وقفنا كلنا ورا الحيط وصرنا نسمع كلامها.. كانت عم تحكي مع حدا وأول الكلام اللي سمعناه كان.. أنا بدي أعذبك زي ماعذبتني.. اللي عملته فيك لسه ولا شي من اللي رح يجيك.. وبدل ما اجيك كل أسبوع لهون.. رح أصير أجيك كل شهر.. حتى تعفن هون لحالك.. وأرميلك الأكل زي الكلب.. لا تكون مفكر أنك رح تخلص من شرّي.. هههه لأ ياحبيبي.. لا رح تخلص مني ولا رح تخلص من نعمان لأنه روح نعمان عم تلعنك كل يوم بهالمكان.. وعشان هيك حطيتك هون.. عشان اللي عملته فيه وفيني.. ومش بس هيك.. أنا كل ما اجي لهون بدي أذكرك باللي صار.. حتى أحرقلك دمك أكتر وأخليك تتندم على اليوم اللي فكرت تخونّي فيه.. قلبك لسه محروق على إبنك؟ قول قلبك لسه محروق على كنان!!! اه مش هيك؟! الله لا يقيمك.. انت بتستاهل اللي صرلك.. وأنا حرقتله قلبه كمان على حبيبته بحرقي لإلها.. كان بدي أحرقهم همه التنين بس مازبطت معي.. إبنك غبي شو بدنا نعمل.. لأنه معاق جسمياً وعلقياً.. بدّل ما ينحرق مع حبيبة القلب راح على البرندة ينادي على الناس ينقذوها ومن غباءة وقع.. بس تعرف أنا شكلي بالآخر رح اعمل هيك وأحرق هالبيت فيك.. متل ماحرقتلي قلبي بخيانتك مع أعز صديقاتي.. ردينة الحقيرة.. برضه بتستاهل اللي صارلها.. بس تعرف أنا كمان بطّلت سائلة عنك.. صحيح لسه متزوجتك حتى أحرق قلبك.. بس عندي إلك خبر كتير رح يبسطك.. أنا خنتك! ..صحيح هالشي تأخر كتير.. خمس سنين بس كنت عم بدّور على واحد بستاهل أخونك معه.. والأهبل صدقني اني بدي أتزوجه وراح طلق مرته عشاني.. انتوا اصلاً الرجال غبيين.. بتخونوا ومفكرينا مارح نعرف.. ومابتعرفوا اللي رح يجيكم بعدين منّا وشو ممكن نفكر نعمل فيكم.! وفجأة سمعنا صوت زلمة بقول.. لا تنسي انه ردينة مره وخانت.. الخيانة مش حكر على الرجال.. بابا كان معصب ومنهار من الكلام اللي عم بسمعه وفجأة طلع من ورا الحيط وصار يصرخ على إبتسام ويقلها.. أنا هيك ينعمل فيه يا واطية.. أنا ينلعب فيه هيك!! قلتيلي انك لسه متزوجة وبدك تتطلقي لأنه زوجك مقعد وعالة ولأنه كان حقير معك وعشان هيك رميتيه بعيد عن الناس.. وانك حبيتيني بعد اسبوعين من اليوم اللي طلبتي مني فيه أجبلك في خضرة على البيت لأنك عأساس مرة وحدانية وما الك حدا.. ما كنت متوقعك بهالحقارة.. ولك انا طلقت مرتي عشانك وخنتها.. جبتيني على بيتك وضحكتي بعقلي عشان تنتقمي من زوجك بخيانتك لإله معي وعشان خانك! عشان تستلذي بشعور الإنتقام وتبردي قلبك من اللي علمه فيكي.. طلعنا انا وتيم وشفنا زوجها.. كان مقعد ووجه كئيب وحزين ومكسور.. كان مظلوم كتير.. ممكن يكون ظلم مرته بس اللي شفته بعيونه انه نظلم أكتر واللي عملته فيه ما كان بتساهله كل هالقد.. العقاب اجا كبير عليه وكسره كتير.. أنا فوراً سكتت بابا.. وتيم فجأة صار يبكي.. أنا حكيتله تيم شو مالك ليه عم تبكي..!! اتطلع تيم بإبتسام وصار يحكيلها.. انتي اللي حرقتي ياسمين!! انتي أحقر مخلوق شفته بحياتي.. شو عملتلك ياسمين حتى تحرقيها.. طول هالوقت كنت مفكر اللي صار تماس كهربائي بالبيت وزعلت أكتر عكنان برغم اني كنت بحبها.. لأني ماحكيتله اني بحبها عشانه صاحبي وعشان حبته وهوه مقعد وأنا الأنسان الكامل رفضتني وماقدرت تحبني.. بتيجي بتقتلي هيك إنسانة بدون ذنب ممكن تعطي حبها وقلبها لإنسان ناقص! شو الذنب اللي عملوه عشان تنتقمي فيهم بسبب عملة زوجك!! شو فهميني.. اتطلعنا عليها وكان وجهها كله دموع وأنا مصدومه من كلام تيم.. بس تذكرت لما قلي أنا حكيتلك نص الحقيقة بس ماقلتلك كل شي.. وقتها عرفت انه مخبي عليه شي.. وبهاللحظة نكشف كل شي وكملت الحقيقة.. اتطلعت فينا إبتسام واحد واحد وصارت تقول.. انتوا مابتعرفوا شو شعور المره بس تحس انها نطعنت من شخص كانت معطيته كل شي بحياتها.. حنانها وحبها وما كانت منقصة عليه شي.. ومع هيك خانها ومع مين؟! مع صديقتها وجارتها الباب بالباب.. اليوم اللي كشفت فيه الخيانة انا تغيرت.. بطلت الأنسانه الطيبة اللي ضحت بكل شي عشان زلمه.. قلبت شريرة وصرت إبليس بحاله.. قررت أنتقم بعد ماشفت زوجي طالع من باب شقة جارتي من العين الساحره.. ولما فتحت الباب وواجهته أنكر هالشي.. واستغل سفر زوجها عشان يخوني معها.. دخلت على البيت متل المجنونة ولما دخلت الغرفة.. شميت ريحته على تختها.. هالريحة اللي كانت تعيشني من جديد كل ما أشمها منه بس يحضني.. موتتني بس شميتها على تخت وحدة غيري.. ومش أي وحدة.. أنتوا ما بتعرفوا شو معنى الخيانة.. فوراً قررت أحط إيدي بأيد الشيطان بعد ماشفته مذلول وبترجاني ما اخبر زوجها.. وهيه مذلولة أكتر منه وبتطلب مني أتستر عليها وما افضحها بالعمارة.. بس أنا خدعتهم همه التنين.. وإستنيت زوجها لما رجع من السفر.. حكيتله على كل شي بدون علمها وعلم زوجي.. واتفقت معه انه يقتله بهالبيت.. وفهمت زوجي انه ردينة ضعفت وخبرت زوجها بخيانتها لإله وعشان هيك لازم يتخبى بهالبيت اللي بملكه أنا وعشان هالحي مابسكنه غير المغاربة ماحدا رح يشك انه متخبي هون.. قلت لزوج ردينة روح هاد العنوان.. فضي المسدس براسه.. ولما ترجع اتفاهم مع مرتك أنا مستغنيه عن زوجي شو مابدك اعمل بمرتك.. بس اللي ما توقعته انه يقتل مرته وإبنه قبل مايروح البيت.. كان نعمان معاه مسدس كاتم صوت وقتلها وقتل ابنه بعد ماكان منهار وشك للحظة انه الولد مش إبنه.. دخل نعمان هالشقة وواجه زوجي.. ولما تحاوروا باللي صار.. زوجي استغل الفرصة بكلامه واللحظات اللي بكى فيها ومسك عصاية وضربوا فيها.. وقع المسدس من نعمان.. زوجي اخده وقتل نعمان فيه بهالبيت.. وعشان يخلص نفسه من التهمة ضرب نار عأجريه عشان يحكي للشرطة انه دافع عن نفسه.. بس ماكان عارف انه رح ينشل ويصير متل ابنه المعاق.. الشرطة عرفت ونسجن زوجي وطلع بعد 3 سنين.. وهوه بالسجن قررت انتقم من كنان لأني كنت بشوف صورة زوجي إسماعيل فيه.. وقررت أحرق البيت وحبيبته معه.. أجت ياسمين على البيت ودخلت عنده عالبرنده وأنا رحت سكرت باب الغرفة عليهم وهمه ضلوا بالبرنده وبعد ما رميت الكاز بكل مكان بالغرفه وحرقتها وطلعت.. كنان ما كان إله ذنب بس ذنبه انه ابن ابوه.. ولا ياسمين الها ذنب.. نحرق البيت فيها والباب مسكر لهيك ماعرفت تطلع.. وكنان حاول يستنجد بالناس بعد ماكانت ياسمين بتحاول تطلع من الغرفة وتنقذ كنان بس علقت جوا.. وكنان وقع من البرنده وهوه عم بتسنجد بالناس.. ولما طلعوا ياسمين كان لسه فيها الروح بس ماتت بالشارع قبل لتيجي سيارة الأسعاف.. وبس سألوني الشرطة وين كنتي قلت أنا مابعرف شي.. كنت طالعه وشكلهم كانوا مبسوطين بالغرفه عشان هيك مسكرين الباب.. اتهمت البنت بشرفها وسودت وجه اهلها بين الناس وكنان مات.. وأنا صفيت بالبيت لحالي لحد ماطلع زوجي من السجن.. حبسته سنتين بهالبيت وكل اسبوع كنت بروح عنده.. ولما شفت ابو سفيان جاي ومفكر انه بنته بتعرف شب من بيتنا.. فكرت وقلت هاد الزلمة سكن جديد هون وشكله مابعرفني ولا يعرف حدا ولا بعرف اللي صار.. وهوه شخص ممكن ابرّد قلبي بنار الخيانه اللي ولعها زوجي وصديقتي فيني.. واخون زوجي معه.. وخصوصاً اني بعدني على ذمته.. وبالفعل صار هيك.. انا ضحية صدقوني.. واللي عملته هاد السبب فيه.. تيم كان طول الوقت ببكي على ياسمين وأنا فهمت كل شي.. عرفت وقتها انه كنان اختارني لإلي بعد تيم حتى أنقذ أبوه قبل ما يضيع وينحرق ويموت متله.. كانت روحه بس بدها هالشي.. عرفت انه ياسمين كانت عم تساعدني لأوصل الشقة من خلاله.. لأنه روحها لسه بتحب كنان وموجودة بالمكان اللي طلعت منه.. طلع تيم من الشقة وهوه ببكي وإبتسام قالت أنا جاهزة لأي شي بدكم تعملوه فيه وطلعت من الشقة.. بابا كان متدمر على اللي عمله وطلع هوه كمان.. بقيت أنا وأبو كنان لحالنا بالشقة.. اتطلعت فيه وحكيتله.. كنان بسلّم عليك.. قلي كيف؟ انتي بتعرفيه.. حكيتله لا تسأل شي.. تعال معي.. اخدت عربايته وطلعت فيه من الشقة وجبته على بيتنا.. وقلت لماما هاد هوه اللغز وخلص حليته.. أبو كنان.. ماما اهتمت فيه وعملتله أكل.. وبعد ما أكل وارتاح وديته على البرنده.. اتطلع على شقة كنان وصار يبكي.. حكيتله حنيت للمكان ولريحته؟ وبهاللحظة اخدته على بيته.. كانت إبتسام مش موجودة بالشقة.. وبعد ساعات عرفنا انها سلمت حالها للشرطة.. صرت كل يوم أزوره وأنظفله الشقة واهتم فيه كأنه أب جديد عرفته بحياتي.. وعوضني عن حنان الأب اللي نحرمت منه.. كان حنون معي وقدّر كل شي عملتله ياه.. من هاد اليوم بطلت أشوف كنان.. صرت أشوف أبوه بداله بالبرنده عم يتطلع ويبتسملي كل نهار وأنا مبسوطه وكل مايبدا نهاري أتصبح فيه.. بعد أسبوع أجا تيم طلبني من ماما.. وخطبني وقلي أنا مبسوط اني عرفتك.. وماكنت متوقع انك إنسانة نبيله لهالدرجة.. ضحيتي وكسرتي خوفك عشان تساعدي شخص ما حد بشوفه إلا إنتي.. مجرد خيال وروح ما الها وجود.. ومع هيك وقفتي معاه وحققتيله اللي بده ياه منك.. أنا بحبك .. قلتله الأهم من كلمة بحبك.. هيه أنا بوثق فيك.. اهم شي تضلك بتوثق فيه ومايجي يوم وتخوني فيه.. لأنه الخيانة صعبه كتير.. وبعد ماخطبت شافلنا تيم بيت بعيد عن الحاره ومشاكلها الكتيرة.. وقبل يومين من يوم عرسي كنت أنا وماما على البرنده بنشرب الشاي وكان قبالنا أبو كنان.. حكيت لماما.. لو بيوم بابا خانك ممكن تسامحيه؟ حكتلي.. الخيانة بتوجع بس مش كل مره ممكن تعمل اللي عملته إبتسام بزوجها وإبنه.. لهيك لو أبوكي خانني أنا رح أسامحه لأني بحبه برغم كل شي سيء فيه.. رن الجرس بهاللحظة رحت أفتح.. كان بابا على الباب.. قلي أشتقتلكم وماقدرت ما اجي اهنيكي قبل يوم عرسك.. دخل عند ماما على البرنده وقلي أتركينا لحالنا.. وبعد ماطلع عرفت انه اعترف لماما بكل شي وطلب منها تسامحه.. ماما كانت صادقه بكلامها معي وما كان مجرد حكي وبالفعل.. سامحته
النهاية
رأيكم ؟!
