الشرفة ومابعدها – قصة رعب لمحمود سلوم - Mahmoud Salloum
الحلقة الثامنة (8)
شفت صورة الزلمة بالزجاج.. وأول مالفيت راسي ظهرلي.. هددني إذا ماطلعت من هون رح يرسلي لعنة يقتلني فيها.. ولمّا عندّت ومارضيت اطلع.. حسيت نفسي دايخه ومش قادرة اتنفس ووقعت على الأرض وانا مغمى عليه.. ومافي شي سامعته الا صوت الشجر وصوت حدا بصرخ وبنادي من برا السور وبحكيلي.. استبرق انتي جوا ! بعد وقت غير معروف وماكنت عارفه الوقت اللي مضى بالزبط.. فتحت عيوني ولقيت قبالي تيم.. بحكيلي يلا من هون بسرعه.. حكيتله انت كيف اجيت هون.. حكالي مش مهم بس لازم نطلع من هون بسرعه.. قلتله أنا لازم أدخل البيت.. حكالي اي بيت وانتي مغمى عليكي.. ممكن يقتلوكي الأموات بأي لحظة لو دخلتي.. وممكن انأذى معك.. حكيتله اني مش طالعه من هون قبل لأدخل البيت.. ولازم اعرف شو مخبى جوا.. وانا مش خايفه من حدا هون.. بس هوه مانع كلامي وحملني وطلعني غصب عني وأنا أصرخ وأحكيله بدي أفتح الباب وانت مادخلك.. طلعني غصب عني من المكان اللي دخلت فيه.. وركبني سيارته وحكالي أنتي أكيد مجنونة.. شو اللي بخليكي تخاطري بحياتك عشان هالشي.. قلتله كنان طلب مساعدتي.. شفت هالشي بعيونه.. وفضولي السبب التاني.. أنا بدي أعرف الحقيقة ومابعمري دخلت شغلة وانسحبت منها.. ولا بخاف من شي.. حكالي انتي شخصيتك قوية.. حبيت هالشي فيكي.. حكيتله وصلني بسرعه على البيت أنا تأخرت ومابعرف اذا اجا بابا.. لأني طلعت من البرندة بشرايط قماش.. حكالي شو !! لهالدرجة بتخاطري بحالك عشان واحد ميت! حكيتله كنان عايش بينا.. أنا متأكده انه بده يانا نوخدله حقه من حدا.. انت ليه خايف ومابدك تساعدني.. قلي مش خايف بس انتي بتلعبي بالنار وبتلعبي مع أرواح.. الأرواح الشريرة صعبة يا استبرق.. وممكن أنها تدمر الأنسان وتنتقم منه.. حكيتله صح.. اللي خلاني أغيب عن الوعي زلمه ميت.. قلي أنه مقتول.. وهددني لو ماطلعت رح يأذيني.. معقول عمل فيني شي؟؟ قلي هاد اللي صار جوا.. شفتي اني صادق.. وانه الأرواح الشريرة حوالينا وبدها تأذينا.. لازم ننسحب من هاللعبة خلص.. حكيتله هاد قرارك انت حر فيه بس أنا مكمله للأخر وبدي اعرف الحقيقة.. وصلت على البيت وكان عندي احساس انه بابا جوا.. خليت تيم ينزلني بعيد شوي عن الحارة وطلعت فوراً على البيت.. لقيت الباب مفتوح.. واستغربت.. حكيت شو اللي صاير.. دخلت على البيت شفت سفيان واسراء بوجهي.. حكيتلهم شو اللي صاير وين ماما.. اشرولي عليها.. شفتها بتبكي.. قربت منها وحكيتلها شو اللي صار ماما!! حكتلي ابوكي طلقني.. نصدمت وبطلت عارفه شو بدي أحكي.. حكيتلها شو اللي صار.! حكتلي انتي السبب.. طلقني بسببك.. اجا وعرف انك طلعتي وضل يسأل لحكيتله اللي صار وكيف نزلتي من البرنده.. نجن وصار يخبّط ويكسر بالبيت ومن عصبيته طلقني.. هسه ارتحتي! قلتلها كنت مفكرته بمزح.. ماتوقعت يكون بحكي جد.. مش طبيعي هالزلمه.. أنا رح أفرجيكي فيه.. حكتلي شو بدك تعملي.. حكيتلها من يوم وطالع نحنا مش بحاجته.. أنا رح أدور على شغل وأصرف على البيت وخواني وعلى أجار البيت وهوه خليه يطلع من حياتنا.. مابدنا ياه.. ماما صارت تبكي بزيادة وتعبت ونفسها داق وأنا بطلت عارفه شو بدي أعمل.. السكري كان متعبها كتير.. ولأنه بابا مش هون ولحالنا.. طلعت على البرنده وشفت تيم بالحاره أشرتله طلعلي.. وأجا ساعدني وأخد ماما على المستشفى.. ماما شكت بالموضوع بعد مارجعنا.. وحكتلي هاد هوه! حكيتلها شو قصدك.. حكتلي هاد اللي تطلقت عشانه.. حكيتلها اقسم بالله انه الموضوع مش حب ولا شي.. انا مافي شي بيني وبينه.. كل القصة اني علقانه بقصة مش بإيدي وبدي أعرف نهايتها.. بالليل أجا بابا على البيت.. وهالمره كنت أقوى مره فيها وقدرت أواجهه.. حكيتله انت ليش جاي..!؟ ما الك اشي عنا.. انا حطيتلك غراضك بشنته.. خدهم والله معك.. حكالي قديشك وقحه وقليلة ترباية الله يلعنك وصار يسب.. فتحتله الباب وقلتله لبرا.. طردت بابا.. كنت بستمد قوتي من هالمهمه الصعبة اللي عايشتها.. وقدرت أكسر الخوف شوي شوي بسببها.. وما كنت متوقعه بيوم أوصل لهون أو أتصرف هيك وخصوصاً مع بابا.. بس في شي كان يقلي بستاهل.. هوه ماعرف قيمتنا وتخلى عنا.. وشخص متل هيك مش بحاجته.. وشو رح نتذكر منه.. طول عمره ظالمنا ومعيشنا بقهر.. بلاه يمكن أحسن.. قدرت أزيح من طريقي عائق كان مصعب المهمه عليه وهوه بابا..!! صرت اطلع على البرنده وأحكي مع كنان كل يوم.. يظهرلي بعد نص ليل وبعد الساعه 1.. حكيتله اني رحت.. وحكيتله أنهم أذوني وماقدرت أدخل.. بس هوه أصّر عليه بالدخول.. وحكالي كتير شغلات ماقدرت أفهم منها ألا شوي.. بس اللي فهمته منه ومن أشاراته بإديه انه اجي على البيت اللي هوه فيه مرة تانية.. وقلي تعي بهاللحظة.. انا خفت كتير وماكان بدي أطلع بهالوقت برا البيت حتى لو بابا راح خلص.. بس الفضول أكلني من جوا أكل.. وما كان الي مجال الا اني افتح الباب وانزل الساعه 2 بالليل.. نزلت ووقفت بالشارع.. حكيت ليش كنان قلي أجي! في شي مش مفهوم.. شو بصير ياربي شو! وقفت ساعه بتطلع على العماره وبس قربت من الباب لقيته مسكّر.. ماحدا غيري بالحاره ودقات قلبي بتزيد شوي شوي.. حكيت كيف بدي أطلع فوق والباب مسكر.. رجعت لآخر الشارع وصرت أدور على شي يخليني ألعب بسكرة الباب على عسى انه فتح.. دورت بالشارع عشي وحاولت اكسرها بحجر.. وفجأة حسيت اني بشلّق الناس عليه بالشارع خصوصاً انه صار في صوت.. سمعت صوت ورا العماره.. رحت اركض.. وفجأة شفت البنت!.. حكتلي تخبي.. حكيتلها شو انتي من وين اجيتي.. وليش بتضلك تطلعيلي.. حكتلي انا بقلك تخبي.. قلتلها طيب.. تخبيت ورا السور بالجهة التانية للعماره.. وفجأة سمعت صوت حدا فتح باب العماره.. قلت مين اللي نازل من العمارة الساعة 2 بالليل.. يالله شو عم بصير.. وانا براقب بالباب.. شفت زلمة طلع منها.. قربت وجهي لأشوف مين كان صعب عليه عشان العتمه.. ولما قربّت أكتر وصرت أتطلع من ورا السور.. مر الزلمة من قدامي.. والصدمه كانت أنه بابا هوه هاد الزلمه!.. حكيت مش معقول.. شو عم يعمل هون بهالوقت.. دورت حواليه على البنت المشوهه مالقيتها وكانت مختفيه.. وفجأة قلت كنان حاسس بكل شي.. روحه لسه ساكنه المكان.. هوه عارف بكل شي.. بس صدمتي كبيرة.. بابا بالعمارة ليش! لازم أطلع.. الباب كان تاركه بابا مفتوح.. أنا طلعت فوراً على العماره ووصلت باب إبتسام.. قلت كيف بدي أدخل وكنان ليش بده ياني أدخل.. لسه بدي أدق الباب.. ظهرتلي ردينه وبابها انفتح فجأة بعتمه وكان مبينه وجهها بإضاءة خافته وشكلها برعب.. قالتلي عملتيها ورحتي البيت.. شفتي الزلمه اللي هناك.. طلعلك مش هيك! هاي الروح اللي ساكنه المكان هناك.. هاي اللي حذرتك منها وقلتلك لو رحتي هناك رح أقتلك.. فعلياً مش انا اللي رح اقتلك.. بس روح هاد الزلمه هيه اللي رح تحرقك لو قررتي ترجعي.. وهاد اخر تحذير لإلك.. وآخر مرة رح أشوفك فيها.. حكيتلها انا مش خايف منك.. انتي مجرد روح ميته مافيكي تعملي شي.. صدقيني رح أعرف السر.. ورح أحرقك انتي فاهمه!! صارت تضحك بصوت عالي وحكتلي.. استني اللي جايكي.. واختفت.. أنا ارتبكت وقلت أنا شو عملت بحالي يالله.. حاسه اللي بصير معي كابوس مخيف مش قادرة أصحى منه.. دقيت الباب وضليت أدق وماكانت إبتسام تفتح وبعد دقايق فتحت الباب.. حكتلي انتي!! شو بدك مني! شفتها كان وجهها غير عن المره الماضية.. كانت مرتبه حالها وحاطه مكياج.. حكيتلها بالحرف الواحد وبدون خوف.. روح كنان رح تعاقبك.. حكتلي شو! انتي نجنيتي..! قلتلها روح كنان معك جوا.. بس انتي مش حاسه فيها.. ساكنة المكان من خمس سنين.. حاولت تطردني بس أنا ما سكتت وقبل لتسكر الباب بوجهي دخلت فوراً.. واجتها وحكيتلها كنان جوا.. أنا شايفته بعيوني.. كنان هون هيه عم يتطلع عليه بالعربايه.. حكتلي انتي مجنونة اطلعي من بيتي.. قلتها مش مجنونة أنا عاقلة بس اللي مابتعرفيه اني بشوف الأموات.. وشايفه كنان فبيتك.. ورح يجي يوم وأعرف اللي مخبى.. كنت فعلاً شايفه كنان وحكيتلها انتي مارح تصدقي الا لكنان ينتقم منك.. احكيلي انتي شو عملتي فيه.. كيف نحرقت الشقة.. سكتتني وقالتلي انتي مادخلك بشي.. هاد الشي صار من 5 سنين وبسبب كهربة البيت.. انتي شو بدك؟ قلتلها حاسه انك انتي اللي قتلتيه.. قالتلي كنان هوه اللي انتحر.. انا كنت عارفه انه وراكي شي.. وبحذرك مرة تانية لو رجعتي لهون مرة تانية رح اخلي سيرة شرفك بكل مكان بالحاره.. رح افضحك فاهمة.. رح افضحك.. قلتلها انا مش خايفه منك بس تأكدي رح انتقم منك ورح اساعد كنان.. وماتنسي اني قلتلك انه روحه هون ورح تحرقك.. وطلعت من البيت فوراً على بيتي.. رحت على البرنده كان كنان مش موجود.. عرفت للحظة انه طلب مني اجي البيت لأعرف انه بابا كان موجود.. بس ليش!! هالشي مالقيت اله تفسير الا لما طلع الصبح ونزلت على الحاره.. طلعت مع تيم بالسيارة وقلتله على كل اللي صار مبارح.. وحكيتله أوقف معي وساعدني أنا واثقة فيك.. وبعد ما ترجيته وافق.. وقلي أنا معك ورح نرجع مرة تانية البيت.. بس أول شي لازم نعمل شي تاني.. انه نخلع باب ردينه وندخل.. متأكد أنه رح نلاقي كتير شغلات.. وهالمره مارح تطلعلك ولا تفكر تأذيكي أبداً لأنك رح تكوني معي..
يتبع
إستبرق💜
