التصنيفات

مجتمع حياة

مجتمع حياة هو مجتمع مصمم للمرأة و يحوي أقسام تخصها من طبخ و موضه ومواضيع عائلية و تربوية و عن الحمل و الولادة و المطبخ السعودي والعربي والسياحة والسفر والبنات و الامومه والازياء والموضه

منو منكم متزوجة وتدرس بنفس الوقت ؟😊

منو منكم متزوجة وتدرس بنفس الوقت ؟😊 Hayah /templates/dist/assets/img/logo.png
هالموضوع ببالي من زمان واحسة جدا مهم لانه مثل مانعرف كلنة انه اغلب البنات هسة حاليا يدرسن وقليل جدا البنات الما مكملات دراسة فأحس ماكو بنت تدرس ما مفكرة بهذا الموضوع ولو مرة على الاقل واني منكم ايضا
تدرون شوكت تفكر بهذا الموضوع او تعيرة اهمية لمن هي جاي تدرس بنهاية الثانوية او بالجامعة وتقريبا بالجامعة اكثر ويجوهة ناس يخطبوهة هنا راح تتلقة الضربة القاضية وتحس انو السالفة صارت صدگ ومو بس كلام چانت تاخذة بشكل شقة و تبدي تفهم الموضوع بعمق اكثر وتبحث عنة وتبدي تسأل نفسهة عدة اسئلة :
* هل اني فعلا مستعدة انو اتزوج ؟
* هل اني بحاجة فعلية وماسّة انو اتزوج ؟
* هل اني مستعدة انو اتحمل مسؤوليات الزواج ؟
* هل راح اكون زوجة ناجحة ؟
* والسؤال الاكثر اهمية للبنات الي يدرسن هو هل راح أگدر اوفق بين دراستي الي شاغلة معظم وقتي حاليا وبين زواجي ام راح افشل بهالشي ؟

وهاي التساؤلات الي ذكرتهة اكيد مرت على تفكيري وتفكير الكثيرات من البنوتات .....
وهسة راح احچيلكم شوية عن نفسي لمن كان عمري ١٩ سنة وبنهاية سنتي الجامعية الاولى تقدملي شخص وكان هذا الشخص من طرف اخوية وحسب الي عرفتة انو چان انسان خلوق ومتدين وطبعا همة الناس مااجوا لبيتنة بس مجرد انوا اهل الولد انطونة خبر بهالشي حتة يعرفون انو احنة عدنة استعداد للزواج او لا انوب يالة يجون وتصير الخطبة فاني طبعا بديت افكر بالدراسة والزواج وكل التساؤلات الي ذكرتهة الكم فوگ واهلي ايضا شجعوني اني اتزوج اذا چان عندي قدرة ادرس واتزوج ....بقوا القرار يمي و من گلولي هذا الكلام صار عدي صراع بين گلبي الي راغب بالزواج ومحبذ هاي الفكرة وبين عقلي الي يمنعني من الزواج خاف تأثر على دراستي ولكن مع الاسف عقلي والخوف والتردد الي چان بداخلي منعني من انو اخطوا هچي خطوة جديدة وغريبة علي ورفضت الشخص 🤕 .....
وبعد فترة تقريبا بديت افكر وية نفسي هل انو اني راح اظل ارفض جميع الناس الي يتقدمولي بحجة الدراسة والي رغم اهميتهة الا انو الزواج وبناء اسرة يبقة هو الاهم في نظر الدين وفي نظر جميع العقلاء بلا شك وگلت انو الله بعدين راح يحاسبني على رفض اشخاص متدينين لسبب غير مقنع لانه لو نروح نبحث بالمجتمع راح نلگة هواي بنات يجنن ويخبلن والي كلش احترمهن واقدرهن جدا متزوجات ويدرسن ومتفوقات بدراستهن هم مو بس ينجحن شلون ماچان فإكتشفت انو الخلل مو بالدراسة ولا بالزواج وانما الخلل بادارتنة احنة للوقت وشلون ننسق ونتعامل مع دراستنا وزواجنا وكل الامور الثانية وگلت وقررت بيني وبين نفسي انو لازم الگة حل 💪

فأني كلش حابة اعرف قصصكم وتجاربكم الي مريتوا بيهة على هذا الموضوع ومنو منكم چانت بطلة😌 وگدرت تتزوج وهي بعدهي تدرس واريد منكم تسولفونة شلون گدرتوا تنسقون بين البيت والدراسة ومتطلبات الزوج والاطفال اذا چنتوا مقررين تجيبون اطفال وحبيت انو نسمع تجاربكم و انو كل وحدة جاي تدرس او چان هذا الموضوع شاغل بالهة تتعلم من هاي التجارب ونكون سبب في انشاء جيل واسر واعية مثقفة ومتزوجة هماتة لانه الدراسة مهمة والزواج هم مهم جدا
واسفة جدا جدا😣☹ ادري طولت عليكم بس حبيت اوصللكم كل الي چان بگلبي لاني اعرف ومتأكدة انو المشاعر اذا طلعت من الگلب راح تدخل للگلب مباشرةً ❤💛
احبكم جدا ....اختكم من العراق