ممكن .....؟؟
.
الطفل يرجع يرضع طبيعى تانى بعد ما اللبن نشف ..؟؟؟
.
أينعم ... ممكن جدا...
.
- يعنى يا دكتور اللبن بيرجع فى صدر الأم تانى ؟؟
دا أبسط ما فى الموضوع رجوع اللبن ..
.
- طيب يا دكتور .. الطفل بيرجع يرضع طبيعى و يسيب الببرونه و الصناعى ؟؟ خصوصا بعد موضوع الالبان الصناعى الملوثة ده ..
.
طبعا .. بس دا لو الأم عايزه ... و هنفهم ليه فى آخر الموضوع ..
.
إذا كان حصل معاكى موقف كان سبب فى ترك الطفل للرضاعة الطبيعية .. فالفرصة متاحة لرجوع اللبن و رجوع الطفل يرضع ...
.
بس نعرف الطفل ترك الرضاعة منك ليه ؟؟
ايه الاسباب علشان نقدر نساعدك و اللبن يرجع و الطفل يرجع ياخد صدرك تانى ..
.
من واقع الخبرة ..
*أغلب الاطفال بيكونو أخدو ببرونه بيبى درينك بعد الولادة ..
.
* بعض الأمهات بيكون اللبن لسة مش كتير اول 72 ساعة من الولادة.. و بروح الطفل للدكتور يقوم الدكتور كاتب لبن صناعى و يقول للاهل ادوله صناعى لغاية ما اللبن ينزل او بمعنى ادق (لغاية ما الطفل يتعود على الصناعى و يغضب على ثدى الأم )
.
*الرضاعة من الببرونه تتم بطريقة مختلفة تماما غير الرضاعة من ثدى الام .. و خصوصا اذا كانت الام مش عارفة ترضع بطريقة صحيحة .
.
المهم ... نرجع لموضوع اعادة الارضاع ..
و طبعا هحكى عن حالة أم و طفل عندى فى العيادة ..
.
يبدأ الموضوع بأم و أب (دكاترة بكلية الزراعة ) و طفل اول مرة جايين يكشفو عندى عنده شهرين و نصف علشان تعبان و سخن .. و بيشتكو من تكرار التعب أكتر من 5 مرات منذ الولادة ..
.
قلتلهم هو بياخد رضعة صناعى مع الطبيعى ..؟؟
قالت مامته يا ريت بياخد رضعة واحدة .. دا بقى بيرضع صناعى بس و غضب على صدرى بقاله شهر و شوية و اللبن نشف كمان !!
.
المهم وضحت للأم ان ممكن نرجع اللبن تانى و الطفل يرجع يرضع منك ...
.
قالتلى : يا رييييييييييت ..هو ينفع يا دكتور ؟؟
.
قولتلها :رجوع اللبن سهل جدا لكن رجوع الطفل هيتعبك شوية ..
قالتلى : مش مشكلة .. هستحمل بس قوللى اعمل ايه ..
.
قولتلها بصى .. اول هام .. هنمنع الببرونه ... ايوه .. الببرونه مش اللبن الصناعى ...
يعنى هتعملى اللبن الصناعى و تديهوله بالملعقة او السرنجة .. المهم .. ينسى الحلمة الصناعى دى نهائى ...و لو والده مش هيستحمل بكاؤه روحى بيه كام يوم عند مامتك ... لأنك لو ضعفتى و رضيتى تديله الببرونه بعد ما يعيط جامد ... انسى الموضوع كله و ريحى دماغك !!!
.
و تعملى تلامس جلد الطفل بجلدك بدون ملابس لان دا هيحنن قلبه على الرضاعة و هيخليه يرجع يفتكر اول أيام الولادة و يخليه بسهولة نفسه يرضع .. و لو عرفتى تخليه ياخد صدرك حتى و هو نايم علشان يتعود على الحلمة الطبيعية .. و اهم حاجه متغصبيش عليه !!
.
و هكتبلك على حبوب موتيليام لتزويد اللبن و متقلقيش منها مفيش منها اى ضرر .. بس المهم .. التعصير كل 3 ساعات.. ليل و نهار .. علشان دا بيحفز تكوين اللبن و علشان لما اللبن يبدأ يتكون نقط و تعصريه ... و صدرك يفضى .. يقوم يكون لبن جديد و اكتر من اللى اتعصر ..
.
و قلتلها بعد اسبوع أشوفك و نشوف وصلنا لفين و ربنا يقويكى ..
.
جت و قالتلى اللبن بدأ يتكون نقط بسيطة .. و الولد بيحاول ياخد صدرى بالليل و كانت فرحانه جدا بأول استجابة للطفل
قولتلها كويس جدا ..طيب جربى تعصرى كده .. ...
عصرت قدامى .. بس للأسف لقيتها بتعصر بطريقة غلط جدا ... .. .. ..
وهى دى المشكلة الكبيييييييييييييييييييييييرة جدا لأى أم بتحاول تعمل اعادة ارضاع ..
لأن اللبن لو متعصرش كويس و ثدى الأم إتفضى للآخر .. عمر ما اللبن هيزيد للأٍسف ..
.
المهم علمتها طريقة التعصير المظبوط ( زى الفيديو فى اول تعليق )
.
و قولتلها عصرى مظبوط و حاولى تدى للولد اللبن اللى انتى معصراه من صدرك الاول و تكملى بالصناعى لو لسه جعان ... و 5 ايام و نشوفك تانى
.
و متنسيش .. ياخد اللبن بأيه ... بأى حاجة الا الببرونة ..
.
جاتلى تانى و قالتلى كمية اللبن ما شاء الله كترت عن الاول جدا ..
قلتلها هنشفطه بالشفاط الكهربا و نشوف وصلنا لفين ... لقيته ما شاء الله اتحسن كتير و تقريبا 55 مللى ..
.
قولتلها هاتى الولد لما أعلمك طريقة المسكة الصحيحة.. لأنه لو كان عرف يمسك صح و يشبع منك .. مكنش زمانه غضب على صدرك و قضل اللبرونه و اللبن الصناعى
.
المهم قالتلى انا قبل ما اولد شفت فيديوهات كتير لطريقة الرضاعة و كنت برضع بنفس الطريقة زى ما شفت بالظبط .. ..
قلتلها جربى كده ترضعى زى ما كنتى بترضعى ..
......... طبعا زى كل الامهات مقعداه نص قعدة و رقبته ملووحة و ممسكاه طرف الحلمة بس و خايفة على نفسه ..
.
قلتلها بصى .. لو هترضعيه كده عمر ما الطفل هيتحصل على اللبن و لا اللبن هينزل بسهولة .. فضلا عن ان رقبته الملووحة هتخليه زهقان و مش عارف يواصل الرضاعة ..
.
المهم وريتها على الطبيعة ازاى تخلى البيبى يفتح بقه و يمسك مسكة صحيحة ( زى الفيديو فى تانى تعليق ) ..
.
المهم قولتلها .. كده كمية اللبن كويسه .. و الموضوع هيمشى كالتالى ,,,,
يرضع الاول منك ... لغاية ما اللبن يفضى من صدرك خالص .. و لو لسه جعان يرضع من الناحية التانية لغاية ما تفضى خالص ميبقاش فيها ولا نقطة و لو لسه جعان تكملى ب 30 سم صناعى و نحاول نقلل الكمية الصناعى كل مرة لو احتاج بس بالتدريج ..
.
المهم جاتلى بعد اسبوع و قالتلى على فكرة انا محتجتش صناعى خالص و الحمد لله كان اللبن موجود علطول ..أنا مش عارفة اشكرك أزاى !!
قلتلها المهم الوزن ..
لقيت وزن البيبى الحمد لله بيزيد ... و قلتلها يا ريت تكونى استفدتى..و يا ريت تحكى تجربتك لكل أم عايزه ترجع اللبن و تخلى الطفل يرضع طبيعى تانى ...
.
و انتى ... بصراحة تستحقى الشكر لأنك صبرتى على بكاء ابنك و رضعتيه فترة بالسرنجه و صبرى على بكاؤه لأنه عايز الببرونه .. و دى نقطة هامه .. ان كان عندك ارادة .. و اصريتى انك تعملى الصح ..
.
.
و انتى ...
مستنية ايه ...
الموضوع مش صعب خالص ..
بس نصيحة لازم يتم الموضوع تحت اشراف استشارية رضاعة طبيعية لأن فيه حاجات كتير لازم يتم توجيهك فيها علشان الموضوع يتم بنجاح ..
.
مع تحياتى
د.أحمد السعيد
#استشاري_الرضاع��_الطبيعية
#اعاد��_الارضاع
#التخلص_من_اللبن_الصناعى
