#مال_الشام #طارت_الناعوس��..
حبيبي معتصم… جوزي و ابو اولادي و نور عيوني… اكتر شي بحبو فيه انو لما كون معصبه بحاول يتجنبني… و بعمرو بعمرو ما نزعلي نومتي او كسرلي غفوتي الله يرضى عليه تزوجنا بعض بعد علاقة حب خرافية 💜 اكيد عندكم فضول تعرفوها رح احكيلكم تفاصيلها معتصم كان فاتح دكانة تحت بيت اهلي…
و كنت مقضيتها انا و بنات الحارة رايحين جايين لعندو نشتري شيبس و تسالي و الذي منو …
هيك حتى مرت الايام و كبرت و صرت ست الصبايا ☺ و منعني الوالد الله يطول بعمرو انزل ع الحارة او فوت دكانة لحالي و لا بيكسر رجلي، و انا بصراحة ما كنت مستغنيه عن رجلي… لهيك ضبيت حالي و مشيت الايام.. بيوم من الايام كنت بخانق بدبان وشي كانت ايام صيف عليم الله الواحد مو طايق تيابو الي عليه! كانت امي مشخصه ولابسه المانطو التركواز حطت شنتتها ع كتفها و قالتلي انها رايحه زيارة هي و ابي و ماخدة مريم و وعد و عمار رح يضل عندي بيلعب بالحارة تحت كالعاده.. شغلت مروحة السقف و نمت تحتا متل الي عم ينازع و يلفظ انفاسو الاخيرة… ازا الله ما كزبني وقتها رددت الشهادتين احتياطا لان الحذر واجب بحالة مشابهة … و بصعوبة كبيرة… كبيرة جداً جداً… غفيت عينيييي و انا عم راقب شفرات المروحة و هن يلفو و يدورو يلفو و يدورو يلفو و يدورو.. و هبط علي النعاس من حيث لا ادري! #مال_الشام بهي اللحظة الرومنسيه… الهادئة… الجميلة… التي يسودها الحب و الطمئنينة… فات عمار اخي الصغير و اخر العنقود عم ينط متل جاكي شان… و لحظي الحلو نط نطة عليم الله اجا بنص بطني… مو بس طيرلي الناعوسة و طير كليتي و الكبد و الامعاء اول شي اجا ببالي بهديك اللحظة اني رح موت و انا ناطقه الشهادتين! شفتو النصيب صحيت متل المجنونة و صرت اصرخ و اشوبر بايدي و اشد شعري…. و قبل ما يهرب و يغيب عن عيني قمت من مكاني و مسكتو و ثبتو عالارض و قعدت عليه كأني بحلبة مصارعه و بستنا يعد الحكم 1 2 3 مشان اطلق سراحو بعدين مسكت عمار من قبة قميصو و قلتلو حمااااار انت حمااااار؟؟ عمار كان عندو رهبة من الصراصير كنت استغلها لخوفو و عاقبو… قلتلو بدي اجيب صرصور و اشيل رجليه و اشويه و اكلو انا وياك مشان تتربى و ماعاد تطيرلي ناعوستي… الغريب انو حبيبي عمار ما قلي ( اننعن ابوت) و لا قلي ( حواته) … استغربت الوضع و نئزني البي… اتطلعت فيه تطليعت ( بحياة امك تقلي شو عامل).... ( بحياة الغوالي تعترف لان قلبي ما بتحمل مصايبك يا ابن امي و ابي يا عفريت يا بلوة) و قبل ما يجاوبني سمعت صوت شخص اخر… شخص غريب و ما غريب الا الشيطان شخص ثالث كان موجود ع باب البيت و عمار فات و ترك الباب مفتوح و الشب لاحقو و شاف هالمسرحية الراقيه هي…بجميع تفاصيلها.. #مال_الشام
تنحنح بهدوء و قلي يا انسة… نزلت عمار من بين ايدي…و ما استوعبت الوضع… انسة شو؟ هو ضل فيها انسة ؟ انا كنت بشبه كل شي الا الانسة كنت بشبه ماوكلي في الادغال اكتر شي!! الشب: بعتذر منك بس عمار سرق شوكلاته من الدكان و انا حسيت انو لازم خبركم مشان تعاقبوه وما يتعلم يمد ايدو بس للامانه انا حالياً مسامحو من كل قلبي دنيا و اخره و كل ما بدو شوكلاته يجي ياكل ببلاش… يلا السلام عليكم بهي اللحظات انا كنت لسه عم اتخيل حالي ماوكلي الي بنط من شجرة لشجرة متل الغرويلا… اتطلعت بعمار و قلتلو مين هاد؟ عمار: معتثم.. قلتلو هاد معتثم؟ قصدي معتصم؟ عمار: ايه معتثم… و تركني عمار و مشى و بعدين وقف و لف ضهرو علي هو و معصب و قلي خيارا (اسمي يارا) … قلتلو شو!! قلي ( حواته ينعن ابوت) … والله راح يومين تلاته عالموضوع و بعدها اجونا عالم يخطبو.. طلعت شفتهن و عجبتهن مابعرف كيف بس هاد الي صار دخيل اسمو الله من اسمائو الرحمن الرحيم… بس طلعو عرفت انهم اهل معتثم… قصدي معتصم وبكرا جاي هو يشوفني.. انا سمعت هالحكي و طار عقلي… طيب و حركة جون سينا الي عملتها بعمار قدامو!! و الصرصور الي بدي اشويه و اتعشاه!! طيب و طرزان الي شافو !! وحيات البلوزة الخضرا و البنطلون الاحمر الي كنت لابسيتهم نهارها و شافني فيهن مو زابطة معي!! ما عم تنبلع معي يا جماعه بعد مية يمين ومية عظيم من الوالد انو اعطى الجماعه كلمه و بدي افوت عالشب… اجا تاني يوم معتصم ليشوفني و انا كنت دايبة بتيابي من الخجل… عملت القهوة و فتت لعندهم و ما قدرت ارفع راسي فيه… بعد دقايق امي و امو طلعو و تركونا لحالنا… كان نفسي امسك بعبايتها لامي و قلها له يا غالية عملتيها فيني!! معتصم: انسة يارا انتي نفسك الي شفتك هداك النهار؟ بعتزر بس في اختلاف كبير ومو قصدي شي بس و لا كأنك انتي… حسيتو ضربني كف ع خلئتي و ما عرفت شو بدي قلو.. زبطت قعدتي و تنحنحت يارا: ايه انا… بس والله نهارها كنت مو على بعضي لانو طارت الناعوسة… و ما بالعادة حدا يطيرلي ياها للاسف الشديد ما طلع معي رد احسن من هيك يبرر الوحشية الي شافني فيها بهداك اليوم العصيب بس للامانه… هداك يوم و هاد يوم الي 15 سنة متجوزة.. . و جوزي حبيبي وقت كون نعسانه ما بسترجي يحكي معي كلمة او يطلب مني طلب … معقول بخاف تطير الناعوسة؟ مابعرف😂😂
لا يوجد أي ردود على هذا الموضوع
