المقطع السابع
حكي ؟ رح جيب القالب لهون وغني فوق راسك و احتفل لحالي
حنين : محمد راسي عم يوجعني وما الي خلئ خلص غير مره تصبحي على خير
خبيت وشي ومسحت دمعتي مو لانو زعلانه منو .. بس لانو بمنامي شفت باسل
شفت انو كنت قاعده على مرجوحة وهو عم يدفشني و نضحك .. وكل شوي يهمسلي بشي اضحك اكتر
وصحيت شفت محمد قدامي .. حسيت نار عم تاكلني ..
بلشت حس انو تورطت ورطة كبيرة ، و انو باسل مو مجرد شخص عادي رح يمر بحياتي وانتهى
للصدفة التقيت بصديقة قديمة و من سيرة لسيرة حكتلي انها وجوزها جمعو مصاري وبدهن يشترو بيت لان تعبو من الأجارات بس خايفين حدا ينصب عليهن
فوراً خطرلي انو باسل بيشتغل بالعقارات وبدون تفكير قلتلها انو انا بعرف واحد مضمون ويبقربلي و ممكن يساعدها
اخدت رقمي واخدت رقمها ورجعت على البيت مبسوطة كتير
فوراً اتصلت بلجين وقلتلها انو رفيقتي بدها تشتري بيت وتزكرت انو جوز بنت حماها ( الي ما بتزكر شو اسمو على اساس ) بشتغل بهل امور وبدي اعطي رقمو لرفيقتي ليخدمها لانها غاليه على قلبي
وقالتلي انو رح تبعتلي رقمو بس يرجع جوزها .. و بالفعل المسا وصلني مسج فيه رقم باسل !
بس وصلني الرقم حسيت حالي ماسكه قنبلة موقوتة ، خايفه ارميها وخايفه احتفظ فيها
كنت كتير متوترة و عيطت على ولادي كتير لش خلئي
حسيت انو عم يلعب بالنار ... بلحظة غباء .. مسكت الهاتف .. واتصلت على الرقم ..
مع كل رنة كان قلبي يطلع للسما ويرجع .. وما رد علي .. بكيت كتير مو لانو ما رد
بس لاني ما بعرف حالي شو عم بعمل ..مسحت الرقم و الرسالة واتصلت برفيقتي قلتلها انو الشخص الي بعرفو ما عاد اشتغل هالشغله واعتذرت منها كتير
جهزت الأكل ورجع محمد ما كان الي عين اتطلع فيه وكان تفكيري كل الوقت بموبايلي خايفه انو يمسكو ويلاقي فيه شي
توتري كان واضح كتير وما قدرت اكول .. قمت عن الطاولة ومسكني محمد من ايدي وابتسم
محمد : ليكون حامل ؟
سحبت ايدي ورديت بعصبية : لك شو ما بتفهم قلتلك هلأ ما بدنا ولاد ما بدنا ولاد .. ما عم لحق ركض ورا ولادك بس انت مو حاسس بشي
كل وقتك بعيادتك بتجي عالعصر وظيفتك تاكول وتنام ويتأمنلك جو هادي بس شو بصير بحياة ولادك ومسؤولياتهن هي ما بتعرفهن
لو انت الي عم تربي وتتعب ما كنت كل شوي والتانيه بتقلي بدي ولد بدي ولد بدي ولد .. شو شايفني عم بيض ؟
لحظة صمت .. و وجوه مصدومة فيني .. تلاتتهن وقفو اكل
وقفت لانا وحكيتني بعصبيه مشابهة لعصبيتي : اي بس نحنا مو ولاد من الشارع نحنا ولادك و كل الأمهات بيعملو هيك لولادهن
وبكل الأحوال انا صرت كبيرة وما في داعي تزعلي حالك هيك صار فيني دير بالي على حالي
حنين : ماما لانا ما هيك قصدي
ركضت على غرفتها وقام حمزة لحقها ..
حنين : حمزة تعال لهون انت التاني !!
وقف محمد وقرب مني .. رجعت خطوة لورا ( ما كان قصدي )
ميل راسو لعندي و همسلي ( بتبيضي ؟ )
زورني بنظرة حاده كتير وطلع من البيت وطرق الباب وراه
فتت بنوبة بكي انو ليش هيك حكيتو، ليش هيك عملت...
ما في الا صوت دموعي بالبيت... و طلع صوت رنة الموبايل..
مسحت دموعي و رحت شوف مين..و كان رقم باسل..
صرت ارجف و ماعرفت شو اعمل، طفيت الموبايل و تركتو لتاني نهار....
فتحتو باليوم التاني وما اتصل علي،حاولت طلعو من راسي و اعتذر من جوزي و ولادي و غرقتهن بالدلال و الاهتمام المبالغ فيه و الي مو متعودين عليه، مرق اسبوع بذلت فيه مجهود رهيب لحاول ريح ضميري
مره وانا عم اتصفح الفيس بوك كانت لجين منزله صورة و كاتبة (صباح الخير) ... رديت عليها و بعدا صارو يردو اصدقائها و من ضمن هالاصدقاء مريم مرتو لباسل
بدون وعي لقيت حالي بصفحتها عم بحبش بكل تفاصيلها بكل منشوراتها و صورها و تعليقاتها و بعدين بالاصدقاء الي كان طبعاً من ضمنهن جوزها باسل ، قمت فوراً جبت ورقه و قلم و كتبت اسم حسابو على الفيس بوك و خبيت الورقه معي
بعد تفكير و تخطيط(غير مدروس) .... عملت حساب فيس بوك وهمي باسم من خيالي و حطيت صورة بنت شقرا و حطيت معلومات كلها غلط، ومن هاد الحساب بعتت طلب صداقة لباسل...
وبهي الخطوة بلشت اتحول بالتدريج من بنت عالم و ناس و زوجة و أم.... لأنسانه قذرة...
#حنيني_بقلم_مال_الشام
الجزء الرابع
صار شغلي الشاغل راقب الفيس بوك و استنا ازا باسل رح يوافق عليه او لأ ، و إزا رح يحكي معي او لأ .. و يمكن يحكي لمرتو واتورط .. ويمكن يتناشف فيني ... ويمكن ما يوافق على الطلب اصلاً !!
وببداية أتعس يوم بحياتي وبعد ما طلع جوزي و ولادي من البيت .. قمت لاتفقد الحساب ولقيت باسل موافق على الطلب و باعتلي ( مين معي ؟ )
نطيت مكاني تلات مرات انا وعم اضحك ، ركضت غسلت وشي و عملت فنجان قهوة ورجعت ركض قعدت قدام الاب توب ورديت عليه ( انت مين ؟ )
كان التعامل معو سهل كتير .. اخدنا واعطينا وقلتلو انو اسمي لانا - سرقت اسم بنتي - وعمري 22 .. -زورت عمري - ... بدرس هندسة معمارية - اخترت تخصص قريب لمجال شغلو - و قلتلو انو بعتلو الإضافة بالغلط
