مرووة …مرووة ….لك وينك بنتي
اي امي ليكني هون بغرفتي عم ادرس ..
لك بنتي الي ساعة عم اندهلك تعي حكي ابوكي ….
تركت كتابي من ايدي و فتت على غرفة القعدة اي بابا بدك شي ؟ قلي قعدي بدي احكي معك انا و امك قعدت و حسيت الموضوع جدي تابع حديثه قلي اجا شب عندي من يومين عالمحل و طلب ايدك مني و انا سالت عليه و طلع شب ابن حلال و الكل مدح فيه و بعيلته لهيك اليوم بعتله و اجا لعندي و قلتله انو موافقين و اتفقنا على المهر و قرينا الفاتحة و بكرا رح يجي هو و اهلو يشوفوكي و تتفقو على العرس لانو اموره جاهزة و ما رح يطول بالخطبة …..
عمري 15سنة و عم حضر حاليا لامتحانات الشهادة الاعدادية بعد شهر كل همي بانو انجح و جيب معدل شوف حالي فيه و اهلي يفتخرو بنجاحي اما طموحي فكانت انو تابع دراستي و فوت جامعة متل كل بنات جيلي …..
بابا بس انا ما بدي اتزوج هلا و بدي كمل دراسة…
تغيرت ملامحه و احمر وجهه و عصب و قلي كل بنت اخرتها لبيت زوجها ليش لطولي الطريق عليكي و بعدين نحن ما عم ناخد رايك نحن عم نخبرك بس حتى تشيلي راسك من بين هالكتب و تلتفتي لخطيبك و يلي رح يصير زوجك قلتله بس انا ما بعرفه و لا هو و لا اهلو بيعرفوني قلي لا الشب شايفك و مراقبك فترة ليشوف مشيتك و اهلو كمان شافوكي لما كنتي تروحي عالمدرسة و عجبتين قلتلو بس انا بعدني صغيرة ولله هاي بنت خالتي لينا كملت دراستها و فاتت جامعة و بعدين تزوجت و ابوها ما زوجها من لما كان عمرها 15سنة و انا حكيت هالجملة هجم علي و ضربني و قلي وليه بكسر راسك حاطة راسك براس بنت خالتك لينا اصلا انا كل اهل امك ما بيعجبوني ما عارفين يربو اولادن و تاركينن على حل شعرن انا ما عندي بنات تفوت جامعات مختلطة البنت للبيت و بس……
هربت على غرفتي و انا عم ابكي و لحقتني امي قلتلي طولي بالك يا امي ابوكي عقله صعب قلتلها حرام عليكن بدكن تزوجوني بهالعمر لك انا من شهر لبلغت لك عالقليلة ينطر بس لاخد بكالوريا قلتلي اوعى تحكي هالحكي قدامه بيرجع بيضربك انا طول عمري عشت معه ما مبسوطة و متحملة عصبيته و تخلفه و عالطالعة و النازلة بيحكي على اهلي و اخواتي و اولادن و متلك متلي انا تزوجته لابوكي لما كان عمري 14سنة قلتلها ايامكن غير ايامنا مستحيل اقبل مستحيل قلتلي ابوكي قرا فاتحتك و مستحيل يسحب كلمته قومي بنتي غسلي وجهك وساعديني خلينا نبلش بشغل البيت و نشوف شو بدنا نعمل ضيافة لقاسم و اهله …….
