#ناس #بكري #قالوا :
ثلاث عدياني : عيني و وذني ولساني كون ماجوش هوما
نروح لقبري هاني .
ثلاثة يطولوا العمر :الدار الواسعة والفرس السريعة والمراة المطيعة
ثلاثة يعمروا الدار :الحرث بالغبار والفحول الصغار والزواج ببنت الكبار.
ثلاثة خسارة :البني فالدار الصغيرة والحرث فأرض حجيرة والغلض فالمرأة القصيرة.
ثلاثة يقللو الصحة :الزواج بالمراة المعفونة ومشيان الحفا وهزان الذري على القفا .
ثلاثة يربحو :النعجة والعويجة والنحل ايلا جا (العويجة تعني السنبلة ).
الثلاثة من الجنون الرايح للسوق بلا مال ،والرايح للبير بلا حبال ،والجالس وسط الجماعة يا وما دارش البال .
#عيب النفس كثرة الخطايا وعيب النفس من قلة النوم
وعيب العقل في موت الخلايا وعيب القلب دسان الهموم وعيب الروح في خبث النوايا .
الرجال يبانوا فالشدة وجه البارود إذا خرج ما فيه ردة
والراجل ماش في الزندة والعظم عمرو ما يكون فالكبدة والجايح يخلع بالهدرة والدنيا فانية كيفها كيف الرقدة...
#ناس #بكري. #قالوا:
ما يفوح بخور بلا جمر وما ينبت زرع بلا مطر وما دوم محبة بلا قدر لمرا الحرا تجيب لحر وراجل ما يتبعش الذر .
طيح وشوف شكون يوقف معاك غيب وشوف شكون يسال عليك ....بعد غربل وصفي الرجال بالرجال ورجال بالله
ضحكت لحباب بمال الدنيا وما تبدلهاش
لاديت من لجيال عبرة
ولا ديت من ليام والو
ولا مشيت لا تصد على الجرة
ولا تبع الفحل على مالو
ولا تربح راحتك من هبالو
صاحب الراجل ولد الفحل والحرة
يجي نهار وتسال على حوالول
لكلام كبير ولمعاني بحر ...
..ناس بكري قالوا
كي تبدا قول بسم الله وكي تكمل قول الحمد لله .ما تتعراش
وأنت عرقان ،وماتشربش الماء وأنت عرقان وما تكسلش
رجليك وسط جماعة وما توكلش أولادك وسط جماعة وما تشربش بالواقفة وجهك نقيه ما تدري واش تلاقي بيه ،ولي فاتك بالزين فوتو بالتبسيمة ولي فاتك باللبسة فوتو بالنظافة ولي فاتك بالعلم فوتو بالظرافة ولي فاتك بالصنعة فوتو بالسياسة .ولي فاتك بالمال فوتو بالقناعة ولد السبع ما
يجي مشحاح .والدفلة ما تجيب التفاح ..
قالوا. ناس بكري يجي الوقت الخاوة يتعاركو كي لحناش والمطر يصب والارض ما ترواش والطبة تعالج والناس ما تبراش الحكم للرعيان الراي للنسوان يكثرو فيه الحجاج وتجارة الدجاج والنساء بلا زواج الهدرة في الخيوط والماء في الحيوط اهلو يا كلو بالارطال ويشربو في الاسطال وينامو الليل وما طال شوف ذاك الزمان المكشوف الحمير ترعى والخيل تشوف مطركم عجاج وكسيبتكم الجاج ،خبزكم يخبزو الخباز النساء مشمرة والرجال مدمرة ..
