الله يا امي ..وقت كنت صبية متل عود الريحان ...
ختيرنا عبكير يا امي .... و لحقنا الهم و المرض كمان ...
امي بعد ال60 صار عندها كيس دوا .. ونحنا صار عنا كياس و هرمنا قبل الاوان ..
بيشوفونا بيفتكرونا شباب متل فلان وعلان ...
مو عارفين انو الشب بهالايام ختير كمان ...
امي اجاها الطلق وولدت بساعة زمان ..
هلق دكتورة ومستشفى وممرضة و ايكو و مرنان ..
مابتولد الوحدة الا بطلوع الروح و يا لطف الرحمن..
كانت امي حلوة وما كانت تحط مكياج والوان ..
امي قمر ما عندها غير المكحلة و حمرة الرمان ..
و ايامنا بلياج ومكياج وسشوار و بوتكس لحتى صاروا نسخ عن بعضهن النسوان ...
على ايام جدي و ستي كانو ياكلوا اشكال الوان ..
لا كان في ضغط و لا سكري ولا انسداد بالشريان ..
كان واحدهم يوصل ال 100 و لا اصبى الصبيان ...
ونحنا قال صحي و ريجيم .. وما تاكل .. وما تشرب ..رغم هيك بتضلك تعبان ..
و ما في مرض الا و صابنا والله المستعان ..
على ايام ابي و امي كانوا يسألوا عن بعضهم ويعرفوا المحتاج من الشبعان ..
الخميس عرس فلانة و اليوم خطبة فلان ..
حارتنا ضيقة وبنعرف بعضنا و كانوا اهل و ما حدا زعلان ..
بهالايام جنب بعض ومابنعرف بعض .....والحارة كبرت و ما منعرف حدا من الجيران ..
لولا ( الفيس و الفايبر و الواتس ) كنا نسينا اسامي بعض و صرنا من الطرشان ..
كان الزيت والزعتر وصحن الفول وقرص الفلافل وحبة البندورة من البستان ..
تقدمهن لضيفك وبتتشكروا المنان ..
هالايام عزايم سكالوب و شاورما وفيليه ..بتاكل مابتشبع ...و بتحس حالك جوعان ..
يرحم ايامك يا امي و يا ستي ويرحم ايامكم كمان ..
رعالسجقات و الكبة و المحاشي و الشاكرية كمان ..
كأنوا الناس مناح وكانوا يحبوا بعضهم وكانوا اهل وخلان..
لقمة هنية بتكفي مية......... والضيف ضيف الرحمن ..
وبيت الضيق بيساع الف صديق .. بالك مرتاح.. و بتنام ضحكان ..
ماكان في لا حرب .......ولا قتل ..... وكان في قيمه للانسان..
على ايامنا الانسان اتبهدل .....و جاع ...... و برد و انهان ..
خربت الدنيا يا يامو ...... والعدل ضاع .... ومال القبان ..
الله يعين ولادنا و ولادكم ..و يبعد عنهم الاحزان ..
الله يرحم ايامك ياستي و يرحم ايام زمان ..
يا يا مو ادعيلنا نرجع نحب بعضنا .. وترجع بالعافية الأوطان..
