#النصف_الآخر الحلقة الثالثة👻👻👻

#النصف_الآخر_قصص
#النصف_الآخر_3 #النصف_الآخر
الحلقة الثالثة

قالتلي هاد دليل أكيد لأنه في حدا حابك.. وبده ياكي بس مش قادرة أعرف شو طبيعية هالشخص ومن أي مله !.. حكيتلها شو بتقصدي.. قالتلي انتي في بحياتك حدا ؟!.. أنا توترت من سؤالها وارتبكت وسكتت.. رجعت سألتني.. في بحياتك حدا جاوبي!.. قلتلها لأ.. ماكنت بقدر احكي ايوه لأنه ماما مابتسكت لو عرفت هيك شي وممكن تحكي لبابا وساجد بحجة خوفها علينا من ولاد الحرام.. وبنظرهم كل شي علينا بخوّف.. حكتلي بنتي لو بتكذبي احكي بكون أحسن.. قلتلها مابكذب أنا مافي بحياتي حدا.. قالت امي بناتي مربين بعدين مو وقت هالأمور هلأ.. عندهم معهد ودراسة وطموحات.. حكت بنتك بتكذب.. في حدا بحياتها وبحبها وبتحبه.. حكيتلها انتي مابتفهمي.. قلتلك مافي!.. حكت لا تكذبي.. الشب أسمر عيونه ملونه شعره بني غامق وطبعه صعب وبقدملك مساعدات بدراستك وحياتك.. حكيتلها لأ.. كنت بحكي بعقلي لأ.. مستحيل.. مابصدق في وحدة دجالة بتقدر تعرف ادق التفاصيل عن حياتي هيك!.. لو بتضرب بالمندل مستحيل تعرف كل هاد بهالسهولة.. صرت احكي يمكن بنات عمي عم بلعبو عليه لعبة وسخه وبعرفو بعلاقتي بآدم كونه اختي هبله وممكن تحكيلهم وجابوها لتحكي هالكلام بمواصفاته حتى تعلقني مع أهلي وتخرب بيتي.. كونه انا مابرتاح ولا عمري ارتحت لمرت عمي.. هاد هيك أكيد.. اتطلعت فيه وقالت.. خلصتي حكي بمخك؟.. وشو كمان؟ أنا كذابة بس عارفه كل شي وشو احكي؟!.. امي قالت من وين بتعرفي الشب؟ حكيتلها مافي شب عم تكذب.. قالت في شب احكي هالمرة مابتكذب وقالت لمرت عمك كل شي عن حياتها الشخصية.. حلفتلها مرت عمي انه هيك وامي عطول بتصدقها.. بهاللحظة ماكنت بقدر اهرب الا لما احكي كل شي وقلت في شب بعرفه بالمعهد اسمه آدم.. بحبني وبده ياني.. حكتلي سألتك بس لأعرف اسمه.. ومابين معي انه شب سيء.. باين انه ابن عالم وناس ومحترم.. قلتلها وهوه هيك.. حكتلي امي من متى هالحكي؟ حسابنا بعدين.. امي حكت وهالعين كيف فيها تروح؟ قالتلها انا خايفه ينأذو بناتك.. صدقيني مو فاهمه شي بس شايفه في ذكر بالنص وفي عين عم تلف عالبيت.. غير هيك مش قادره اشوف.. مو كل شي بعرفه.. مرو ساعتين وحاولنا ننهي الموضوع معها.. بس ضلت عم تحكي بنفس القصة وعم تطلب تشوف البيت.. تتطلع وتحلل.. وانا عملت المستحيل لأخد رقم المطرب ريّان من بنات عمي.. بعد مافهموني انه بحب رفيف وأنا ماقدرت أصدق.. بس ميس اثبتتلي بصور كان باين انهم فعلاً في بينهم شي.. اجا البصارة مكالمة وكانت رح تقوم.. بس بطلعتها نفتح الباب وكان بابا جاي.. شافها واتطلع عليها بعصبية وساجد كان مستغرب انه مين هالمره.. فتحت الباب واستأذنت وطلعت.. بابا قال لأمي بتدخلي دجالين لعندي على البيت.. حاولت تفهمه بس هيه رجعت وقالت شو المحفور برا؟ قالتلها امي شو رجعك خلص روحي.. قالت شفت شي محفور بفاس وباين في حفرة وفي شي طالع منها.. بابا نفذ صبره وكان رح يقلعها بس هيه صدمتنا وقالت.. العين قريبة من هالمكان.. ومن المكان اللي طلعت منه رح ترجعلكم.. وحكت أنا مش دجالة وبكرا رح تيجو لعندي لأرجع لهون وحتتأكدو من كل كلمة حكيتها.. طلعت وسكرت الباب بقوّة.. ونحنا صفنا ببعض.. ساجد كان خايف وأنا مرعوبة.. وكلامها خربطنا ووترنا كلنا وكأنه نقلبت حياتنا كلها بهاليوم.. عرفت بهاللحظة انه لمّا نقول الله يكفينا شر الفرح اللي بيجي بدون سبب.. مابكون من فراغ وبكون فعلاً في شي ورا هالفرح الغير مبرر وهوه يا مصيبة يا كارثة.. بابا رجع صرخ بأمي وقلها كيف بتدخلي هيك ناس.. حكتله بعدين خلص بنتفاهم مرت اخوك عنا.. أجل الكلام ودخل جوا وبقينا لنص الليل.. حاولنا ننسى أو نتناسي اللي نقال وصار وعملنا تبولة وكيك وبلشنا نحتفل بالسنة الجديدة ونغني ونص ساعه خلصنا وراح ساجد يوصلهم عبيتهم.. ماما دخلت عغرفة بابا وسكرت الباب وميس دخلت عغرفتها وحكتلي كان يوم مو طبيعي.. فايته أنام.. فكرت كتير بالكلام.. وكانت الساعه تمنيه المسا والليل كان عم يقرّب.. فتحت الباب وتطلعت على الحفرة اللي دفن فيها ساجد القطة وصرت أعيد براسي كلام البصارة.. سكرته ودخلت على الحمام وسكرت الباب.. صرت أغني لحتى أروّق.. لأني عارفه مافي شي رح يروقني من اللي فيني غير الغنا.. شلحت كل ملابسي.. ورميتهم برا الباب.. وماكنت واعية على شي بهاللحظة غير اني عم غني وبدي اتغسّل.. البيت هادي ومافي غير صوتي طالع بالحمام.. والمي عم تنزل عليه بهدوء عجسمي ومستمتعه بغناي وناسية حالي.. بهاللحظة بلّشت أوعى عشي.. حسيت بشعور غريب.. كأنه في حد عم يلمس جسمي من ورا وقريب مني.. فعلاً في حد عم يقرب مني ويلمسني كأنها ايد خشنة عم تنمد عليه من فوق لتحت.. وتقرّب أكتر وأكتر.. كنت بهرب للحيط بس ماكان معي مجال وكنت بحس هالشي عم يتقرّب مني وكأنه عم يتحرّش فيني.. كأنه في حد معي بالحمام!!!.. في حد معي فعلاً أنا مابتوهم.. صرخت بأعلى صوت ووقعت بالأرض والمي لسه عم تنزل.. ملابسي برا ومادخلت معي ملابس.. ماكنت واعية ومخي موقف.. وليش لأرمي ملابسي برا !!.. سمعت صوت امي بتدق الباب.. أسماء أفتحي؟! شو بصير ليه صرختي بنتي شو في؟! قلتلها امي جيبلي ملابس بسرعه.. مادخّلت معي.. قالتلي في برا ملابس الك؟ ليه راميتهم هون.. قلتلها مابعرف.. حكت شفتي يا بنتي كان معي حق وقت حكيتلك انه انتو وخمين وبترمو ملابسكم برا.. حكيتلها بعمري ماعملتها امي ومابعرف ليه عملت هيك.. لا تحاسبيني هلا انا ماعم بمزح في حدا معي جوا وكان عم بلمس جسمي.. امي انا مو لابسه شي ومادخلت معي ملابس.. بترجاكي جيبلي شي البسه.. سمعت صوت بابا وساجد كان جاي بعد ماوصّل مرت عمي وبناتها وكان بسأل شو في ليه واقفين عند الحمام

يتبع..
Mahmoud Salloum