في بيت هند …
هند عم تحكي عالموبايل .. متوترة عم تروح وتجي بالغرفة
هند : طيب من وين دبرلك هيك مبلغ من وييين ؟؟؟
مجهول : يعني لسا ما تدبر ؟!
هند : لك راتبي يا دوب اشتري فيه دوا لإمي .. ما معيييي من وين ادبرهن ؟
مجهول : من حبيب القلب
هند : حبيب قلب مين ؟
مجهول : من حبيب القلب هيثم !
هند : ………
مجهول : عطيتك اخر فرصة .. وانتي جنيتي على حالك .. رح تندمي
هند : اندم ؟ الوووو لك الوووو … الله يلعنو سكر الخط
رمت هند الموبايل عالتخت وانهارت من البكى .. سمعتا امها واجت لعندها
ام هند : هند شبك ؟؟
هند : اطلعي برا
ام هند : انا امك وبتحكي معي هيك ؟!
هند : عم قلك اطلعي برااااا
قامت هند متل المجنونة دفشت امها لبرا الغرفة وسكرت الباب
هند : الله يلعن هيك عيشة ما بتنطاق
=======================================
تاني يوم الصبح … صحي هيثم من النوم عمل فنجان قهوتو بالبيت وشغل غنية فيروز ..
أنا لحبيبي و حبيبي إلي
يا عصفورة بيضا لا بقى تسألي
لا يعتب حدا ولا يزعل حدا
أنا لحبيبي وحبيبي إلي
عم يشرب القهوة ويدخن .. فجأة خطر على بالو نهال .. وتزكر بس سألها ليش بكيتي هلأ ؟؟
( والله انا حبيتو .. هو خانني معا حبيتو كتير وتركني )
( هيثم عم يحكي بينو وبين حالو … ليش تلبكت وصارت ترجف واخدت حب مهدئ بس بكيت بعد ما سألتها ليش ما كانت تحبني .. مين يلي خانا ومين يلي تركا ؟ انا بكم موضوع بدي فكر ؟! اووووووووف والله تعبت )
طفى سيجارتو ولبس ونزل على شغلو بس هالمرة ما كانت هند بإستقبالو ..
=======================================
في مكتب المحقق …
منذر : سيدي الظاهر رغد ما الها علاقات مع الجيران لأنه اغلبهن ما بيعرفوها
– ما بيعرفوها ؟؟!!
منذر : اي والله .. ويلي بيعرفوها بيعرفو انها بنت نهال ومن زمان ما شافوها بس
– طيب ابو رغد .. وعيلتو كلهن اعرفلي تفاصيل حياتن بدي البلد كلها يتحقق معها .. المهم ينكشف الفاعل
منذر : حاضر
=======================================
في بيت ام سعيد …
نجوى : حبيبي شبك معصب ؟
سامر : ولا شي .. ولا شي اتركيني
نجوى : حبيبي
دفشا سامر وقعت عالأرض
ام سعيد : ولي على قامتي شبك نجوى امسكي ايدي حبيبتي وقومي .. شبك سامر ليش هيك عملت ؟
سامر : ……….
نجوى : ( تبكي )
نور واقفة من بعيد وعم تطلع عليهن وتضحك ضحكة شماته
فات سامر على غرفتو بلا ما يحكي ولا حرف ركضت نجوى وراه وبعد 5 دقايق طلعت من عندو عيونا متل الدم .. بكيت كتير بالرغم من انه ما طلع صوتهن برات الغرفة .. بس الظاهر كان في حرب باردة جوا الغرفة وهالحرب كسرت قلب نجوى كتير
ام سعيد : شبك يا بنتي ليش بكيانة ؟
نجوى : مرت عمي .. ضميني لصدرك تعبانة .. تعبانة كتييير
ام سعيد : يا حياتي انتي .. سلامة قلبك يا قلبي
=======================================
في بيت هيثم ….
هيثم : امي .. انا لازم سافر بس ازا احتجتو اي شي ابعتيلي بحوللكن مصاري
ام هيثم : بتعرف يا هيثم … مشتهية دورلك على عروس وجوزك .. اختارلك البنت يلي بتناسبك
هيثم : …… امي !!
ام هيثم : شو امي ؟؟!! رغد ماتت الله يرحما خلص شوف حياتك واصلا انا ما كان بدي رغد وانت بتعرف هالحكي
هيثم : امي لا عاد تفتحي هالموضوع معي اي ؟
رن موبايل هيثم …
هيثم : الو
هيفا : مرحبا ……….
هيثم : اهلا .. شو عم تحكي انتي ؟ اوعي تروحي لهنيك
هيفا : طيب ممكن نلتقي ونحكي شوي ؟
هيثم : لاقيني بعد نص ساعة بالحديقة
هيفا : ماشي
سكر الخط ودق على موبايل هند مشان يسألها ليش ما اجت عالشغل .. بس كان مقفول … زاد الشك بقلبو وخاف تكون هربت قبل ما تتحاسب
=======================================
في بيت بكر …
بكر : يلا هلأ بتكون ام رغد هديت نفسيتها شوي جبتلك رقمها من هند السكرتيرة خدي احكي معها وحددي موعد تزوريها
زينة : بس لازم اخدلها اشي معي يعني علبة شوكولا او هيك اشي
بكر : اه طبعا حاسب حسابي لكل إشي تخافيش علي
اخدت زينة الرقم …
زينة : الو مرحبا معي ام رغد ؟؟
نهال : اها تفضلي
زينة : انا اخت زميل رغد بالشغل وحابة اجي ازورك
نهال : اهلا وسهلا حبيبتي بتنوري
زينة : بكرا بعد العصر بكون عندك .. ممكن العنوان لو سمحتي ؟
نهال : تفضلي
زينة : شكرا .. بشوفك بكرا سلام
بكر : شو صار ؟
زينة : متل ما سمعت
بكر : طيب بدك اوصلك ولا تروحي لحالك ؟
زينة : بروح لحالي
=======================================
هيفا وهيثم بالحديقة ….
هيفا : هيثم لا تسافر .. اجل سفرتك ليخلص التحقيق
هيثم : انا مسافر بس عيوني رح تبقى هون
هيفا : كيف يعني ؟
هيثم : بعدين بقلك .. هيفا امانة لا تتركي ام رغد اهتمي فيها
هيفا : ولوووو هاي من ريحة الغالية
وقفت هيفا ودعت هيثم لترجع عالبيت .. بس داخت ووقعت بحضنو
دقايق معدودة وبعدها اتداركت هيفا يلي صار وخجلت كتير .. بعدت عنو وقعدت عالكرسي
هيفا : بعتذر منك
هيثم : انتي منيحة ؟
هيفا : ما بعرف
هيثم : طيب رح وقف واسندك للسيارة
هيفا : ماشي بدي عزبك
سندها هيثم للسيارة وركبو سوا … بعد 5 دقايق وقف هيثم سيارتو
هيفا : ليش جبتني عالمشفى
هيثم : مشان اتطمن عليكي باين على وشك التعب .. انزلي
هيفا : بلا ما عزبك
هيثم : لا ولو .. تفضلي
=======================================
في بيت ام سعيد …
ام سعيد : هاد يلي طلع معك بدك تتجوز على مرتك مشان تخلف ؟ كل هالصبر يلي صبرتو هيك تكون جزاتها ؟
سامر : امي انا ابنك ما بدك تشوفي ابني ؟
ام سعيد : انت ما ….
نجوى : مرت عمي لأ لأ
ام سعيد : انت ابني وحبيبي بس حتى لو تجوزت بنت غير نجوى .. ما رح تجيب ولاد
نجوى : مرت عمييييييي
سامر : امي شو عم تحكي انتي ؟
ام سعيد : هاااي الحقيقة .. اللي خبتها عنك نجوى وتحملت تسميع حكي من نور .. ونجرحت كتير وسكتت وصبرت
سامر : ………..
فاتت نجوى على غرفتها وطلعت بعد ربع ساعة .. بإيدها شنطة تيابها
سامر : نجوى ؟
ام سعيد : وين رايحة ؟
نجوى : عند أهلي
سامر : انا اسف
نجوى : بس كنت مفكرني انا يلي ما بجيب ولاد كنت بدك تتجوز وما اهتميت .. وبس عرفت انه انت يلي ما بتجيب ولاد حسيت بجرحي واعتذرت .. تخيل يا جوزي يا حبيبي لو انا من ساعة ما خبرني الدكتور انك ما بتخلف طلبت الطلاق منك .. شو كنت حكيت عني ؟ مو بنت اصل وما بفهم .. بس رحت ببساطة عطيت لحالك الحق انك تتجوز وانك لازمك طفل .. وانا هلأ لازمني طفل .. بدي صير ام .. طلقني
طلعت نجوى وسكرت باب البيت بقوة
سامر وام سعيد مصدومين من قوة نجوى بالحكي
سامر : ياريت خبرتوني
ام سعيد : نجوى .. نجوى تحملت كتير حكي وما رضيت تخبر حدا غيري انه هي بتجيب ولاد .. لانها بتحبك وخافت على مشاعرك بس انت ما خفت على مشاعرها .. وجرحتها
سامر : ما رح ترجعلي ؟
ام سعيد : ما بتوقع بعد يلي صار ترجع .. مستحيل
=======================================
في المشفى …
هيفا بغرفة الفحص وهيثم بالإستراحة .. رن موبايلو ..
هيثم : الو
هند : مرحبا استاذ
هيثم : اهلين هند ليش ما جيتي عالشغل اليوم ؟
هند : والله يا استاذ امي مرضانة .. انت تمام ؟؟ الشركة تمام ؟؟
هيثم : سلامتها .. اي كلو تمام لا تخافي
هند : يعني تمام تمام ؟
هيثم : انسة هند في شي ؟ عم قلك كلشي تمام
هند : حبيت اتطمن
طلع الدكتور من عند هيفا …
هيثم : طيب هند بحكيكي بعدين سلام هلأ
اي دكتور طمني ؟؟
الدكتور : والله ما بعرف شو بدي قلك نحنا شاكين بشي .. بس بدنا فحوصات كمان لنتأكد
هيثم : ما بتتأجل ؟ لأني ضروري سافر
الدكتور : لا والله ما بتتأجل
هيثم : طيب
رفع هيثم الموبايل وحكى مع نهال …
هيثم : مرت عمي .. هيفا بدا فحوصات وانا طيارتي بكرا المسا بدي لحق جهز حالي .. بتقدري تجي عالمشفى هلأ وتبقي معا ؟
نهال : اي هلأ بجي ولا يهمك
فات هيثم لعند هيفا ..
هيثم : هيفا انا لازم روح جهز حالي للسفر بس الدكتور طلب فحوصات فورية لهيك رح تجي مرت عمي نهال تبقى معك اي ؟
هيفا : خلص بعدين بنعملون
هيثم : مستحيل الدكتور قال ضروري هلأ
هيفا : (بخوف) ليش ؟
هيثم : ……… والله ما بعرف بس ان شاء الله خير لا تخافي .. يلا انا تأخرت لازم روح هلأ .. رح ضل على تواصل معكن واتطمن عليكن دايما
هيفا : هيثم
هيثم : نعم هيوف
هيفا : ( ابتسمت ) شكرا كتير
========================
