تحذير ⚠

تحذير ⚠
⛔⛔صبايا بدي احكي اليوم بموضوع كتير مهم لكل صبية عندي او باي جروب نسائي

وهاد الحكي لاني بحبكم كلكم وبخاف على مصالحكم متل خواتي.. وما بحب تنضر اي بنت فيكم وكل هدفي اوعيكم

انا كتير بنشر منشورات مفيدة ولو فعلا كل ست منكم قرأتها ودرستها وطبقتها رح تكون اروع زوجة بالعالم وتحل كل مشاكلها الزوجية

لكن اللي عم بشوفه بآخر فترة كتير صبايا عم يكتبوا مشاكلهم الزوجية وعلاقاتهم بازواجهم بالتعليقات هون او عالجروبات والمنتديات..

زوجي بده علاقة كل يوم.. !! زوجي ما بجيب اغراض..!! زوجي بالبيت هيك بتصرف..!! عيوب زوجي هيك.. زوجي بطلب مني بالعلاقة هيك شو اعمل شو الحل والخ

وهاد الشي غلط غلط غلط ❌ ❌

اولا __لانه ما حدا عايش ظروفك وما بعرف زوجك ولا اساليب حياتكم.. يمكن انا انصحك شي بيزبط مع زوجي بس ما يزبط مع زوجك ولا سمح الله اخرب بيتك او ينصحوكي شي غلط

او تسمعي نصيحة بنت تانية كتبت تعليق سخيف اطلقي او احردي الخ
ممكن تطبقيه وتزيد مشاكلك..

تانيا يمكن مشكلة زوجك بالنسبة الك بسيطة لكن بدك حل الها.. بالنسبة للستات انها جريمة كبرى .. ورح يحكولك شو هاد 😳😨وطلقي واخلصي منه وكيف عايشة معه والخ😠😳😨

.ويكرهوكي فيه . مع انه انتي بالنسبة الك مشكلة بسيطة ولساتك بتحبيه .. وتصيري تكرهي زوجك بسببهم

يمكن زوجك يعمل شغلة تزعلك وتزعجك.. لو زوجي عملها ما بزعل والعكس

غير هيك انتي ما بتعرفي الاصدقاء اللي رح يشوفوا منشورك او تعليقك
سواء بجروب فيه اكتر من 200 الف بنت.. او حتى على حسابي 1000 بنت.

ما بتعرفي مين هدول وكيف نفسياتهم وشو جنسياتهم

ممكن تكون بنت حماكي او صديقتك او جارتك موجودة باسمها او اسم وهمي وتشوف مشكلتك انتي وزوجك

وهيك بتكوني بمشكلة جديدة انهم عرفوا خصوصياتك
او لا سمح الله ممكن تكون صديقة سيئة تعرف نقاط ضعفك بعلاقتك مع زوجك وتحاول تسرقه منك بشطارة وكثير سمعنا هيك قصص

او لا سمح الله وحدة حاطة عينها عزوجك من الاساس

غير هيك ما بتعرفي شباب ولا بنات اللي عم يقرأو مشكلتك.. لو كان رجل ابن حرام بيفتح حساب زوجته بدون علمها او فايت باسم بنت

ممكن يحاول يستغلك لما يشوف حرمانك او مشاكلك مع زوجك والنقص اللي عندك

او حتى يبتزك ويهددك.. هاد عالم كبيييييييييير وخطير.. في المنيح وفي السيئ
في اللي بده يضرك اكتر من اللي بدو مصلحتك.. انتبهي

لهيك انا ضد اي ست تنشر مشكلتها على جروب او بتعليق عندي او باي مكان.. ولا حتى تبعتلي مسنجر وخاص.. لانه ممكن زوجها يشوف المسجات وتزيد مشاكلك.. او يتهكر حسابك وتنتشر خصوصياتك

انا بنشر منشورات جدا قوية ومفيدة
ورح اضل انشر عن كل مناحي العلاقة الزوجية.. اقرأي وتعلمي واحفضي وطبقي بمخك وبسرية .. كوني ذكية ولا تفتحي ابواب بيتك واسرارك لناس ما بتعرفيهم.. حلي مشاكلك بعقلك

مو ناقصك شي انتي

لا تعطي فرصة لناس ممكن باي لحظة يسرقوا زوجك او يبتزوكي او يستغلوكي..

انتبهي وكوني حذرة. لا تكتبي شي خاص بينك وبين زوجك على جروب في مئات الالاف.. ما بتعرفي حدا منهم..

كوني واعية لكل حرف بتكتبيه على المواقع

علقي وتفاعلي مع كل المنشورات واسالي واكتبي شو ما بدك الا مشاكلك

كوني عضوة فعالة جدا لكن بذكاء

بتمنى كل ست فيكم تفكر بكلامي.