الاصبع السادس .. الحلقة التاسعة 🎬🎥😱

الاصبع السادس .. الحلقة التاسعة 🎬🎥😱 Hayah /templates/dist/assets/img/logo.png
#الأصبع_السادس_قصص
#الأصبع_السادس_9 #الأصبع_السادس
الحلقة التاسعة

أنا كنت مصدومه بكلامها ومو متوقعه هيك رد منها.. أنانيتها لتعرف مين بنتها كانت اكبر من كل شي.. وبقيت بفكّر وخايفة لصار أول الصبح.. نفتح الباب وماكنت لسه نايمه ودخلو ينامو.. عملت نفسي قايمه على الحمام.. ورحت تفقدت الغرفة يلي كانو متجمعين فيها.. ماكان فيها ولا بنت.. استغربت وطلعت لبرا أدوّر عليهم.. سمعت صوت واحد عم بحكي.. شدّني صوته للحظة وحسيت إني بعرفه.. قربت لأسمع منيح كان بحكي ويلي بحكي معه كان تمارا المديرة.. كان عم بقلها.. هاد يلي صار بس بترجاكي ماتقولي لحد لأنه ممكن أروح بداهيه ومو بس أنا انتي كمان.. حكتله يعني انت يلي كنت خاطفها لتالا.. وكل هاد عشان هيك.. حكالها هيه يلي أجت برضاها بس بترجاكي ماتفصليني.. أنا اعترفتلك بكل شي ومابدي الا تسامحيني.. حكتله اسمع عليه هيثم.. البنات يلي هون كلهم إلي ولأنك بتعرف كل شي وعارف يلي بصير أنا مارح أعمل فيك شي.. إنت متورط ولازم تبقى هون لحتى تحمي نفسك.. بس ياويلك إذا لعبت بديلك.. حكاها أنا من إيدك هي لإيدك هي.. وأنا اعترفتلك لأني خايف.. حسيت من صوته أنه سكت وباين إنه راح.. ركضت للغرفة يلي بتطلع على الباب الخارجي.. وشفته طالع.. شفته من ورا بس ماقدرت أشوف وجهه بس عرفت إنه إسمه هيثم.. وللحظة كان بدي أعرف مين هوه.. لفيت راسي شفت وحدة بتتطلع عليه وبتقلي ليه ماعم بتنضفي.. خالتك غرقانه بالمي بالحمام وانتي هون ولا عبالك.. يلا.. دخلت تمارا على الغرفة وقالت سارة على غرفتك عندك درس بعد شوي.. وانتي شو بتعملي هون؟.. عند خالتك عالحمامات.. حسيتها قربت منها بعد مارحت وصارت تحكي معها بصوت واطي.. طلعت لبرا وماسمعت كلامهم.. ولمّا وصلت الساحة شفت البنات الصغار عم بلعبو ومنهم البنت يلي شفتها معهم بالغرفه مبارح.. وتالا جنبها.. قربت منها بعّدت عني وضربتني على إيدي حتى ما ألمسها.. حكيت لتالا.. ليه هاي البنت بتتصرف هيك وشو يلي كان بصير مبارح بالليل بالغرفة عندكو؟.. سكتت وماجاوبت.. قلتلها انا بحبك ومابكرهك احكيلي.. حكتلي بس أنا بكرهك لأنك قتلتي صاحبتي ومارح أغفرلك لحتى تموتي.. وقريباً رح يكون أجلك هون بالدار.. ومارح تقدري تهربي.. ورح نقبرك كلنا ونجتمع كل يوم على قبرك نلعنه.. راحت معصبه وأنا بقيت واقفة وخايفه من كلامها.. في بنت كانت واقفة جنب الشجرة وسمعت كل الكلام وأنا ماكنت شايفتها ولا حاسة بوجودها أبداً.. وباينه أكبر من تالا بشوي.. قربت مني من نفسها بدون ما أحكيلها.. وحكتلي بدك تعرفي شو يلي بصير هون ؟.. البنات يلي هون بتعاملو كلهم بيتعاملو مع الشياطين ومديرتنا تمارا أولهم.. وبيطبقو يلي بسمعوه منها علينا نحنا.. لحتى نحمي نفسنا بس نطلع من الدار ونكون أقوياء مو متلهم.. حكيتلها من مين؟.. حكتلي في مرة ختيارة إسمها أم سعاد عايشة بقبو آخر المبنى وماحد بشوفها.. نحنا مابنعرف شكلها بس البنات الكبار بحكو عنها.. وفجأة سمعت صوت تمارا بتصرخ عليه وبتقلي انتي برا ياعديمة الأخلاق.. ادخلي لجوا عند خالتك وجيبي البنت يلي معك.. مشيت معها بهدلتني وأخدت البنت.. ونبهتني لو مارديت عليها رح تطردني مع خالتي.. رن تلفوني كان أيهم.. سألني كيف الوضع بالدار.. ماقدرت أفسرله شي وحسيت صوته تعبان حكيتله خير شو في؟.. قلي رجع يجيني رسائل تهديد والمجرم بمهلني يوم واحد لو ماخبرتك ترجعي على البيت رح يجي يقتلني.. قلتله وشو عرفه اني مو بالبيت؟.. وفجأة أجت لعندي بنت.. كان باين إنه بدها شي مني.. قربت مني.. حكيت لأيهم بحكي معك بعدين.. وقفت جنبي وقالتلي أنا بتول.. وبدي أحكيلك إنه العين عليكي هون من البنات.. الأحسن ما تحاولي تعرفي شي عنا.. سوزان وصلتلي رسالة أقلك ياها.. ماتدخلي نفسك بأي شي بالدار.. ولا تحاولي تخبري حدا بالشي يلي شفتيه مبارح لأنك رح تندمي.. قلتلها إنتوا ليه هيك أسلوبكم وليه كلكم هيك.. قالتلي نحنا كلنا إيد وحدة وكلنا نفس الأسلوب.. بس يلي بدي أوصلّك ياه تهديد صغير.. إذا خبرتي حد بالشي يلي عملوه مبارح عبير وسوزان رح تنقتلي والظاهر إنك من شوي كنتي عم تحكي مع حد على التلفون وكنتي بتخبريه.. صدقيني لو عرفت تمارا مارح ترحمك.. وهلأ البنات عم بشوفوكي وبراقبوا كل تحركاتك.. وماحدا رح يحّل عنك أبداً وبرجع بنبهك لو أفشيتي أسرارنا لحد هون رح نكسّر رجليكي هدول يلي بتلعبي فيهم باليه.. راحت وتركتني عم بحكي مع حالي وخايفه.. شفتها طلعت لفوق وصارت تتطلع عليه من الشباك وقربت سوزان وعبير منها وكأنها بتقلهم حكيتلها يلي وصوتوني عليه.. كانت جاسوسة لإلهم وأسلوبها أسوء بكتير منهم.. وإستغربت من كلامها.. كيف عرفت هالشي؟!.. معقول شافو ألبوم خالتي يلي ماقدرت أخده منها وإكتشفوا هالشي.. أو من تالا !.. ماكنت متصوّرة إنهم يكونو بهالكمية من الحقد والشر ولا متصوّرة إنها تكون بنت خالتي وحدة من هدول البنات!.. كان اليوم عم بمضي بهدوء وبدون أي أحداث مزعجة.. بس الأفكار المخيفة والمزعجة ماتركتني خصوصاً من بعد ماعرفت الحقيقة من البنت الصغيرة.. كان بدي أعرف منها أكتر بس وجود تمارا كان يمنعني وكل ما أقرب من وحدة منهم تطلب مني أروح أكمل شغلي وأضل مع خالتي وما أختلط ولا بحدا منهم.. الذل يلي عشته بهاليومين فاق كل التوقعات بس كنت مرغومة أضل لأنه مسجات التهديد يلي قلي عنها أيهم خوفتني.. وطلب مني أبقى لحتى يعرف إذا يلي رح يصير بالفيلم رح يتحقق أو لأ.. وبالفعل بلشت الأحداث تتحقق.. كنت بشوف خالتي مع تالا كتير.. وعم بحكو مع بعض.. وفجأة بتيجي تمارا لعندهم وبتوخدهم.. بترك كل شي من إيدي وبلحقهم.. وقفت نفس المكان يلي ورا مكتبها وصرت أسمع.. كانت عم تنادي واحد أيمن.. عرفت إنه المحامي وجاي لحتى يكمل إجراءات التبني.. سمعت كل شي وعرفت إنه خالتي دفعت يلي فوقها ويلي تحتها بس لتصير تالا بنتها.. طلع المحامي وقلها نحنا عشرة عمر والنا تاريخ قديم مع بعض.. لو بدك شي تاني خبريني لأني بخدمتك.. استغربت من كلامه وحسيت إنه بعرف شي من كلمة النا تاريخ مع بعض.. وبعد هالكلام طلعت تمارا لتودعه برا وتوصله للباب الخارجي.. بقيت خالتي مع تالا وحكتلها بنتي احكيلي شو يلي لازم اعمله هلأ.. قالتلها تالا أنا شفت روحها مبارح بالليل قبل ما أنام.. خبرتني أحكيلك إنه بنتك موجودة هون.. وهيه بدها ياكي وشايفتك بس بدها انتي تعرفيها.. رح تعطيكي إشارة اليوم لتحسي فيها.. بس أول شي قالتلي ياه إنه بدها رزان تطلع من الدار.. وماتكون موجودة لتظهرلك وتقلك هيه مين.. لأنها بتكرهها ومابتحبها وبدها ياها تموت.. حكتلها خالتي رح أخليها تطلع بس شو الإشارة يلي رح تصير؟.. حكتلها أستني اليوم بالليل الساعه وحدة وانتي رح تعرفي.. دخلت تمارا وحكت لخالتي هيك خلصت الإجراءات وصارت تالا بنتك بالتبني.. حكتلها خالتي الفلوس رح يكونو معك اليوم بالبنك اتفقت مع المحامي أيمن يعمل كل الإجراءات.. حكتلها تمارا ضل شي تاني؟

يتبع..