#الحاس��_رقم_سبعة_قصص
#الحاس��_رقم_سبعة_8 #الحاس��_رقم_سبعة
الحلقة الثامنة
كنت بحكي مع امي وبحكيلها عن اللي شفته بالمطبخ والولد الصغير اللي حكا عني.. والشخص اللي ظهرلي بالليل شبه بابا.. ولمّا رن التلفون وحكالنا الشخص هاد انه بابا مخطوف نصعقت .. وطلبت مني امي احكي مع اخوي غسان بسرعه.. حكيت معها وحكيتله اللي حكالنا ياه .. اجا من الشركة بسرعه على البيت.. وقاللنا مانطلع ابداً ولا حدا يطلع من البيت.. وصّل بعد ثلث ساعه.. حكيناله شو اللي صار وانه حدا اتصل.. حكالنا اعطوني التلفون بسرعه .. اخد تلفون ماما وطلع الرقم.. للأسف كان الرقم برايفت .. عصّب وصار يضرب كل شي بوجهه .. حكيتله غسان كل اللي بتعمله هاد مارح يفيد.. شوف اختك نخطفت ورجعت سليمة وماعملولها اشي.. بس الحقير هداك تزوجها واحنا مابنعرف كيف صار هيك.. وليه تركها اذا بده يتزوجها ومابنعرف مين هوه .. خواتك نفس الشي.. خطفوهم ورجعوهم سالمين.. ما اظن انهم يأذو أبوك أنا متأكد إنهم رح يطلعوه متل ماطلعو خواتك خلينا نصبر شوي.. حكالي هاد ابوي عارف شو يعني .. زلمة كبير مابتحمل واحنا مابنعرف شو اللي ممكن يصير لهيك لازم نخبر الشرطة وحالاً.. حكيتله الشرطة مارح تفيدنا .. انا متأكد انه كل اللي بصير لعبة أرواح .. اللي بلعبو معنا أرواااااح ميته .. ومافي إلهم وجود.. وحتى اللي تزوج هديل روح.. يعني هيه مش متزوجة رسمياً واللي صار شيء شكلي وما إله وجود بأرض الواقع.. اللي بعملوا هيك بدهم يانا نطلع من البيت وبس.. لأنه انا من شوي كنت بحكي لأمك عن شغلات بشوفها كل يوم بهالبيت بالليل وماكنت بدي أحكي لحدا لأنه ببساطة أبوك مابصدقني وما حدا ممكن يصدق.. واذا كنتوا تكذبوني بسبب حاستي السادسة ولما احكيلكم شي بده يصير.. تحكولي هاد شي كذب وخيال.. لسه مبارح حاكيلكم رح يصير شي اليوم كمان وكنت حاسس هيك.. حكالي غسان انت شو بتشوف؟؟ حكيتله بشوف ولد صغير كل مرة بحكيلي نطلع من البيت وبشوف أبوه بشبه بابا بالزبط قريب من ملامحه ومبارح ظهرلي بالليل وكنت متأكد وحاسس انه رح يصير شي فبابا لهيك حكيت للكل ديرو بالكم على حالكم .. أنا كنت حاسس بس ماحدا بصدقني.. صار يصرخ غسان بكل مكان بالبيت ويحكي لو انتو أرواح وعايشين هون اطلعو واجهوني.. حكيتله هديل قارءة كتير عن الأرواح وكيف الواحد بتصرف معهم وكانت بدها تفيدني المرة الماضية بس نخطفت قبل ماتحكيلي شي.. بعد شوي بس تروّح من الدوام خليها تحكيلنا .. استنينا هديل لروّحت وخواتي التانين روحوا.. قعدت هديل صارت تبكي على بابا وتحكي ليش هيك بعملوا .. حكيتلها مافي داعي تخافي لأنه اللي تزوجك مجرد روح وانتي شفتي بعينك لما شفتيه بالبيت وأنا طلعت دورت بكل مكان وكان مختفي.. هدول مابدهم يتركونا.. ممكن يكونو جد همه عايشين بهالبيت وماتو بسبب حادثة ما واللي كان بعرف عنهم كل شي المرة اللي شفناها بس هيه برضه توفت من شهر.. واحنا سكنّا بيتهم بدون أحم ولا دستور .. أنا متأكد انهم بس بدهم يانا نطلع من البيت ومابدهم أكتر من هيك ولو طلعنا رح يحلّو عنا.. صارت امي تبكي وتحكي كنت بدي احكي لأبوك اليوم خلص نطلع بس هيه نخطف .. حكا غسان أنا طالع ادوّر على بيت واللي بده يصير يصير خلص.. حكيتله هاد هوه وتأكدو انه بابا رح يطلع اليوم المسا أنا هيك حاسس.. امي صدقتني وصارت تحكي كل أحاسيسك صحيحه لهيك رح نستنى.. مر الوقت واحنا قاعدين انا وخواتي وامي بغرفة وحدة ومش حاسين على شي.. وفجأة فتح الباب .. طلعنا نطلع من فوق الدربزين.. شفنا غسان جاي وبحكيلنا مالقيت ولا بيت .. كله غالي وكله فوق طاقتنا .. واحنا مامعنا هيك أجارات.. حكت أمي أنا رح أبيع صيغتي وكل شي المهم نطلع من هون مش مهم أجار .. حكالها مهوه هاد البيت مش مبيوع ومش قادرين نتصرف فيه.. لازم خلص يملكه شخص تاني.. وياخسارة اللي بده يملكه رح ينخدع فيه وينتقل كل شي صار معنا لأله .. صرت احكيلهم هاي المره اللي اجت عنا أول يوم سكنا فيه أم عامر هيه عندها كل السر واكيد هيه اللي بتعرف كل شي.. بس هيه مجرد روح واحنا مش قادرين نكشف شي.. صابنا إحباط .. وبعد ساعه رجع بابا.. شفناه مغبّر ومتوسخ.. ماما هجمت عليه وصارت تبكي وتحكي وين كنت وشو صار معك ؟! حكالنا انه سمّع صوت مره هددته وحكتله نطلع من البيت وماكان سامع شي لأنه خطفوه من الشغل وربطو عيونه واديه وماعرف لوين ودوه وبعد ساعه سمع صوت هالمره وزلمة تاني.. وبعدها حملوه ورموه قريب من البيت.. حكولي كان معك حق واحاسيسك صحيحه ومن وقت هاللحظة صارو يعتمدو عليه بكل شي وقبل مايحسوا انه رح يصير شي يحكولي حاسس شي؟؟ احكيلهم لأ مش حاسس.. ضليت لحالي بالغرفة مهموم وبستنى يطلع الصبح حتى نطلع كلنا ندور على بيت خلص .. بهاللحظة دق بابي .. قلت مين؟؟ طلع غسان بحكيلي بدي احكي معك شوي.. دخل لعندي وصار يحكيلي انه هوه ماحس انه ليه هدول بعملوا معنا هيك .؟ قلتله اكيد عشان البيت أنا متأكد لأنه اللي كانو ساكنين فيه مابدهم يانا .. وسبق وحكيت لماما يمكن عازز عليهم ذكرياتهم فيه وماتو لسبب ما نحنا مابنعرفو... حكالي طيب بدي اشوف هدول الناس.. حكيتله مين؟ قلي هاد الولد الصغير اللي بتشوفه وأبوه كمان.. قلتله انا بشوفهم لحالي انت كيف بدك تشوفهم.. قلي الدنيا ليل ويمكن هسه نشوف شي تعال ننزل لتحت ونراقب المكان.. نزلنا انا وياه للمطبخ وصرنا نطلع ناحية الحيط وانا احكيله شايف هناك من هناك بطلع الولد الصغير ساكن بغرفة ورا التلاجة والغرفة متل بيت فيها فرش وكل شي كأنه من أيام الستينات.. صرنا نطلع واحكي بصوت واطي.. انا هوون؟؟ انت موجود يا ولد ؟ مافي حدا .. بقينا هيك ساعه ونص واحنا قاعدين عالأرض بنستنى وماصار شي.. وفجأة صفنت بغسان وحكيتله .. غسان أنا حسيت شي هسه .. حكالي شو .؟ قلتله حاسس رح يصير معك بكرا شي.. ! فجأة خاف وحكالي شو رح أموت ؟ قلتله مابعرف بس في شي سيء رح يصير معك بكرا.. حكا يمكن أجا دوري بهالمكان.. قلتله والجاي اكيد هوه انا.. مارح يطلعلنا شي خلينا نطلع فوق.. وبكرا حاول ماتغادر البيت لأنه أنا حاسس ومتأكد إنه رح يصير معك إشي سيء ومين وراك الله اعلم بس خلي حدا من اهلي يلاقي بيت لنطلع خلص بس اهم شي مش انت لأنه انت رح تتأذى هاد احساسي.. طلعنا فوق ودخل على غرفته خايف ومرعوب.. وانا دخلت وسكرت حالي عغرفتي لحد ماخلص الليل
يتبع..
