوم مارحنا نرص حاجتى فى شقتى قبل الفرح لانى كنت موجوده يوم حنه اخته فى البيت المهم انى انا قولتله مستحيل تكون حاجه اختك عندى واتصلت باخته وقولتلها ابعتيلى صوره حنتك اشوف فين التاج اللى انا سرقته منك وبعتت الصوره ولقيتها بتتكلم عن تاج انا فعلا عندى زيه بش مش نفس الشكل التاج بتعها دور واحد وانا التاج بتاعى دورين المهم بعت لجوزى وقولتله حسبى الله ونعم الوكيل وابتديت اتكلم معاه وانا وجوزى رجعنا نتكلم بهدوء وقالى انهم لما قالوله ان اخته شافت التاج بتعها اللى ضاع عندك وقالو اللى سرق ده يسرق الفلوس انا قولت اكيد وطبعآ علشان مخسرش جوزى اتعاملت معاه بحكمه وبطيب خاطر ونزل اجازه فى اول رمضان ورجعت شقتى وولدته واخده منى موقف وانا واخده منهم موقف اشد منهم بكتير وفطرت تحت اول يوم هو جه فيه ومفطرتش تانى تحت قولتله انى مش مرتاحه نفسيآ وحصلت مشاده كلاميا بنا واخته وعيالها كانو معزومين عند حماتى اليوم ده وانا منولتش وقعد تلت ايام منزلش وبعدين فكرت وقولت انه جاى تلاتين يوم وده شهر كريم مينفعش كل الناس تكون بتتجمع فيه وانا اللى افرق وبقيت بعمل اكل احيانآ وانزل نفطر تحت او انزل على الفطار على طول لو حماتى هى اللى هتعمل .
انا صحيح مش مرتاحه نفسيآ خالص بس بقول هدوئ وراحه جوزى اهم
انا مش ناويه انزل تحت بعد رمضان لانى بجد مش عارفه اسامحهم انهم اتهمونى بالسرقه وشايفينى حرميه من قبل ما ادخل البيت وثانيآ لانهم قلبو حوزى عليا ولو انا اتعاملت بقله عقل ووصلت الموضوع لاهلى كان زمانى مطلقه بسببهم ..... قولولى اعمل ايه واسفه للآطاله مع العلم انى عرفت اخويا الكبير باللى حصل وهو اتكلم معاه بدون ما يعمل مشكله ولا يدخلى ولدى وولدتى ودى كانت رغبتى انا .
