التوقيت وما وراءه الحلقة التاسعة الجزء الثاني🎬🎥😱

التوقيت وما وراءه
الحلقة التاسعة
الجزء الثاني

شفته واقف بالعتمة جنب باب البيت.. وبحكيلي تفضلي ريحانة.. بسرعة لأنه حيّنا مكشوف!!.. دخلت بسرعة.. طلعنا أول طابق.. وقليّ هاد باب بيتنا والبيت الصغير جنبه تماماً بالعمارة التانية!.. مشيت معه لوصلت من طريق متل درج فرعي للعمارة التانية ووصلنا لبيت صغير.. حكيتله بس هالبيت ابعد شوي من بيتكم!.. قال لأ هاد كله بيتنا.. والبيت لازق فيه بس لأنه عتمة صعب أشرحلك كيف نظام البيت!.. طلّع مفتاح صغير.. وفتح البيت.. دخل ودخلت معه.. صار يحكي شبابيك البيت بتكشف لشقتنا لهيك امي ممكن تشوفنا لو ضوينا.. رح أشغّل فلاش التلفون.. طلبت منه أقعد على الأرض ونضل قريبين من الباب.. فتح ثلاجة صغيرة وحاول يضيفني.. رفضت وطلبت منه نحكي بالماضي.. صار يقول اول شي بدي تحكيلي عن سر توقيت 11:11 لأحكيلك يلي بعرفه.. قلتله الوقت يلي مات فيه بابا.. وبسمع كتير عن هالتوقيت.. كتير في ناس بتشوفه بالصدفة أكتر من مرة بدون قصد!.. وبتكرر معهم.. بس أنا بتكرر معي كتير إني أشوفه بشكل مبالغ وعدا عن هيك الأمنيات يلي بتصير حقيقة بلمح البصر!.. وآخرهم إنت!.. انبسطت وحكالي مبسوط إني كنت واحد من أمنياتك!.. بس شو يلي شدّك فيني؟!.. حكيتله شكلك يلي شبه بابا ومو ملاحظ إنه وجهك في مني؟!.. صار يقول طيب إنتي قلتيلي إنه امك حكتلك إنه ابوكي يلي مات مو هوه أبوكي الحقيقي وإنه والدك سافر وتركك بالرغم من إنه إسمك على إسم والدك زوج امك ووالد ياسمين!.. وشبهك من شبهه يلي فيه من ملامحي!.. كيف بتفسري هالشي؟!.. قلتله امي خربطتني.. هاد الشي يلي مو قادرة أعرفه ولهيك طلبت تساعدني لأنه ما بربطني فيك شي يعني انت بالنسبة لإلي شخص متل الورقة البيضة.. مو شخص بعرفني وبعرفه من قبل!.. وانا من سنين طويلة بحاجة أني افضفض!.. قليّ خليني احكيلك عن سر توقيت 11:11 بالبداية.. وآخرها رح نحكي عن الماضي.. من خلال خبرتي بالحياة وثقافتي وسفري صار عندي كم هائل من المعلومات يلي مخزّنه بذاكرتي.. من بينها هالموضوع يلي انتي حكيتيلي عنه.. رقم 11 يلي بتكرر بحياة ناس كتير مو بس بحياتك لكن معك بشكل مختلف.. حكيتيلي بعض من أحداث حياتك الماضية لكن تفاصيل ما عرفت حالياً.. ويلي عرفته إنه في حد سحرك وسحر أمك قبل حوالي عشرين سنة!.. تمام!.. في بعض العلماء الروحانيين يلي قرأت عنهم بيحكو إنه الأرقام المتكررة بحياة الناس بكون في إلها مغزى ومعنى أو إلها علاقة بمستقبلهم أو حتى ماضيهم.. وأبرز هالأرقام هي أرقام 11:11 أو هالتوقيت المتكرر يلي بشوفوه بعض الناس ومن بينهم إنتي.. وهالعلماء قالو إنه تكرار هالتوقيت بحياة الإنسان بشكل مبالغ هوه دلالة معينة على حياتهم يلي عاشوها من قبل أو تنبيهات لأشياء رح تصير معهم بالمستقبل.. لكن شو بالزبط هاد يلي ما حد بعرفه وبقي الموضوع غامض ومظلم وصعب يترجمه العقل.. ويلي بقصده العقل الباطن.. العقل الباطن يا ريحانة أوقات بلعب فينا!.. وبوجّهنا لأماكن نحنا ما بنكون متوقعينها.. على ما يبدو ذكاءك الخارق والحالة النادرة يلي إنتي عايشيتها كانت كمان سبب لدعم إستمرار ملاحظة هالتوقيت بعقلك لحد اليوم!.. إنتي إنسانة ما بتنسي ولا تفصيل وهاد شي نحنا ما بنختلف عليه ولا حد بيقدر يكذبك بعد كل الكلام بالكوفي شوب.. وعدم نسيانك يمكن كان نقمة لإلك.. من لحظة موت والدك لليوم.. لأنه التوقيت يلي مات فيه بقي محفور بعقلك الباطن لليوم لهيك كل ما بتشوفيه بتتذكري الماضي.. فهالشغلتين صارو مربوطين ببعض ومتلاصقين متل تنين توأم!.. وهاد سببه التزامن بين موت والدك وتكرار الوقت.. قلتله يعني مو صدفة؟!.. حكا هاد يلي نحنا مو عارفينه!.. هلأ نحنا مو أوقات بصير معنا حدث بحياتنا وبنحس إنّا شايفينه من قبل؟!.. هل هالشي صدفة ولا لعبة من العقل الباطن؟!.. قلتله صحيح.. برغم دراستي لعلم النفس بس ما لقيت تفسير للشي يلي بصير معي!.. سوى إنه صدفة من خلال تزامن الأحداث وتكرارها متل ما بقول فرويد!.. قلّي لازم نبحث بعلم الأرقام عن هالظاهرة خصوصاً إنه في كتير دلالات نفسية للأرقام مثل رقم 13 في ناس بتتشائم منه وبعتبروه مصدر للكوارث والمصايب.. وبسبب هالشي صعب تلاقي رقم 13 بغرف المستشفايات ولا حتى المطارات!!.. قلتله صحيح!.. طلبت منه يعطيني ورقة وقلم.. راح فتح خزانة وطلّع ورقة.. قلي لا تستغربي إني لقيت بسرعة اخي الصغير بدرس هون لأنه ثانوي.. اخدتها منه وقلتله انت نبّهتني على شي أنا ما كنت منتبهله وهلأ اقتنعت اني ما بنتبه لبعض الأمور فعلاً ولسبب!.. كتبت رقم 11 + 11 = 22 تاريخ وفاة بابا.. ولو نقصنا 22 من 11 برجع بعطينا 11 ولو نقصنا منهم 2 بصيرو 9 العُمر يلي كنت عايشة فيه وقت وفاة بابا !!.. ولو زدنا عليهم سنتين بصيرو 13.. ونحنا انتقلنا للبرج بعد سنتين بقرار من ماما!.. وكان عمري وقتها 13 وبتذكر اندعست متل هالأيام بشهر أكتوبر.. وكنت رح أموت.. وهلأ عمري 29 وبهالعمر فكّرت أموت.. ولو نقصنا وضفنا من هالأرقام بطلعلنا عُمر ماما.. ورقم منه بشبه تاريخ وفاة بابا.. حكيتله ماما مشتركة معي بلغز هالرقم!.. ولو أفكّر بأحداث تانية رح ألاقي إنه الرقم 11 عامل مشترك بكل أرقام وأحداث حياتي!.. قال حتى رقم 3 عامل مشترك!.. في ناس بتخاف من تكرارة لأنه في الآخر بيعطيهم نتيجة لأرقام شيطانية!.. طلبت منه أمشي وقلتله صعب أضل.. ماما بتعرف شي ومخبّية عليّه لليوم.. فتحت التلفون وأول ما فتحته وصلني مكالمة من الشرطي.. بخبرني إنه أمي انقتلت وياسمين بالمستشفى
شو اكمل؟