التوقيت وما وراءه الحلقة السادسة الجزء الاول 🎬🎥😱

#التوقيت_وما_ورا��ه_11_11
الحلقة السادسة
الجزء الاول

كنت بعد أقل من ساعة جاهزة.. والعرس ما كان باقيله غير ساعتين.. الساعة 9:09 دقايق.. رن الجرس.. امي فتحت الباب.. صوت ورد بسلّم عليها وبقلها إنه مصوّر حفلات.. بطلع من الغرفة.. بشوفني بالفستان.. بلاحظ نظرات بعيونه بحياتي كلها ما شفتها.. بتلعثم بالكلام وبيحكيلي جبتلك الصور.. امي بتقلي متى تصوّرتو؟!.. بحكيلها اليوم اتصورنا.. وناوية أكبّرهم ببيتنا.. امي بتكون مُصرة تشوفهم وبتقول بدي أكبّر منهم واعلقهم هون.. صورة أبوكي صار لازم تنشال خلص.. وصار وقت تنحط صورتك بدالها.. قلتلها صورة بابا ما رح تنشال.. أخدت من إيدو المغلف يلي فيه الورق.. تركته ورجعت لغرفتي.. فتحت الخزانة وخبيتهم وقفلت عليهم.. أما المفتاح رميته ورا الخزانة.. رجعت للصالة لقيت ورد مو موجود.. حكتلي امي مين هاد وليه هيك كان يتطلّع عليكي وكأنه أول مرة بشوفك؟!.. قالت ياسمين منيح يلي راح.. بتقلها أمي بعصبية نفسه ؟!.. بتقول ياسمين كرم خبّرني إنه بالطريق.. بعد دقايق بندق باب بيتنا.. بتدخل خالتي رجاء وبنتها ليلك.. بتزغرط بصوت عالي.. وليلك بتطلّع عليه من فوق لتحت.. وبتقليّ حلو كتير بس مو لابقلك.. ان شاء الله اليوم ما بتم عرسك وبتصير تضحك!.. أنا بعصّب وما بتمالك أعصابي.. بقرّب منها وبضربها على وجهها.. بنزل الدم من أنفها وبتبكي مصدومة.. امي بتصرّخ وبتقلي شو عملتي؟!.. ليه ضربتي بنت خالتك!.. قلتلها ما سمعتيها شو قالت!.. ما بدها عرسي يتم.. بتشمت فيني وبتحكي عليّه!.. قالت ياسمين.. شو صرلك ريحانة!!.. ليلك ما حكت شي.. بتشد ليلك أمها وبتقلها طلعيني من هون.. أنا الحق عليّه يلي جيت معك.. بتقول خالتي طيب يا اختي بصير خير.. نحنا جايين نفرح لبنتك وانتو بتستقبلونا بالضرب!.. حاولت امي تترجاها وانا وعيت للحظة وكان بدي الحقهم بس طلعو بسرعة من البيت.. امي صارت تصرّخ وتحكيلي شو فيكي شو صرلك!.. ضربتي بنت خالتك بدون سبب!!!.. حكيتلها سمعتها بتحكي.. أنا سمعتها بأذني.. قالت ما حكت ولا تنفست بحرف.. ما تعملي ولا شي!.. وولا شي.. بدي هالليلة تعدي على خير وتوصلي على بيت زوجك بخير!.. قالتلي بعصبية خالتك سمعت الكلام يلي كنا نحكيه اليوم!.. سمعت كل شي!!.. وانا عارفة خالتك ما رح تسكت.. هلأ رح تروح تنشر الكلام بسبب هالكف يلي ضربتيه لبنتها!.. قلت لأمي مش ذنبي.. في شي حاسيته هلأ فيني.. بدون وعي عم يأذيني.. أو عم بكشفلي أشياء بتخليني أأّذي يلي حولي؟!.. حكت أمي احكيلنا كل شي قبل لتوصلي الصالة.. بقي ساعة ونص.. خلينا نعرف قبل للفضيحة تصير قدام الكل!.. قلتلها بحس بخيال عم بلحقني وين ما أروح.. في حدا جنبي.. بتلفت حواليه.. وبقلهم جنبي وحواليّه في شي لازقني متل خيالي.. وعم بوجّهني وبحسه بده يأذيني وبطلب مني أأذي نفسي.. شعور جواتي صعب أوصفه.. دمّعت أمي.. وقرأت عليّه كلام وقالت لأ ما فيكي شي.. بنتي لو رسّختي هالفكرة براسك رح تقتنعي فيها.. لهيك إرمي كل شي وفكّري بزوجك الطيب يلي بقي معك لليوم برغم مزاجك وأسلوبك لمدة سنة معه!.. التزمت الصمت لوقت ما أجى كرم وأخدني من البيت.. وصلنا صالة العرس وأنا شاعرة بدوخة.. وكنت بتلمّس وبتلفت حواليّه بشكل سريع كل دقيقة.. الساعة 11 تماماً ونحنا لسه بمرحلة العراضة الخارجية.. أغاني ورقص وزغاريط وشايفة أمي فرحانة بس منتبهة على تصرفاتي.. ياسمين مع صاحباتي ببتسمولي وبصوّروني والناس بتدخل لجوا.. دخلنا الصالة بعد ربع ساعة استقبال.. وأنا إيدي على الساعة يلي كنت مُصرة ألبسها برغم رفض ياسمين وأمي.. 11:5 .. كرم ببتسملي وأمه بتقرّب وبترمي ورد علينا ونحنا مصمودين.. 11:6 ربى ولمى وأمل بقرّبو مني وببوسوني.. 11:7 بتتغيّر أغنية هادية لأغنية أكتر صخب ومنظم الحفلة بيتكلم بميكروفون مع المعازيم ليتنظمو وبحط الميكروفون على طاولة صغيرة قريبة منّا وبروح للإستديو الخلفي.. بنزعج وبدوخ أكتر من الصوت العالي.. 11:8 بشوف رجاء مع بنتها ليلك بدخلو الصالة وأمي بترتبك وكرم مو منتبه وببتسم للحضور.. 11:9 أمي بتشد خالتي للرقص بمحاولة إرضاء وبنتها بترفض وبتبقى تتطلع عليّه بنظرات حقد جالسة على طاولة لوحدها وخالتي بترقص مع امي وصاحباتي.. 10:10 ياسمين بتحاول معي لأقوم أرقص.. 11:11 بنتبه على الطاولة يلي كانت قاعدة عليها بنت خالتي ليلك وبشوف البنت يلي شعرها طويل مغطي وجهها وبتحاول تنتحر.. راسها منخفض تحت الطاولة وما حد منتبهلها بس باين طرف عينها من بين شعرها.. بتمنى أمنية وبتطلّع على كرم.. بتلمح عينه لعندي وبتتسملي.. بقوم بسرعة ناحية الطاولة الصغيرة وباخد الميكروفون.. بصرّخ فيه إسمعوني.. إطفو الصوت!.. بدي أحكي!!.. الكل بنصدم ومنظم الحفل بطفي الأغاني.. بصرّخ بالميكروفون في بنت عديمة شرف قاعدة على الطاولة هناك لحالها.. وحاولت تقتلني اليوم وأنا بالصالون.. كانت بدها تلف الحبل على رقبتي وتخنقني متل ما انخنق بابا ومات.. بابا يلي ربّاني مو بابا الحقيقي يلي تركني وسافر.. وشفتها كمان بالشقة يلي اختي كانت فيها مع إبن البواب علي بوضع سيء.. الشب يلي اتهموني اني قتلته من أيام.. هالبنت كل مرة بتحاول تنتحر بس بترجع تأذيني وتقرّب مني!.. عم تلحقني.. بترجاكم كلكم اقتلوها قبل لتقرّب مني!..
شو اكمل؟