النصف الاخر الحلقه الاولى ٢👻👻

#النصف_الآخر الحلقة الاولى ٢

بعد ماشافت القطة مرمية ورا باب غرفة ساجد وداخل فيها علبة أبر الخياطة تبع امي.. وبجنبها كبتولة صوف جواتها سنارة.. صرخ ساجد وقال لأمي كم مرة قلتلك لا تحطي ابرك وصوفك عندي يا امي مشان الله !!.. قالتله كنت بعملك بلوزة وجيت مبارح لأفرجيك ياها لقيتك نايم.. حطيتها عندك للصبح تشوفها ورفعتها على العلاقة.. وعلبة الأبر والمقص والسنارة ضلو على رف الخزانه.. كيف دخلت القطة عندك وكيف اجا الدم عإيدك.. ميس ضلت تبكي وأنا بتطلع وبحكي فعلاً.. إذا القطة ماتت باللحظة اللي رفعت حالها لتطلع كبتولة الصوف من رف الخزانه وسحبت الخيطان ووقعو عليها مع علبة الأبر والمقص.. كيف وصل الدم لأيد ساجد وسريره وطبع رجليها عالسجادة.. قلت هالشي وماحد انتبله ولا سأل فيه.. وكل اللي عملته امي انها جابت صابون ومي وغسلت السجادة ونظفتها وساجد بس طلع القطة ودفنها وغسّل ايده وحضر حاله للأكل والفطور بدون مايسأل عن شي.. وبابا همه تلبيله امي كل أوامره باللحظة.. بس ماحد سأل.. دخلت مع ميس على غرفتي وقلتلها اهدي وبكفي بكا.. خلص لسه عم تبكي على قطة.. قالتلي كنت بحبها.. كانت مسليتني.. بتموت فجأة.. قلتلها انتي حطيتي الملابس ورا الكنبه.. عم تمزحي معي؟ قالتلي ولا لمستهم.. وليش ليجو ملابسك اللي عندي مع ملابسك اللي عندك جوا .. ونحنا بننام كل وحدة بغرفة.. مين طلعهم جني مثلاً !.. هالشي غريب شو حد مستقصدك!!.. بركي ماما ونسيت !! قلتلها اليوم باين من أوله.. قال شو صاحية ومبسوطة.. تعكر كل يومي.. قالتلي انا اللي رح احتفل بنهاية السنة وانا منكده.. وامك ولا عبالها همها ابنها وزوجها.. وانتي التانية شو همك غير فنك وحبيبك السيد آدم.. قلتلها لا تجيبي سيرته.. الشب محترم وماشفنا عليه شي.. قالتلي بيني وبينك محترم فعلاً لأنه مابده ياكي تغني بس أنا لو هاد حبيبي مابستحمله دقيقة.. وأصلاً هوه ضد هالفكرة بس لو اهلك قايلنلك لأ كان مافكرتي.. قلتلها مو بس ضد فكرة إنه أغني.. ضد أنه أسمع أغاني تخيلي!!.. أول مبارح كنت بحكي معه وفاتحة التلفزيون على برنامج أغاني قلي أطفيه وماتحضري هالشغلات بس بالنهاية مادخلو ولا دخلكم فيني هاي حياتي وأنا بدي أحقق حلمي.. دخلت عغرفتي وسكرت الباب.. صرت أغني لحالي ومبسوطة متل دايماً.. وقفت على المراية وبلشت أحط مكياج بعد ماغسلت ونظفت حالي.. كنت لسه مبسوطه برغم كل شي سيء صار بأول ساعه صباحية.. تطلعت بالمراية وأنا بحط الروج لفتت عيني على الخزانه.. انتبهت انها مفتوحه.. وأنا لأول مرة بتركها مفتوحه.. قلت يمكن نسيت.. بس في شي وقع منها من جوا.. وقفت المكيب وقلت .. انا بعرف حالي منظمة.. برتب ملابسي.. بسكر خزانتي وباب غرفتي وحتى شراشف تختي بنظفهم بنفسي لأني بقرف أي حد يلمسه وعندي وسواس النظافة بشكل مو طبيعي!.. بس الخزانه كانت مفتوحه لأول مرة وأنا متذكرة أني سكرتها.. وملابسي الوسخة برا.. وشي وقع جوا الخزانه كأنه بقلي قربي شوفيها.. شو هاليوم وليش هيك بصير.. قربت من الخزانه.. وفتحتها.. لقيت الشي اللي وقع صابونة صغيرة من اللي بتغسّل فيهم.. رفعتها واجيت لأحطها شميت ريحة غريبة جوا الخزانه.. كانت ريحة عطر رجالي.. لأول مرة بشمها.. كل الخزانه معبقة بهالريحة.. استغربت.. وقلت من وين اجا.. هاد مو من عطري ومتأكدة والعطر باين رجالي..ومتأكدة آدم مابهديني شي عليه ريحة لعطره وأنا كتير حافظه ريحته وشو بحط عجسمه.. دورت بملابسي قطعة قطعة وشميتهم.. لقيت جكيت أسود.. باين لشب.. استغربت وبهاللحظة تأكدت انه في شي غريب بهاليوم عم بصير.. مسكت الجكيت ودخلت فوراً للصالة لحتى أسأل ساجد هالجكيت لأله او لأ.. مالقيت حد بالصالة.. كان باب البيت مفتوح.. ووجهي عليه نص ميكب نص لأ.. تلفوني برن جوا.. وحاملة بإيدي الجكيت.. دخلت بسرعه عالغرفة اجيبه.. اخدته من على السرير ورديت.. كان آدم.. حكالي حبيبتي كل عام وانتي بخير.. حبيت تتصبحي بصوتي.. قلتله حبيبي وانت بخير.. كنت عم بحكي معه بصوت انه مو صاير شي وببلع ريقي بنفس الوقت واديه متجمدين.. حكالي فيكي شي ليه ساكته؟ قلتله لأ ولا شي.. بصير نحكي بعد شوي؟ اهلي هون واليوم جمعة ومافيني احكي منيح.. قلي ماشي.. زعل مني وسكر الخط.. وأنا قلت ياربي مو وقت زعله هلأ! رميت التلفون ولمحت عيني على المراية.. لقيت باب الخزانه مسكّر.. وانا ماسكرته لأني كنت ماخده الجكيت منه أصلاً.. توترت.. ورحت بسرعه لجوا اشوف وينهم.. كانو برا واقفين.. وبتطلعو عليه همه التلاته بنفس اللحظة.. قلتلهم شو في؟ ساجد بإيده منكوش وحافر بالأرض وميس صافنه فيني.. حكت امي.. ميس ادخلي جوا وماتخلي اختك تخاف.. لا تخافي!.. دخلت ميس.. حكيتلها شو في.. ليه امك بتقول لا تخافي.. هزيت كفتها وقلتلها ردي بحكي معك.. قالتلي لقينا القطة عايشة وسمعناها عم تموّي برا.. والتربة متل ماهيه مافيها ولا شي!.. ولما اجينا بدنا نقرب منها هربت لفوق السور وطلعت من حوالين البيت.. قلتلها نعم؟! شو بتقولي انتي!.. ركضت لبرا وبإيدي الجكيت.. قلت لساجد اترك من إيدك وقلي!.. هاد الجكيت لإلك شي؟!.. قلي لأ ولا بعرفه ولا عمري شفته.. ماما غيرت الموضوع وحاولت تلطف الجو بهالكركبة الصباحية اللي صارت.. وقالت رح اتصل مع مرت عمكم نداء لتيجي مع بناتها تسليكم.. قلتلها لأ امي مو رايقتلهم المسا رح نجتمع نحنا مكركبين هلأ مشان الله بلاها.. قالت لأ بعرف ماحد بسليكم غيرهم.. رنت امي لمرت عمي نداء.. مرة مستهترة مابفرق معها شي وبناتها طالعين لإلها.. همها الروحانيات والأبراج وقصص التنجيم ومابعرف شو كمان.. وبتجذب أمي بهالقصص عطول بإعتبار هالشي تسلاية وتضيع وقت بس بابا بعصب لما بسمع بهالشي وبروح بشكيها لأخوه.. قالتلها نداء حبيبة قلبي.. تعي بسرعه انتي وبناتك.. بناتي صاحين بكير وناوين نغديكم عنا.. تعو يلا لنعمل غدا سوا ونضل نتسلى لآخر الليل بسهرة من العمر.. قالتلها مرت عمي نداء.. انا كنت بدي اتصل معك.. تعرفتلك على بصارة.. رهيبة.. تخيلي كشفت قصص ماحد بعرفها غيري وغير زوجي ومابتطلع من غرفة نومنا؟ يخرب بيتها شو قوية.. أنا كنت سامعه صوتها العالي المزعج من التلفون بس بستنى بأمي ترد عليها لأعرف شو بدها تقول من بعد مادخل اخي وبابا لجوا.. قالتلها احلفي !.. وزوجك شو قال.. قالتلها زوجي مابسأل مو متل زوجك المعقد.. قالتلها جيبيها وتعي لعنا على البيت بسرعه انتي وبناتك.. وأنا رح أطلّع زوجي وأبني من البيت بحجة جيتكم لعنا حتى نوخد راحتنا مع بعض..

يتبع..
Mahmoud