تعالوا بدي فشلكم قلبي لأني مقهورة من زوجي رح يموتني
أنا اليوم حبيت ساوي لزوجي رز بحليب.
و طلع طيب و بياخد العقل
بس أنا ما قدرت آكل منه لأن صارت نفسي تلعي
بس باين من منظره أنه بيشهي
هو قال ماشي حاله
بس يعني مو كتير ظابط لاحول ولا قوة إلا بالله
ما بيعجبه العجب و لا الصيام برجب.
شوفوا كيف عملته و أنتو قولولي اذا كان ناقصه شي؟؟ او خربطت بطريقة طبخو
هو يعني صحيح أنا نسيت ليف الطنجره من مرق اللحم يلي سلقته من كم يوم و حطيت فيها الحليب بس يعني مو مشكله مو أنا أول وحدة بتنسى
و بعد ما غلى الحليب حطيت الرز بس ما سلقته قبل ما حطه و رحت عيرت السكر بكاسة ما انتبهت أنه كان فيها زيت
و الله ما كان لي قلب كب السكرات بس قلت لحالي حرام في ناس مشتهيه حبة السكر
اتكلت على الله وحطيتهم وما لقيت و لا كاسة دوب فيها النشا و للصراحة ما لي خلق اجلي بهالبرد فدوبت النشأ بجرن الثوم.
و بعد ما غلا الحليب بالرز و النشا
خربطت(وجل من لا يخطئ) وحطيت خميره بدل الفانليا.
و حطيت خل بدل ماء الزهر
شو بدي ساوي القنينتين كتير بيشبهوا بعض
المهم
مليت له صحن قلت لحالي خلي ياكلها سخنة يدفي حاله فيها وجبتله ياها
والله اشتهيتكن فيها
أنا كتير كريمة
يعني لو بعرف بيوتكن لجبتلكن وحدة وحدة
لكملكن شو صار معي
هو شاف منظرها
آم يابعدي ما عجبته.
بس قال لح يدوق طعمتها.
أكيد طيبه لأنه أنا عاملتها قال يعني عم يجاملني
و أول لقمه حطها بيتمه. راح دغري و طالع كلشي ببطنه.
يعني لو أنتو يلي عاملينها و مطالعين كلشي ببطنكن.
كنت قلت بيجوز حوامل و عم تتوحموا وما قادرين تاكلوا.
بس هو شو عذره؟؟؟.
هو يعني أنا الحق علي شوي لأني ما. انتبهت على الرزات أنهم مدودين.
كمان شو فيها إذا طلعت له كام دوده بالصحن
ياربي
ماني عرفانة شو ساوي مع هالرجال.
متل ماقلتلكن من شوي مابيعجبوا العجب ولا الصيام برجب
لو سمحتوا مشان اللي خلقكن قولولي وين انا غلطانه
