هيثم بالطيارة .. غمض عيونو وصار يتذكر رغد ..
هيثم : شو اسمك ؟
رغد : كتير بيهمك ؟
هيثم : ( مرر اصابيعو على شعرو واتطلع بالأرض ) ما بجبرك وبعتذر ازا دايقك سؤالي
رغد : لا ابدا .. اسمي رغد
هيثم : ( مد ايدو وسلم عليها ) اهلا وسهلا رغد انا هيثم
رغد : اهلا وسهلا
هيثم : انتي مرتاحة بشغلك هون ؟
رغد : الحمد لله على كل شي
هيثم : الظاهر مضطرة تشتغلي ما ؟
رغد : اي والله
وهنن عم يحكو فاتت هيفا عالمكتبة ..
هيفا : هاااي رغودة
رغد : احم … اركزي يا بنت شبك في شب واقف
هيفا : ههههههههه هاي لألك وللشب
هيثم : هههههه هايات .. بستأذن انا
طلع هيثم من المكتبة وهو عم يتأفف .. ( العمى شو غليظة هالبنت .. اجت و ما تركتلي مجال اتعرف على رغد اكتر شو هالحظ هاد )
=======================================
تاني يوم …
هيثم بالأوتيل تسطح مشان يرتاح شوي .. طالع موبايلو ودق لهيفا
هيثم : الو
هيفا : الو اي اي هيثم
هيثم : ليش هيك متلبكة
هيفا : ………
هيثم : لك احكي لا تجننيني
هيفا : وصلنا ظرف مكتوب فيه عن قاتل رغد
هيثم : فورا .. اتصلي على المحقق و …
هيفا : ما معي رقمو
هيثم : لا تلعيلي قلبي هلا ببعتلك رقمو .. وبتروحي لعندو بتعطيه الظرف
هيفا : ماشي .. هيثم انا تعبانه كتير مو حاسه انه يلي معي ارهاق وبس
هيثم : لا تتوهمي هيوف اكيد ارهاق لكن شو رح يكون ؟
هيفا : والله ما بعرف بس تعبانه
استغرب هيثم من نبرة صوت هيفا وكان واضح انها عم تحكي جد مو مجرد وهم .. قرر يتواصل مع الدكتور مباشرة ويتطمن عليها
هيثم : الو مرحبا دكتور .. انا هيثم
الدكتور : اهلين استاذ هيثم
هيثم : دكتور .. ممكن تخبرني شو في مع هيفا ؟ هو فعلا ارهاق بس ؟
الدكتور : والله يا استاذ هيثم مو مجرد ارهاق بس ما عرفت خبر الست نهال
هيثم : لكن شو ؟
الدكتور : كانسر
هيثم : شووووو ؟
الدكتور : وبحالة متقدمة جدا
هيثم : طيب دكتور بيصير نتأخر يومين بالكيماوي
الدكتور : عم قلك بحالة متقدمة يعني الكيماوي ما رح يجيب نتيجة بس رح يعذبا كتير
هيثم : طيب انا .. رح حاول ارجع عالبلد بأقرب وقت
=======================================
في بيت ام سعيد نجوى و سامر بغرفتهن …
سامر : حبيبتي اسف ازا جرحتك
نجوى : ولا يهمك
سامر : بكرا رح روح على دكتور يمكن في علاج
نجوى : ياااارب
سامر : بحبك
نجوى : ……..
سامر : زعلانه شي ؟
نجوى : بدي بيت الي لحالي
وقف سامر وقال بإستغراب وعصبية …
سامر : نغمة جديدة هي ؟! بيت لحالك ليش ؟
نجوى : لأني مو مضطرة اتحمل هزة البدن من نور كل يوم
سامر : ………
طلع سامر من الغرفة متدايق ومعصب …
ام سعيد : شبك لك ابني ؟
سامر : نجوى بدا بيت لحالا
ام سعيد : شو هالطلب الغريب ليش ؟
سامر : مشان نور ….
ام سعيد : نور يلي بتطلع وهي بتضل ما بستغني عنها
نور : اي هاااا انا يلي بطلع قلتيلي
ام سعيد : عم تتسمعي علينا ؟
نور : هيك شي
ام سعيد : اي انتي يلي بتطلعي
نور : اصلا احسن
سعيد : شبكن صواتكن طالعة
نور : امك طردتني من البيت
سعيد : امي ؟
ام سعيد : لك يا ابني .. مرتك بتضل تسمع نجوى حكي لأنها ما عندا ولاد وصارت نجوى بدها بيت لحالا وانا ما فيني بلاها بحبها متل بنتي وهي بتحترمني متل امها وبتساعدني دايما بشغل البيت وبتدللني مو متل مرتك اكل ومرعى وقلة صنعة
نور : لأنها ناااااقصة
ام سعيد : اخرسي وانضبي بغرفتك .. فعلا انك ما بتستحي انقلعي قد ما احترمتك ما بيليق فيكي الإحترام
سعيد : امي ؟؟!!
ام سعيد : خلي مرتك تضب لسانها
طلعت نجوى من غرفتها ..
نجوى : مرت عمي خلص ما عاد بدي شي بس لا تزعلي
ام سعيد : شفتي بنات الأصل كيف يا نور ؟؟
نور ساكتة وعم يطلع من عيونا شرار ونار من القهر والغيرة ..
فاتت نور على غرفتها وطلع صوتها هي وسعيد عم يتخانقو .. طلعت من الغرفة ماسكة شنطة سفر مليانة تياب لألها وطلعت من البيت و سكرت الباب بقوة وراها
=======================================
في بيت بكر ….
بكر : اه احكيلي شو رأيك بإم رغد ؟
زينة : وضعهم غريب
بكر : مين ؟
زينة : ام رغد و هيفا
بكر : مين هيفا ؟
زينة : صديقة رغد
بكر : شو الغريب ؟
زينة : البيت عندهم ما في ريحة حزن .. وضعهم طبيعي كتير
بكر : يمكن من الصدمة ؟!
زينة : وااااال لهلأ مصدومين ؟ لا لا في إشي غريب بس شو هالإشي الله اعلم
=======================================
في مكتب المحقق …
– شو صار معك يا منذر ؟
منذر : والله يا سيدي في ناس ملثمين عم بيلاحقو هند .. وكتير بسرعة بيختفو وهنن عم يلاحقوها بس شفتن بيخوفوها وهي بتكون تتلفت من الخوف وتركض .. وبيختفو بعدها
– ما سمعتن شو بيحكو معها ؟
منذر : لا بس سمعتها وهي عم تقول الله يلعنكن تركوني بحالي وصارت تركض
– صار وقت نحقق معها ؟
منذر : بدك نصيحتي يا سيدي ؟ بس يجي هيثم من السفر
– هيك رأيك ؟
منذر : اكيد
=======================================
تاني يوم الصبح هيثم بالأوتيل …. مسك موبايلو وشغل غنية فيروز
اشتقتلّك، اشتقتلّي؟
بعرف مش رح بتقلّي
طيّب أنا عم قلّك
اشتقتلّك
طيّب مش قصّة ما تقلّي وأصلاً مش هون العلّة
العلّة ما تكون اشتقتلّي
واشتقتلّك
ابتسم لما تزكر رغد ببداية علاقتهن …
هيثم : مرحبا
رغد : استاذ هيثم ؟ ههههه
هيثم : ليش عم تضحكي مكتوب على وشي نكتة شي ؟
رغد : ههههههه لاااا بس صرت عم شوفك كل يوم كل يوم .. هالقد انت مثقف بتجي عالمكتبة كل يوم شي بتشتري قلم شي بتشتري دفتر شي بتشتري كتاب شي بتستعير كتاب ؟
هيثم : احم بالمناسبة حلوة هالغنية يلي مشغلتيا بتحبي فيروز ؟
رغد : ومين ما بيحب فيروز ؟
هيثم : شو اسم هالغنية ؟
رغد : اشتقتلك
هيثم : وانا اكتر
رغد : شو قلت ؟
هيثم : عم قول حلوة الغنية
رغد : ههههههه بشو بتؤمرني ؟
هيثم : هالمرة ما بدي شي .. بس جيت لشوفك
خجلت رغد وحمرو خدودا ..
رغد : شكرا
هيثم : انسة رغد .. حضرتك مرتبطه ؟
رغد : لا
هيثم : شو هالصدفة وانا كمان مو مرتبط ههههههه
=======================================
في بيت نهال ….
نهال : شبك حبيبتي ؟
هيفا : تعبانة
نهال : يا حبيبتي قال الدكتور لازمك راحة .. فوتي تسطحي جوا
هيفا : تعبو جنابي من نومة التخت يا خالتو
نهال : يا روحي انتي .. بتحبي نروح عدكتور تاني ؟
هيفا : اي ياريت
=======================================
في بيت ام سعيد …
سعيد : امي انا مرتي ما بستغني عنها
ام سعيد : مين قال استغني عنها بس ما بدي ياها عندي بالبيت بيكفي
سعيد : ومو قدرتي اسكن برا .. خلي سامر ياخد مرتو ويعيشو لحالن
ام سعيد : عليم الله لو عيش انا ومرتك لوحدنا ببيت واحد الا انفلج وموت طقيق
سعيد : انا ابنك الكبير .. وبيحقلي عيش معك
ام سعيد : ومو انت يلي بتقرر مين يعيش معي ومين لأ
=======================================
في بيت هند ….
فاتت هند عالبيت ونادت لإمها .. ( امي وينك امي يا امي )
وصلت للمطبخ وهي عم تدور عليها وشهقت شهقة قوية
** ملاحظة : #جريم��_غير_تامة مسلسل رمضاني كل يوم حلقة بعد الفجر
